Read Angami Naga Isaya 60 Bible Online

Isaya 60 - Angami Naga bible

Isaya 60

¹Sielie, zielie; nie kezieu vorketa la, mu Jihova kesokezieu nie gei vorte.

²Kekreilamonyü kezeiue kijüu zepfülietuo, mu zeide-ikecü thuo themiako zelietuo; derei Jihova nie gei sielietuo, mu puo kesokezieu nie geinu ngutuo.

³Seyiekoe nie kezie nu vortuo, mu kediko nie kezie kemesa nu vortuo.

⁴Tosie di lutsahatsa mehoshücie; uko pete kehou kenguliezhie, uko n ki vorzhie; n nuo thepfuko pecie nunu vortuo, mu thekepfüko u bou geinu n nuopfüko pie vor.

⁵Sitse noe sü ngu di n dzo ziekruoitatuo; n melou veve di puo nei lhe motatuo,[59] kekreilamonyü dzükezha kinyi ketshukelhuocü kru n vatuo, seyieko kinyi n ki vortuo.

⁶Ut krodi puo thuo n whepielietuo, Midian mu Efa nu ut kemedzüko, Sheba nunu rei pete vortuo. Ukoe suna mu mharekethengu pie vortuo, sidi Jihova ketshe pu pesishütuo.

⁷Kedar mu tekuo kro pete vor n ki kengutuo, Nebaiot nu tekuo chüko n lie chütuo; uko a ruosuoba gei lielie kevi chülietuo, mu a a zapuzayie kiu pie kezivishütuo.

⁸Kimhou tuoi pruoketuo mu paruonuo pruo puo kicie nu kevo tuoiketuo hako suomia ga?

⁹Dzükhie kijüko a pfhetuo, Tarshish rouko bu kerie chütuo, kepecie nunu n nuonuoko, mu uko rakachü tsiu suna sa di uko ze vortuo, Jihova n Kepenuopfü za la, mu Israel la Kemesau la, kekreilamonyü puoe n chü ketherhushüwate eru.

¹⁰Sikemomia thuo n dahouko chüshütuo, mu uko kediko n lie chütuo; kekreilamonyü a a noupfhü nu n vüshü, derei a noushünouzhie nu n ngumezhie lashü.

¹¹N kharuko khrü sei batuo; khinhie theva süko khalie lho; sitse seyieko kinyiko se n ki vortuo, uko kediko ze kesietha di vortuo.

¹²N lie chü kemo seyie mu kedi katatuo; seyie süko peka tseiwatuo.

¹³Lebanon zapuzayieu, saipresbo, planbo mu tehouboko n ki vortuo, a kemesachü chü kezivishütuoü di, mu a phizho chüu chüpie zayie chütuo.

¹⁴N peseketuomia nuosenuoyieko nuke rünuo n ki vortuo, tsiu n rücieyakecü pete n phi nu nuketsutuo; uko n üse Jihova Nadiu, Israelko Kemesau Zion ütuo.

¹⁵Mia n khawa mu n mecücü vo, tuo n rüna rei vathe mota zorei, ae n chüpie kechachie mesümedeshütuo, phou puo mu phou puo mhiei u neiketuo chüshütuo.

¹⁶No seyieko nudzü nutuo, no kediko nu nutuo; mu noe a Jihova n Kelakelieu, n Rhakelieu; Jakob kinumia Kekuou ücü silietuo.

¹⁷Merenyi sou nu a suna se vortuo, mu thegi sou nu a rakachü se vortuo, sei sou nu, merenyi mu ketsie sou nu thegi, ae Kezekeviu bu n kemeho-u chü, mu Kemiatho bu n kepfhe kemeho-u chütuo.

¹⁸N kijü nu mha kesuo kechü si sa motatuo, mhavakecü morei bie pesuokecü n riehou nu si sa motatuo; no n dahou üse kelakelieu, mu n kharuko üse Ketshe ütuo.

¹⁹Khinhie gei niaki bu n kezie chü salie lho, morei theva gei mha va peziekecü la khrüu bu keziepie n tsü motatuo; derei Jihova thuo kechachie n kezie chütatuo, mu n Kepenuopfü thuo n zapuzayieu chütuo.

²⁰N niakiu le sa motatuo, morei n khrü jü sa motatuo; Jihovae kechachie n kezie chütatuo eru, mu n kekra zhako tseitatuo.

²¹N themia pete miatho phretatuo; uko kechachie kijüu pevielietuo. Ukoe a sekeshü nuotheko; a dzie pie chükeshüko, a bu zapuzayie chülieketuo la.

²²Ketsatho-u rei thinuo puo chütuo, mu kecütho-u rei seyie kekuo puo chütuo; ae Jihova zo; ae kenourhei di puo teiki chü tseishütuo.