Read Angami Naga Isaya 65 Bible Online

Isaya 65 - Angami Naga bible

Isaya 65

¹A a ketso kemoko bu a pfhütuoü a pfhü kemoko bu a ngutuoü dojüpfü ba. Ae, “A haki ba, a haki ba” idi a za kie kemo seyie puo ki pu.

²Ae a dzienie chapie themia mia die ze kemo kro puo ki cha, u thuo u medo chü di vi kemo cha nu tuoyakezha la;

³tezie nunu ruosuochü, mu ita geinu mharekethengu the di, a zie kinu a nei kemo chü sei bayakezhako,

⁴ukoe mekhruko nu baya, mu theva gei kepekhre chüko nu baya; thevochü cüya, mha kerütseko chapie uko liko nu baya,

⁵ukoe “Nie thuo nie kereilie, a penuo vor hie, ae mesathorcü la” iya. Hauha a nyhüki nu mikhu puo zo, zhate tukeba mi puota zo.

⁶Harie, a mhodzünu hau thupiezhüte; a kemekrie balie lho, derei a khepu lie latuo;

⁷uwe, ae uko kejoko mu uko puonuoko kejoko zhakhra chü kesapie uko do gei shütuo, Jihovae siya; ukoe kijüthouko gei mhare kethengu ruosuo thekecü la, mu kijükhruko geinu a zha sekecü la, ae uko mhathoko la zhakhra mejüpie uko dogei shütuo.

⁸Jihova hakemhie puya: Khubesi phro mu khubedzü bayakecü tuoi, mu ukoe, “Süu bie pesuowa hie, theja puo sünu baya” iya. Süla a a kituoko la mhachütuo, mu uko pete bie pesuowalie lho.

⁹Ae Jakob geinu puoyie se parshütuo, mu Juda geinu a kijüthouko kayie se parshütuo; a kelakelieko süu wetuo, mu a kituoko sünu lhoutuo.

¹⁰Sharon nu tekuo kroko bu nha liecütuo, mu Akor razhau pie thukro bu kezhü chü puo chütuo, a themiako a pfhükelie la.

¹¹Derei nie Jihova khawaketako, a kemesa kijüthouu rükra moketako, nie kinyi la mizhü keseyakecüko, mu thiesie dze la zu kereipie tehie nu keshüko;

¹²A nie khapie zhiecha tsüwatuo, mu nie pete kedukhriu nu nuketsutuo, kekreilamonyü, a n kiekeshü ki, no a pfhekho mo, a die pukeshü ki, no rünyü mote, derei no a mhinguki suokecüu chü; mu a neiya kemo-u kedaliete.

¹³Süla Niepuu Ukepenuopfü hakemhie puya: A kituoko mhacütuo, derei nieko we merütuo; a kituoko mha krietuo, derei nie we terhütuo; a kituoko u neituo derei uko bu thenga chütuo,

¹⁴a kituoko u nou u kenei la kelituo, derei nieko we nie nou kemezhiekecü la ruorütuo, mu nieko ruopfü meyhumezhiekecü la kratuo.

¹⁵Nie-e nie za pie rüse puo tuoi a kedakelieko ki shüwatuo, mu Niepuu Ukepenuopfüe nie dukhriwatuo; derei puoe theza kekrei puo se puo kituoko tsütuo.

¹⁶Sidi kehoupuorei kijü nu theja cha ro kemiatho Kepenuopfü thuo japie tsütuo, mu kehoupuorei kijü rüsekecüu kemiatho Kepenuopfü thuo rüse pie tsütuo; kekreilamonyü thiedzü mezhieko rükra mote mu a mhi kinu kevieliete.

¹⁷Kekreilamonyü a tei kesa, mu kijü kesa puo chüshütuoü bate, thiedzü vieko rükra sa motatuo morei u sie lelie lho.

¹⁸Derei a chükeshüu gei kechachie u nei mu u nei lhe moliecie; kekreilamonyü a Jerusalem chüpie u kenei puo, mu puo themiako pie thedzükezie puo chüshütuoüzhie.

¹⁹A Jerusalem nu a neituo, mu a themiako la a neituo; süu nu krakecü pfhe si salie lho, morei kemezhiekecü la shiekecü se salie lho,

²⁰Sünu nuoranuomia zha huoyo rübei lhoukecü chü lho, morei ketsamia puo kelhouzha lhou tso kemo ba salie lho, kekreilamonyü cie krie puo lhou di siakecüu pie u khriesarüü teiki zoluo ütuo, mu cie krie puo tso mo di siaketau pie rüsepfüta ütuo.

²¹Ukoe ki chü di süko nu lhoutuo; ukoe khubelie cieshü di puosi cütuo,

²²Ukoe ki chüshü di mia bu baketa chülie lho; uko leishü di mia bu cükecü chülie lho; a themiako kelhouzha rei seiboko kelhouzha tuoi zotuo eru, mu a kedakelieko telhekecha uko dzie mhathoko la ketheguotuo.

²³Ukoe kemethuo nu mhachülie lho, morei hieshie dzütuoü di nuo penuolie lho; ukoe uko nuonuoko sa di Jihova japie tsükeshü nuonuo chütuocü la.

²⁴Ukoe kiekemo nu a khoshütuo, uko pu pedzeyaluokecü nu a silietatuo.

²⁵Socie mu tekuonuo-u keze nhacütuo, Loshae thudo tuoi rügu cütuo; derei nyophe pie tinyhüu ca chütuo. A kemesa kijüthou gei uko bie pechü morei pesuolie lho, Jihovae siya.