Read Angami Naga Isaya 7 Bible Online

Isaya 7 - Angami Naga bible

Isaya 7

¹Uzia nuo Jotham nuou Ahaz-e Juda mho kedi chü keba ki, Siria kediu Rezin mu Remalia nuou Peka-e Israel kediu Jerusalem whuotuoü khor, derei puo whuolie mota.

²Siro Siriae Efraim ze kezhawhe ketha David kiue sishü tse, Ahaz mu puo themiako melou[5] rüniepie ketsa nu seiboko teikhrie bu uko keniekeshü tuoita.

³Sitse Jihovae Isaya ki pu di, no mu n nuou Shear-Jashub[6] nnie pra rüzie peso-u dzüyie thela ki pfhekemenyiu lieu nu kevo chau nunu Ahaz ze kese,

⁴di puo ki hakemhie pushücie, Menuolie, sei mu zei balie, michie hie, mu mi bu thekecü do hanieha la n melou thachüta hie, Rezin mu Siria mu Remalia nuou nouyie thuo kemerie chü ba zo rei.

⁵Kekreilamonyü Siria-e Efraim mu Remalia nuou zelie di n ngukememvü mha kesuo rhü di sie,

⁶“Úko kho Juda petsou mu Jerusalem dathewa khe, sidi puo penyüpie uko vie chülie di Tabil nuou bu sünu kedi chüshü khe iba;

⁷süla Niepuu, Ukepenuopfü hakemhie puya: Süu thalie lho, mu süu chü vorlie lho,

⁸Siria tsüu sü Damaska, mu Damaska tsüu sü Rezin zo eru. (Cie hiesorouepengou nu Efraim-e tsa phata di themia chü ba motatuo.)

⁹Siro Efraim tsüu sü Samaria, mu Samaria tsüu sü Remalia nuou zo. Niekoe pele tsa thalie mo ro, nie mhakipuorei thalie lho zo.

¹⁰Jihovae Ahaz ki pu la di sie,

¹¹Jihova nie Kepenuopfü ki zasi puo chalie; süu bu Sheol kesou de soulie morei teigei de rükrielie.

¹²Derei Ahaz-e sie, a chalie lho, mu a Jihova kedolie lho, sita.

¹³Sitse Isayae sie, “Siro rünyüliecie, David kiu! Nie themia keyhukecü we mhatho moü di, nie Ukepenuopfü keyhuya me?

¹⁴Süla Niepuu puo thuo zasi puo pie nie tsütuo. Harie, rüümiapfü[7] puoe nuonipfü tuote mu thepfunuomia puo penuoshütuo, mu puo za pie Immanuel tholietuo.

¹⁵Puoe kesuou melie mu keviu keda si kepar ki, puoe dohi mu mepfhidzü cütuo.

¹⁶Kekreilamonyü u nuoyoe kesuou melie mu keviu keda silie kemonu, noe prei keba kedi nie kijü ruotatuo.

¹⁷Jihovae no mu n themiako tsiu n pfutsanuo kiu gei, Efraim-e Juda ze kekhoketa sie vor mo zoluokecü teisozha puo, Asiria kediu ze vorshütuo” sita.

¹⁸Sünhie Jihova Ijipt nu kerüboko nu keba teizieko mu Asiria kijü nu keba mepfhi la mesushütuo.

¹⁹Sitse uko pete vor koure kesouko nu mu ketsie kerkoko nu mu ronyhoko pete nu mu perituoko pete nu batatuo.

²⁰Sünhie Jihovae Asiria kediu ze di Kerü lutsa khienu tsüpfü nyiekelieu pie u tsütha mu u phimie thiewatuo, mu süu u tiemie rei thie juwatuo.

²¹Sünhie mia puo thudoyo puo mu tekuo kenie perituo,

²²mu süko thunudzü kha phikeshü la, puo dohi cütuo; kijüu nu pesha keba kehoupuorei dohi mu mepfhidzü cütuo.

²³Sünhie khubero nyie puo keba raka shekel nyie puo ma kijüko, huphienuo mu zohunyho chütatuo.

²⁴Mia puo theü mu theütsie pie di sünu vortuo, kijü pete huphienuo mu zohunyho chütaketuo la.

²⁵mu kejü pie cieyakecü kijükhru peteko nu huphienuo mu zohu keprei la nie vo motatuo; sidi peri bu tuo mu tekuo bu kedekecü kijü chütatuo.