Read Angami Naga Levimiako 1 Bible Online

Levimiako 1 - Angami Naga bible

Levimiako 1

¹Jihovae Mosa kie, mu kehou pfhekiu nunu puo ki pu sie:

²Israelmiako ki pu di uko ki haishülie: Themia kehoupuorei Jihova ki kirinuo khashü ro, u thukro morei tekuo kroko donu nu se vor morosuo.

³Puoe kethe ruosuo puo khashütuoü di thukro nunu se vor ro, pedo ciewa kemo puo tuo, puoe kehou pfhekiu kikha ki nu süu khashütuo, Jihova mhodzü puoe lieliekesü chüketuo la;

⁴puoe puo dzie pie kethe ruosuo khakeshüu gei shütuo mu süu puo la kejo vakelie puo chü di lielietuo.

⁵Sitse puoe Jihova mhodzünu thudo-u dukhrilietuo; mu Aron nuo zievokoe puo zie pielie di kegepie kehou pfhekiu kikha ki keba ruosuobau puoke pete vashütuo.

⁶Mu puoe kethe ruosuo la khakeshüu zhü lolie di süu khrie petselietuo;

⁷Aron zievo-u nuonuoko ruosuobau gei mi chüshütuo, mu sei pie menuo di mi mhogei khashütuo;

⁸Aron nuo zievokoe chükhrieko, puo tsüu, mu puo shuo pie ruosuobau gei mi nu seiko mho gei khashütuo;

⁹derei dzü pie puo rieko mu puo phiko khrüwatuo. Siro zievo-u süko pete ruosuobau geinu thewatuo, kethe ruosuo mi nunu khakeshü puo chü di, Jihova mhodzü ki puore kethengu puo chütuo.

¹⁰Puoe kethe ruosuo la tekuo morei temvü kro nunu khashü ro, puoe puochü ciewa kemo puo khashütuo.

¹¹Puoe ruosuobau tsei pesotsa, Jihova mhodzünu nu süu dukhrituo, mu Aron nuo zievokoe puo zie kegepie ruosuobau khie lutsahatsa vashütuo.

¹²Mu puo süu khrie petselietuo, puo tsü mu puo shuo sa di, sidi zievokoe süko pie ruosuobau gei miu mhogei seiko gei shülietuo;

¹³derei puo rieko mu puo phiko dzü pie khrüwatuo süu kethe ruosuo puo. Sidi zievo-u bu ruosuobau geinu themo pete thepie mikhu chüwatuo; süu kethe ruosuo, mi pie ruosuo khakeshü, Jihova ki puore kethengu puo chütuo.

¹⁴Puoe Jihova ki pera pie kethe ruosuo khakeshü puo chü üro, puoe mekhru morei paruonuo se vor khashütuo.

¹⁵Zievo-ue süu se ruosuobau nu vortuo, mu puo tsü kereithepie ruosuobau geinu süu thetuo; mu puo zie pezupie ruosuobau tseitsatie shüwatuo,

¹⁶Puoe puo vopho mu puo rieko kelhoupie ruosuobau tsei niathutsa, mige banu shüwatuo;

¹⁷puoe puochü ciekhoushütuo, derei ciethewalie lho. Mu zievo-u süu pie ruosuobau geinu thepie mikhu chüwatuo, miu nu sei mho geinu; süu pie kethe ruosuo puo mu mi se ruosuo khakeshü puo tuo, Jihova mhodzü ki puore kethengu puo chütuo.