Read Angami Naga Levimiako 13 Bible Online

Levimiako 13 - Angami Naga bible

Levimiako 13

²Mia puo puo chü gei kerümie morei kepou puo morei puopfü puo parta, di mpa kechükhuu puo gei bata ro, puo ze Aron zievo-u ki morei puo nuo zievoko mia puo ki votuo.

³Sitse zievo-u süu chü gei kechüpfüu mehotuo, mu kechüpfü nu thako krata, mu kechüu puozhü ki soukuokecü nguta ro, süu mpa kechü puote; zievo-ue süu mehowata ro, puoü mesa motaü di pushüwatuo.

⁴Derei puochüu gei thepfüu kra, mu puozhü ki soukuo mo liro mu süu nu keba thako krata mo ro, zievo-ue mhachü keba themiau khapie zha thenie batuo,

⁵sidi zievo-ue zha thenie nhie puo meho latuo, mu puo mhi ki kechüu khalieketa mhie mu puo kechüu puozhü gei kezata mo ro, zievo-ue zha thenie puo kha la sapie batuo;

⁶mu zievo-ue zha thenie nhie puo meho latuo, mu kechüpfüu vilietazhü mu kechükhu ta puozhü gei kezata mo ro, zievo-ue puoü mesa zoükecü pushüwatuo; süue kepou puo zo, süla puoe puo pfhenei menyiwa di mesatatuo.

⁷Derei puoe mesataü di puo thuo puo pie zievo-u pekiekewa sienu puo gei kepouu puozhü gei keza vota ro, puoe zievo-u mhodzünu la vor di puo pekie latuo;

⁸zievo-ue puo mehotuo, mu pou kepar-u puozhü gei kezata ro süue mpa kechüte.

⁹Mia puoe mpa chülie ro, puo ze zievo-u ki vortuo.

¹⁰Mu zievo-ue puo mehotuo di puozhüu gei kerümie puochüu nu kekra bata di puomieko rei kra bata ro, tsiu kerümieu nu chüra chü ba ro,

¹¹süue puo mo gei puozhü nu mpakechü kewe puote, mu zievo-ue puoü mesa mo üdi pushüwatatuo; puo kha lapie balie lho, puo mesa moketa la.

¹²Mu kechüu puozhü gei parta, di kechüu thuo puozhü pete puo tsü nu ke puo phi ketso tshuketa, sidi zievo-u bu ngu tse,

¹³zievo-ue puo mehotuo, mu kechüu thuo puo mo pete zepfülieta ro, puoe kechüu nunu mesataücü pushüwatuo; süue pete krata, mu puoe mesate.

¹⁴Derei puo gei chürhei parta ro, puoe mesa motatuo.

¹⁵Mu zievo-ue puo chü chürheiu mehotuo, sidi puoü mesa moükecü pushütuo; puo chü chürheiue mesa mo, süue mpakechü zocü la.

¹⁶Derei puo chü chürheiue rüdi vo krata ro, puoe zievo-u ki vortuo;

¹⁷mu zievo-ue puo mehotuo, mu puo kechüue kra parta ro, zievo-ue kechüu üse mesataü pushütuo; puoe mesata zo.

¹⁸Siro mia puoe puo mo gei tichü puo meneta.

¹⁹Mu tichüu chü nu rümie di kra parta morei puo pfü kra meriedakecü puo par ro, süu pie zievo-u pekieshütuo,

²⁰sidi zievo-ue süu mehotuo, süu puozhü ki soukuota mu puomieko krata ro, zievo-u puoü mesa mo ücü pushütuo. Süue mpakechüute, tichüu nunu parte.

²¹Derei zievo-ue süu meho di, sünu puomie krata mo, mu puozhü ki soukuota mo, mu zeitie ro, zievo-ue zha thenie puo khapie batuo;

²²sidi süu puo zhü geinu chü keza vota ro, zievo-ue puoü mesa mo ücü pushüwatuo; süu kechü kesuote.

²³Derei puopfüu chü se kekreira vota mo ro, süu tichüpfü zo; mu zievo-ue puoü mesa zoücü pushüwatuo.

²⁴Morei, mia puo mo gei mi kethepfü puo ba mu kethepfüu nu chürhei puo puopfü chü di kra merieda morei krata ro,

²⁵zievo-ue süu mehotuo, mu puopfüu nu puomieko kra parta mu puozhü ki soukuokecü nguta ro, süu mpakechüte, süue thekeshü nunu parte, mu zievo-ue puoü mesa motaükecü pushütuo; süue mpakechü puote.

²⁶Derei zievo-ue süu meho di puopfüu nu puo mieko krata mo, mu uzhü ki soukuota mo, derei vitazhü ro, zievo-ue zha thenie puo khapie batuo.

²⁷Mu zievo-ue zha thenie nhie puo mehotuo, süue puozhü gei keza vota ro, zievo-ue puoü mesa moü pushüwatuo; süue mpakechü puote.

²⁸Derei puopfüue thechü puo nu sie kekreira vota mo, derei süu vi partazhü ro, süue kethepfüu nunu rümie keba zo, mu zievo-ue puoü mesa zoücü pushüwatuo; süue kethepfü zocü la.

²⁹Thepfumia morei thenumia puoe puo tsü gei morei puo tiemie gei kechü puo bata ro,

³⁰zievo-ue süu mehotuo; mu süue puozhü ki soukuota, mu puomieko mehe mu meseta ro, zievo-ue puoü mesa moü pushüwatuo, süue mepfhe puote, utsü morei utiemie gei mpakechü puota zo.

