Read Angami Naga Isaya 66 Bible Online

Isaya 66 - Angami Naga bible

Isaya 66

¹Jihova hakemhie puya: Tei sü a kediba, mu kijüu a phipra; nieko a la chüketuo kiu, mu a kerüleichüu kedipuo ga?

²Mha hako pete a dzie thuo chüshü, mu süla mha hako pete a vie, Jihova siya. Derei a haikecü themiau mehotuo, puo nou rünuo mu puo ruopfü nouzhie nyi di a die si di pekecüu.

³Thudo kedukhriue themia puo kedukhri mhie zo; tekuonuo puo pie ruosuo kechüue, tefü puo vo biethekewa mhie zo; thoulha se ruosuo chükeshüue thevo zie khakeshüu mhie zo, mharekethengu pie kerükra ruosuo chükeshüue japie terhuorhi puo ketsüu mhie zo. Hako we u thuo u chako kedaliete, mu uko ruopfüe kerütseko u neiya.

⁴A rei uko krenyüketuou kedashütuo mu uko prei kebau se uko gei vorshütuo; kekreilamonyü, a kiekeshü ki, miapuorei a pfhekho mo, a die pukeshü ki, uko rünyü mo, derei ukoe a mhinguki suokecü chü, mu a neikemo-u kedalie.

⁵Jihova dieu rünyüliecie, nie puo die gei peyakezhako: N themia thuo n ngumecü mu n khawakecüko hakemhie pu di, “Jihova pie zapuzayie chüshü, sitse hie nie kenei ngutuo” siya; derei thenga chüketuo we uko zotuo.

⁶Rünyüliecie, nadi nunu mevükhoukecü puo! Rüsuoki nunu mhapfhe puo! Jihova pfhe, zhakhra pie puo ngumvüko tsüzhie!

⁷Puoe nuonuovachü vor kemonu puoe penuolie; puo gei vachüu vor kemonu thepfunuomia puo penuolie.

⁸Supuonie mha haikecü si ga? Supuonie mha haikecü ngu ga? Kijü puo khunhie nu penuolietuo me? Va puo nu seyie puo pesielie vi me? Sizorei Zion nuonuovachü chülie mumetha puo nuonuoko penuolie.

⁹A nuobvüu khashü di penuoshü motuo me? Jihovae siya; a penuokecü chüshüyakecüu, nuobvüu khawatuo me? Nie Kepenuopfü siya.

¹⁰Jerusalem ze nie dzüzielie, mu puo la nie neiliecie, nie puo khrieyacü pete, kenei nu puo ze nie neiliecie, nie puo krükrakecü pete.

¹¹Nie bu puo gei thukepeluo nu-u nu di nie thekelie mu ketheguolieketuo la; nie bu puo kinyi ketshukelhuo kechüu nunu nie nei di krie kenyü krielieketuo la.

¹²Jihovae hakemhie puyacü la: A kruokelie bu kerü puo tuoi puo ki vortuo, mu seyieko kinyi bu rücü dzü tuoi ketshu kezie chü kru puo ki vortuo; siro nie bu nutuo, puo tsei geinu nie pietuo, mu puo do geinu nie yukreituo.

¹³Mia zuonuoe puo nuoyo nou thupeluokecü mhie, sümhiei a n nou thupeluotuo; Jerusalem nunu n nou thupeluotuo.

¹⁴Niekoe ngutuo, mu nie nou rei puo neituo; nie moko[66] nha tuoi the pevilietuo; mu Jihova dzieu puo kituoko zetuoücü, tsiu puo noupfhüe puo ngumvüko perhietuoükecü sitatuo.

¹⁵Kekreilamonyü Jihovae mi nunu vortuo mu puo gura gariko khriedi mhie vortuo, puo nouphfü nu puo nouyie khashütuoü, mu puoe miü nunu mia kerhieshütuoü di.

¹⁶Kekreilamonyü Jihovae mi nunu mu zhiecha pie pete capi chütuo, mu Jihova dzie nunu siakecü kra phituo.

¹⁷U thuo u chü kemesa se tezie nu vo di puo metsuo-u nu kethau, mu thevochü mu mha rümieketako mu ciemenaketako cü kebako jü kemethatatuo, Jihova siya.

¹⁸Ae uko mhathoko mu noudoko si keba la, mu ae seyie pete mu u die kekreikecü pete pfhü kengutuoü di vorzhie; mu ukoe vor zayieu ngutuo,

¹⁹mu ae zasi puo pie uko donu shütuo, siro uko donunu ae lhiekelieko ketsepie seyieko, Tarshish, Put[67], mu Lud nu theü seyakecüko ki Tubal nu Javan nu, kepecie dzü khie kijüko a za kemeyie si mo mu a zapuzayie nguyakemoko ki shütuo, mu ukoe a zapuzayie pie seyieko donu pesishütuo.

²⁰Siro Israelkoe thoulha pie mekhou kemesa puo nu shülie di ruosuo la se voryakecü tuoi, ukoe seyie peteko donunu Jihova tsütuoü di gura geinu, mu gari geinu, kepiebouko geinu mu gada geinu mu utko geinu uko siezedzürieko ze a kemesa kijüthou Jerusalem gei vortuo.

²¹Siro ae uko huomia bu zievoko mu Levimia chüketuo la a uko zelietuo, Jihova siya.

²²Kekreilamonyü a tei kesa mu kijü kesa chüshütuoücü, a mhodzüki batuo, sümhie n nuosenuoyieko mu n za rei batuo, Jihova siya.

²³Khrülhou nunu khrülhou ketso, mu sabat nunu sabat ketso, themia pete vor a mhodzü kinu rüsuotuo, Jihova siya.

²⁴Sitse ukoe tuo pra a ngumvü di a petsouketa kesia moko mehotuo; uko khuko sialie lho, uko mi mhetalie lho, mu uko themia pete mhodzü kerütse chütatuo.