Read Angami Naga Levimiako 10 Bible Online

Levimiako 10 - Angami Naga bible

Levimiako 10

¹Sitse Aron nuo Nadab mu Abihu unie mharekethengu kethe khou unie tse selie, di mi pie sünu shülie, mu mharekethengu pie sünu shülie, di mesakemo mi pie Jihova mhodzü khashü, puoe unie bu chünu diekhashü mo.

²Sitse Jihova mhodzünu nu mi par di unie thepejüwa, di unie Jihova mhodzünu nu siata.

³Sitse Mosae Aron ki, “Jihova pukeshüu sü hau zo; ‘A a penuo kebako geinu, ae mesa zoücü thashütuo, mu themia peteko mhodzünu a chü pezhashütuo’ ” si. Mu Aron-e kemekrie bata.

⁴Mosae Aron nieu Uziel nuonie Mishael mu Elzafan kielie di unie ki “Penuo vorlie, di nnie siezedzürieko thechü kemesau mhodzünu nu tou pie casie pratalie” sishü.

⁵Süla unie-e penuo vor di Mosa pukeshü mhie unie boulie nunu uko toupie pra casie shüwa.

⁶Sitse Mosae Aron mu puo nuonie Eliazar mu Ithamar ki, “Nie tsütha bie kenyha hie, mu nie pfhenei cierha hie, nie siata rei si mo mu, mu mechü kehou pete gei noupfhü vorta rei si mo mu; derei nie siezedzürieko, Israel kinumia pete bu Jihova mi ketsepie thekewau krü kraliecie.

⁷Mu kehou pfhekiu kikha nunu pra hiecie, nie siata rei si mo mu; kenhekecü Jihova tier-u n gei bakecü la” sishü. Siro ukoe Mosa die kemhiei chülie.

⁸Mu Jihova Aron ki:

⁹No mu n nuo thepfuko rei kehou pfhekiu nu lekecü ki khubezu morei zu kekuo puorei krie hiecie, nie siata rei si mo mu; nie nuosenuoyie pete nu hau pie thezho puo chütuo.

¹⁰Nie-e kenyü mu kenyükemo-u mesa mu mesakemo-u si kekrei morosuo;

¹¹mu noe Jihovae Mosa geinu thezho khapie Israelmiako ki pukeshü peteko pie uko petha morosuo.

¹²Sitse Mosae Aron mu puonuo kinu keba nie Eliazar mu Ithamar unie ki pukecü: “Jihova ki, mi pie ruosuo khakeshü nu thou peshapie kebau selie, di ruosuobau khie kinu khreiü shükemo süu cülie, süue mesathocü la;

¹³nie süu kemesachü nunu cütuo, kekreilamonyü süue Jihova ki mi pie ruosuo khakeshü nu n ya mu n nuonuo ya zocü la; hakemhie di a ki diekhakeshü la.

¹⁴Derei puokhouzü pie sie kegekecüu mu puodo khakeshüu we no thechü kemesa kehourapuo nu rei n nuo thenu rei thepfu rei ze cülie vi; kekreilamonyü Israelko vitho ruosuo khakeshü nunu süko pie n ya mu n nuonuo ya chüshüwaketa la.

¹⁵Puodo khakeshüu mu puokhouzü pie sie kegekeshüu ukoe puoshuo pie mi chü di ruosuo khakeshüko sa se vortuo, sidi Jihova mhodzünu pie sie kegekecü ruosuo chü di kegetuo; mu süu n vie mu n nuo thepfuko vie zotuo, kechachie nieko ya chütuo; Jihova diekhakeshü tuoi,” sishü.

¹⁶Sitse Mosae kephouma ruosuo khakeshü temvüu dze ketso menuo sie ru harie, süu thewata! Süla puoe Aron nuo baluokecü nie Eliazar mu Ithamar unie gei puo nei mota, di pukecü,

¹⁷“Kidi nnie kephouma la ruosuo khakeshüu kemesa thechüu nunu cülie mo ga? Süue mha kemesatho puo mu nie bu mechü kehouu kejo pieu chüwaketuo la kha nie tsüshü, Jihova mhodzünu uko la thephou mesakecü chüketuo la.

¹⁸Harie, süu zie se kemesachüu nu se ler mo ze. A diekhakeshü mhiei, nie kemesachü nunu süu kecü mese tou zo” si.

¹⁹Sitse Aron-e Mosa ki, “Harie, thie nu ukoe kephouma ruosuo mu kethe ruosuo khapie Jihova mhodzünu shü zo; derei mha haikecü a gei vorte! A thie kephouma ruosuou cülie ro, Jihova mhingu ki puotou zotuo me?” sita.

²⁰Mu Mosae süu sishü tse puo medota.