Read Angami Naga Levimiako 11 Bible Online

Levimiako 11 - Angami Naga bible

Levimiako 11

¹Jihovae Mosa mu Aron unie ki:

²Israelmiako ki pushücie: Kijü gei nhachü ketuoko donu nie-e khunuo rheiketuo hako cülie vi.

³Khunuoko donu puomou pro di puo ca suokecü pete nie-e cülie vi.

⁴Derei puo ca suokecüko morei puomou rükokecüko donu, nie hako cülie lho: ut-e puo ca suoya, derei puomou rüko mo, süla nie la mesa mo.

⁵Mu konuo, puo ca suoya, derei puomou pro mo, süla nie la mesa mo.

⁶Zogazu, puo ca suoya, derei puomou pro mocü la, nie la mesa mo.

⁷Siro thevo puomou pro mu pra ketsieya derei puo ca suo mo, süla nie la mesa mo.

⁸Nie-e süko chü cülie lho, mu uko kesia mo bielie lho, sükoe nie la mesa mo.

⁹Nie-e hako cülie vi, dzü nu keba pete. Dzükezha nu keba puoshü mu puolhe kenyi pete, dzükezha nu morei kerü nu shierei.

¹⁰Derei dzükezha nu morei kerü nu shierei, dzü nu kepekro morei lhouketuo kehoupuorei puoshü mu puolhe kejü khe nie la kenyü zotuo.

¹¹Süko nieko bie kenyü, nie uko chü cülie lho, mu uko kesia mo nie bie kenyü.

¹²Dzü nu keba puoshü mu puolhe kejü pete nie cü kenyü.

¹³Mu perako donu hako bie kenyütuo. Süko cü kenyü; süko kerütse zo: süko tsüü, chürhaü, ketsavünho,

¹⁴khuo tekecü moupfü, mouvi kekreikecü pete;

¹⁵shüzha kekreikecü pete;

¹⁶Ostrik, teizei rümoupfü, dzükezha radipfü, rümou kekreikecü;

¹⁷vükhruo, kormorantpfü, puchüü,

¹⁸dzürapfü, rayha nu putshüü,[2]

¹⁹zemvüu, huniepfü kekreikecü, buorhü mu haho.

²⁰Khunuo kecü puoshü chü di puo phi dia kenyi pete nie cü kenyü.

²¹Derei puoshü kepfü puo phi dia kenyi khunuo kecüko donu puo phi kere nyi di puo phi se kijü gei proulieketuo bakecüko cülie vi.

²²Nie hako cülie vi: kuprie kekreikecü, pfüteo kekreikecü, nuosakrü kekreikecü, mu kusoü kekreikecü.

²³Derei puoshü kepfü khunuo kecü puo phi dia kenyi kekreiko we nie cü kenyü zo.

²⁴Siro hako geinu nie mesa motatuo; kehoupuorei uko kesiamo bie ro thevatie ketso mesa mo batuo.

²⁵Mu kehoupuorei uko kesiamo biekecümia puo pfheneiko menyiwa di thevatie ketso mesa mo batuo.

²⁶Khunuo kehoupuorei puomou pro derei puo phi pro mo morei puo ca suokemo-u nie la mesa mo; kehoupuorei süko kebieu mesa motatuo.

²⁷Mu puo phi dia se cha tuoyakecü khunuoko donu puo phizhü pie tuoyakecü pete, nie la mesa mo; kehoupuorei uko kesiamo biekecüu thevatie ketso mesa motatuo,

²⁸mu kehoupuorei uko kesiamo biekecüu puo pfhenei menyiwa di thevatie ketso mesa mo batuo; nie süko bie kenyü.

²⁹Mu kijü gei khunuo goutuoyakecü hakoha nie la mesa mo: zogazu, zukhranuo, tephou kekreikecü,

³⁰kipfhenuo, keso nu khuokerie, teile, huoca teile, mu sokru.

³¹Hako goutuoyakecü pete donu nie la mesa mo; uko siaketa sie uko kebiemia kehoupuorei thevatie ketso mesa mo batuo.

³²Mu uko kehoupuorei siaketa ki tetsu mha kehoupuorei va ro süu mesa motatuo, puo thuo sei pie kechü vie rei morei pfhemenei morei chüzhü rei morei likhuo rei, se mha kehoupuorei chüyakecü vie rei, süu pie dzü nu shüwa morosuo, sidi süu thevatie ketso mesa motatuo; süsie süu mesatatuo.

³³Mu uko kehoupuorei te rünyoli puo nu tsu ro, sünu keba pete mesa motatuo, sidi nie süu biephrowatuo.

³⁴Mu süu nu keba, kecüca cülie kevi pete, dzü puo gei kevor khe, mesa motatuo; mu li sikecü nunu par mhavakecü pete, mu dzü krielie kevi li sikecü nu keba pete mesa motatuo.

³⁵Mu kesiamo kehoupuorei te tsu mha kehoupuorei va ro, süu mesa motatuo; miphu shierei, mibou shierei süu biephro babawatuo; süko mesa mote, mu nieko la mesa motatuo.

³⁶Derei dzüluo morei dzübou zo we mesa zotuo; derei uko kesiamo kenyü khe mesa motatuo.

³⁷Mu uko kesiamo kehoupuorei tsia prutuoü keba tsiau gei tetsu va zo rei süue mesa zotuo;

³⁸derei tsiau dzü pie petsewa, di kesiamo kehoupuorei te sügei tsu ro, süu nie la mesa mote.

³⁹Mu nie-e cülie kevi khunuo kehoupuorei siata, di kesia mo biekecüu thevatie ketso mesa motatuo,

⁴⁰puo kesia mo cükecüu puo pfhenei menyiwa di thevatie ketso mesa mo batuo; kesia mo piekecüu puo pfhenei menyiwa di thevatie ketso mesa mo batuo.

⁴¹Khunuo kijü mho gei gouketuo khe nie la mesa mo; süu cü kenyü.

⁴²Puo vadi se rütsieyakecü khe, phi diako pete se tuoyakecü khe, morei puo phi kekra kenyi khe, gouyakecü khunuo kijü mho gouketuo pete, nie-e cülie lho; ukoe mha kerütse zokecü la.

⁴³Nie gouyakecüko pie nie thuo nie bie kerütselie lho; mu nie süko pie nie bie perhulie lho, nie mesa mota rei silie lhocü la.

⁴⁴Ae Jihova nie Kepenuopfü zocü la; süla nie chü kemesalie, di mesaliecie, ae mesa zocü la. Nie-e kijü mho gouyakecü puorei pie nie thuo nie bie perhulie lho.

⁴⁵Ae nie Jihova chütuoü di Ijipt kijü nunu nie ze parkeshü Jihova zokecü la; süla nie-e mesaliecie, ae mesa zocü la.

⁴⁶Chü mu pera mu lhouketuo khunuo dzü nu meletuoyakecü khe mu kijü gei goutuoyakecü khunuo pete la thezho sü hau zo,

⁴⁷mesa kemo mu kemesa, mu kerhei khunuo cülie kevi mu kerhei khunuo cü kenyücüko kho kekreishüketuo la.