Read Angami Naga Isaya 61 Bible Online

Isaya 61 - Angami Naga bible

Isaya 61

¹Niepuu Ukepenuopfü ruopfüu a gei tuo, kekreilamonyü Jihovae a kenheliete; Puoe a bu dieliekevi se vo mia u peseketuoko ki punu; u melou pro tuoketako phashünu, u phreikeshü dieu pie kedieko pesinu, mu kedieko khashüwaketa die pushünu,

²Jihova ngukemezhie teicieu pu pesishünu; mu úko Kepenuopfü khepu zhau rei; kraketuoko nou thupeluoshünu;

³Zion nu kra kebako la, mige sounu nyiepou zu keliekecü, thekrü sounu u kenei tier, kechaziekecü sounu ketshe pfheu khashünu a ketseshü. Uko üse kemiatho phrieboko, Jihova zayie pesipengushüketuo la, puo thuo leikeshüko üdi kielietuo.

⁴Ukoe thiedzü pekakewako chü la piesietuo, ukoe thiedzü vakewako piesie latuo; ukoe nadi pekakewako chü kemie latuo, phou kekra nu peka kevorko.

⁵Chazoumia bu nie kuo kroko vachütuo, rünamia thuo nie lie cie mu nie khubebo theketuo;

⁶derei nieko üse Jihova zievoko üdi kietuo, mia nieko üse Ukepenuopfü liethoko ütuo, nie-e seyieko kinyi cütuo, mu nie uko kinyi se mholietuo.

⁷Kekreilamonyü nie ngau de keniete, mu nie zhasekecüe nie yau üdi pesi, süla nie kijü za kenie pie nie vie chütuo, kechachie u neikecü pie nie yachütuo.

⁸A, Jihova kethoca a neiyacü la, A mha sekecü mu mhachü kekrükecü ngu mecü;[60] a dietho di uko zhakhra khashü uko tsütuo, mu a uko ze kechachie dietseidiekho puo chütuo.

⁹Seyieko donu uko nuosenuoyie situo, mu themiako donu uko cüünuoko situo; uko kengu pete rei Jihova japie uko ketsü themia ücü putuo.

¹⁰Ae Jihova nu a nei phituo, a kelhou peteue a Kepenuopfü nu puo neituo; kekreilamonyü yasaue nyiepou zu kelieyakecü mhiei, mu yasapfüe puo nyie pie puo ketsoyakecü mhiei, puoe kelakelie pfhe pie a pedziewate, puoe kemiatho pfhe pie a whewate.

¹¹Kijü puo nhathe khashüyakecü mhiei, mu tezie puoe puo nu leikeshüu bu tsü paryakecü tuoi, Niepuu Ukepenuopfüe kemiatho, mu ketshe bu seyie pete mhodzü lhou la partuocü la.