Read Angami Naga Isaya 9 Bible Online

Isaya 9 - Angami Naga bible

Isaya 9

¹Derei meyhumezhie kebako gei we thedzükezei balie lho. Thiedzü puoe Zebulun mu Naftali kijü pie kezhasewa, derei puoe kenuotsa dzükezha cha, Jordan khie lutsa, seyieko nu Galil ha bie ketherhushütuo.

²Kezei nu ketuo themiakoe kezie kezha puo nguwate; kijü zeibouikecü puo nu ketuoko gei kezieu zieshüte.

³Noe seyieu chü pekruoshü, noe süu kenei bie pekrashü; uko lieyie ki u neiyakecü mhie n mhodzünu uko neizhie, mia mhayie keza di u nei keba tuoi.

⁴Uko pie vocieu, mu uko bouka gei seiu uko kepese seiro-u, noe bietshewaketa la Midian zha nhie tuoi di.

⁵Terhümiavimia se kede voketa phikou pete, mu thezie nunu kezipie ketuo pfhenei pete seidei tuoi mi nu thewatuo.

⁶Nuo puo penuopie u tsüshüte, thepfunuomia puo pie u tsüshüte, mu kekuo pie puo bouka gei tuo; mu puo za thopie Mharhükesi Ungo-u, Kekuo Kepenuopfü, Kechachie Puou, Vitho Kedinuou chütuo.

⁷Puo sorkari kruo sei zhü zotuo, mu David kedibau gei mu puo kedirüvie nu vitho puo thela balie lho zocü la. Puoe kethoca mu kemiatho se süu chüshü mu se balietuo; thie yawinu vo kechachie ketso. Krodiko Jihova shürheiu thuo hau chütuo.

⁸Niepuu Jakob petsoukecü die puo ketseshü ru süu Israel gei pfüta;

⁹mu themia pete süu situo, Efraim mu Samaria nu kelhouko, derei u nou kemiako mu kemiavi di ukoe sie;

¹⁰“Itako mete, derei we ketsie kevi pie chü lalietuo; khrabvüboko wiwate, derei we süko sounu sedarboko pelhou lalietuo” iba.

¹¹Süla Jihovae ngumvümia pesepie[10] uko petsoushü, mu ngumvüko nou chüshü,

¹²Siriako niathutsa mu Filistinko niakratsa, mu uko mekuopie Israel mezulie. Sishierei puo nouyie rüdita mo; tsie rei puo dzie yhapie ba zo.

¹³Themiakoe rürei uko vükeshüu kitsa puo ki vor mo, morei krodiko Jihova pfhü mo.

¹⁴Süla Jihovae Israel gei puo tsü mu puo mei, Kukuo co mu puonyü khunhievachü dawate,

¹⁵Phichüko mu therhumiako sü puotsüu, mu ketijü kepetha siedzekesiko sü puo meiu;

¹⁶Chathamia thuo themia hako chatha kekrü, mu ukoe uko chatha zeketuoko keboushü.

¹⁷Süla Jihovae uko khriesako ngumezhie mote, morei merünuoko mu samipfüko ngumezhie mote, uko pete Ukepenuopfü prei mo mu kesuo kechümia phre, mu uko tie pete kemelo die pu phrecü la. Hai shierei puo nouyie rüdita mo, mu puo dzie yhapie ba zo.

¹⁸Kelhiemiae mi mhie tuya, huphienuo mu zohuko the pejüwaya; süue ketsa kesouko thewaya, sidi mikhu rüve zophrietshü tuoi rüzipfü khotaya.

¹⁹Krodiko Jihova noupfhüu nunu kijüu thewa, mu themiakoe miu la seidei mhieta, miapuorei kekreiu khashü mo.

²⁰Ukoe u zatsa nu cü vo, derei pevülie mo, mu uko vitsa nu mezulie, derei u kelhuo chülie mo; uko thuo kicükinumia chü cü.

²¹Manasseh-e Efraim rhacülie, mu Efraim-e Manasseh rhacülie, mu unie keze Juda petsou, Hai zorei puo nouyie rüdita mo, mu puo dzie yhapie ba zo.