Read Angami Naga Isaya 64 Bible Online

Isaya 64 - Angami Naga bible

Isaya 64

¹He-i, n bu teiko shükhrapfü tsur kijüthouko bu n mhodzünu pepie,

²mi pie sei theshü di mi bu dzü kerüdakeshü tuoishücü we, sidi n zapie n ngumvüko pesishü, di seyieko bu n mhodzünu peshü ücü we!

³Noe hie le ba kemoko, mu mha kemerie chükeshü ki, no tsur, di kijüthouko bu n mhodzünu peta.

⁴Puo pfhe kebako la mha chüshüyakecü themia mhi pie no zo kemosie Ukepenuopfü kekrei ngu mo, thiedzütho nu miapuorei si tuo mo, morei u nyie pie si mo.

⁵Noe u neisie di kemezhüthoko chüyakecümia, n zhoko nu n rükrayakecümia ze keseya. Derei no n nei mota, mu hie phoumataya, kekreilamonyü no n thuo n kevielieta ro hie phoumataya.

⁶Hie pete rei mesa kemo puo tuoite, mu hie kemiatho mhathoko pete perhukewa pfhe puo tuoite. Hie pete nhanyü puo tuoi rüwitaya, mu hie kejokemouko teikhrie tuoi, hie hepietaya.

⁷N za kieyakecü miapuorei tuo mo, morei n teshüpietuoükecü miapuorei tuo mo; noe hie kinu n zie kevielietacü la, mu hie khapie hie kejokemouko dzie nu shüwaketa la.

⁸Sizorei, he-i Jihova, no hie Puou zo; hie sü linyo-u zo, mu no hie litho-u zo; hie pete n dzie mhatho phre.

⁹N nei mo phita hiecie, he-i Jihova, mu kechachie kejokemou-u rükra sei tuo hiecie. Tsie leshücie, hie pete n themia phre zo.

¹⁰N kemesa nadiko rayha puo chüte, Zion-e rayha puo chüte, Jerusalem thedzükezei chüte.

¹¹Hie ki kemesa mu keziviu, hie puonuoko sünunu n tshe kevor-u, mi bu thewate, mu thenou kemvü thecüko pete bie pesuowate.

¹²He-i Jihova, mha hako nu no n thuo n kethetatuo me? No kemekrie ba di, hie pechüpenyütuo me?