³¹Zievo-ue kemeso kechüu meho, di süu puozhü ki soukuo mokecü mu puomie ketei sünu ba mo ro, zievo-ue kemeso chü kebau zha thenie khapie batuo,

³²zha thenie nhie zievo-ue puo mehotuo; mu mesokecüu kezata mo, puomie mehekecü ba mo, mu kemesopfüu puozhü ki soukuo mo ro,

³³puoe puo tha thiewatuo, derei kemesopfüu we thielie lho; mu zievo-ue kemeso chükecüu khapie zha thenie sa batuo;

³⁴di zha thenie nhie zievo-ue kemesopfüu mehotuo, mu kemeso-u puozhü nu keza vota mo mu puozhü ki soukuota mokecü ngu ro, zievo-ue puoü mesa zoükecü pushütuo; mu puoe puo pfheneiko menyiwa di mesatatuo.

³⁵Derei puo pfhenei menyikewa sie kemeso-u keza vota ro,

³⁶zievo-ue süu mehotuo, mu kemeso-u puozhü gei keza vota ro, zievo-ue puomie kemehe pfhü ba morei vi, puoe mesa mota zo.

³⁷Derei puo mhi ki kemeso-u khalie di vita, mu süu puomie ketei the lata ro, kemeso-u menete, puoe mesate, mu zievo-ue puoü mesataücü pushüwatuo.

³⁸Thepfumia morei thenumia puo, puozhü gei puopfü huo kekra bata ro,

³⁹zievo-ue süu mehotuo, mu puozhü kra cacü ro, puozhü nu pro kepar zo, puoe mesa zo.

⁴⁰Mia puoe puo tsütha pieta ro, puo tsüpiemia puote, derei puoe mesa zo.

⁴¹Mu mia puoe puo teikhie mu puo nyietei nunu puotha pieta ro, puoe puo teikhie piete, derei puo mesa zo.

⁴²Derei tsüpie gei morei teikhie kepie gei kra meriedakecü kechü puo bata ro, süue puo tsü gei morei puo teikhie gei mpakechü parkezhüute.

⁴³Sitse zievo-ue puo mehotuo, di puo tsü kepie gei morei puo teikhie kepie gei kechü rümiekecüu kra merieda di puochü gei mpakechü parkecü mhie ro,

⁴⁴puoe mpakechümia puote, puoe mesa mote, zievo-ue puoü mesa moücü puwa morosuo; puo kechüue puo tsü gei bate.

⁴⁵Mpakechüu bu pfhemenei kerürha setuo, mu puo tsütha bu rütha nyhanyhatuo, mu puo bu puo menie pesotsa whelie di, “Mesa mo, mesa mo” idi shietuo.

⁴⁶Kechüu puo gei kebachie puoe mesa mo di batuo, puoe mesa mo zo; puoe casie nu puo rübei di thechü puo nu lhoutuo.

⁴⁷Mpakechü kemhie pfhenei puo rümho rüciechü bata ro, pfheneiu chümie morei linen shierei,

⁴⁸chümie morei linen pfhedo-u jürei nu morei puo mephi nu rei, morei chüzhüu nu morei chüzhü pie chükecü kehoupuo nu shierei,

⁴⁹kechükhu kemhie pfhe nu pejoda morei meriedakecü nguta ro, süue mpakechü mhiete mu süu pie zievo-u pekietuo.

⁵⁰Mu zievo-ue kechüu mehotuo, di kechü baketau khapie zha thenie batuo;

⁵¹sidi zha thenie nhie puo kechükhu-u mehotuo, sidi suoketa khu-u pfhe nu keza vota ro, puo jürei nu puo mephi nu morei chüzhü nu, chüzhüu pie kehoupuo chüya rei kesuoue puokhu mpakechü kereute; süla mesa mote.

⁵²Puoe pfheneiu thewatuo, kechüu puo jürei nu morei puo jüdo nu bata shierei, chümie morei linen shierei morei chüzhü pie kechü kehoupuorei, süue mpakechüu kemhie kereute, mi nunu süu thewatuo.

⁵³Mu zievo-ue meho di pfheu puo jürei mu puo mephi nu morei chüzhü pie kechü nu rei keza vota mo ro,

⁵⁴zievo-ue mia bu puokhu puo gei keba pfheu menyiwanu di diekhashütuo, sidi puoe zha thenie süu kha sapie batuo,

⁵⁵zievo-ue puokhu puo gei kebau menyikewa sie mehotuo, mu suoketa pfüu puorhi rüdita mu, kesuoue kra keza vota mo shierei, süu mesa mo zo; nie-e süu mi nunu thewatuo, mpa rhi mhie keba pfüu puo sietsa morei puo dzütsa shierei.

⁵⁶Derei zievo-ue süu meho di pfheu menyikewa sie puo kerümho-u mesa vota ro, puoe pfheu morei chüzhüu morei puo jürei morei puo mephi nunu puopfüu cierhawatuo;

⁵⁷mu pfheu gei, puo jürei morei puo mephi shierei süu la parta ro, süu kezatazhie; nie-e mi pie kechü puo gei kebau thewatuo.

⁵⁸Derei nie pfhe menyikewa sie puokhu puo gei baketau puo jürei morei puo mephi morei chüzhü pie kechü kehoupuo shierei vakenie süu menyiwata di, süu mesatatuo.

⁵⁹Chümie morei pfhe puo jürei morei puo mephi morei chüzhü pie kechü kehoupuo nu shierei baketau la thezho hau zo, mesa mu mesakemo silieketuo la.