Read Angami Naga Isaya 8 Bible Online

Isaya 8 - Angami Naga bible

Isaya 8

¹Süsie Jihovae a ki, leshü kezha puo pielie di süu gei mia bu phrülie kerüü nu “Maher-shalal-hash-baz[8] vie” ikecü thushülie;

²mu a la pelelie kesü Uria zievo-u mu Jeberekia nuou Zakaria unie bu süu zhapu chüshülie.

³Mu a siedzekesipfü ki vo, ru puo nuonipfülie di thepfunuo puo penuolie, sitse Jihova a ki, Puo za pie Maher-shalal-hash-baz chülie,

⁴kekreilamonyü unuoe “Apuo,” morei “Azuo” ikecü kielie kemo nu Asiria kediu bu Damaska kinyiko mu Samaria vie vapfü tuotatuo.

⁵Jihovae a ki pu la di:

⁶Kekreilamonyü themia hako Shiloa dzü kru mele mokezhüu lie mvü di Rezin mu Remalia nuou mhodzü michie rüsürüsate;

⁷süla, Jihovae uko gei Kerüu dzü kuo phi mu kra phikecü Asiria mu puo kevi pete se vortuo; sidi dzücha pete tshuzietuo, di puo khieko mho sietuo;

⁸süue dzüdi tuoi Juda nu kru tsutuo, ketshu kezie chü kho puo vo tsotuo; mu puoshü kelhakeshü n kijü zhau tshutuo, he-i Immanuel.

⁹Nieko themiako, kengu voliecie, di thedzükoutacie; rünyüliecie, nie ketsekethou rüna pete; nie chiephalie di thedzükoutacie; nie chiephalie di thedzükoutacie!

¹⁰Keze mha rhükekiecie, derei süu kemethuo chütatuo; diepushücie, derei süu thalie lho, Ukepenuopfüe hie ze tuokecü la.[9]

¹¹Jihova puo dzie kuo phikecüu pie a geishü di a bu themia hako cha nu tuo hienu di a ki hakemhie pushü:

¹²Themia hakoe pekhrerüshü üdi puyakecü pie pekhre rüchü üta hie, mu ukoe preiyakecüko prei, morei merieta hie.

¹³Derei krodiko Jihova, nie puo üse mesa ütuo; nie puo preiyakecüu chülie.

¹⁴Mu puoe kemesachü puo, mia petsoukecü tsie puo chütuo, kekreilamonyü Israel ki kenienie la thephi kemesü puo mu Jerusalempfüko la kebie puo mu ciephrie puo chütatuo.

¹⁵Mu uko mia kekra u phi mesütuo; uko tetsu di protatuo; mu uko malie di tezetatuo.

¹⁶Zhapuu phalie, mu a siedziko donu kepethadieu mohor vüwalie.

¹⁷Ae Jihova pfhe batuo, mu a puo khremerü batuo; Jakob ki nunu puo zie kevie kebau.

¹⁸Harie, a mu Jihovae se a tsükeshü nuonuoko ha krodiko Jihova Zion kijüthou gei bayakecüu kinu kepar Israelko donu zasi mu kethekhrükecü kro puo zotuo.

¹⁹Mhanuü mia n ki, “Themoumia mu thuophimia ruo mu mecu kebako rüsacie” ilie ro, themiakoe u rhuoko rüsa zhü mo me? Kerheimia la kesiako rüsa zhü me?

²⁰Kepetha mu ketarhoketuo la?” si. Derei hakemhie kepumia teiso kevor ngu lho tou zo.

²¹Ukoe kijüu pfüthe votuo, kemezhie se mu merü di; mu ukoe merülie ro, uko nou meyie di uko kediu mu uko rhuoko rüsetuo. Ukoe uko zie kereipie pesotsa vatuo,

²²mu ukoe kijüu mehoshütuo, derei ukoe kemezhiekecü mu kezei, meyhumezhiekecü, thedzükezei rübei ngutuo; mu uko nepie zeibouicüu nu shüwatuo.