Read Angami Naga Levimiako 14 Bible Online

Levimiako 14 - Angami Naga bible

Levimiako 14

²Mpakechü chü kemesakecü zha nhie la thezho-u hau zo. Puo ze zievo-u ki vortuo;

³mu zievo-ue razhüchü nunu pratuo, di zievo-ue puo mehotuo.

⁴Sidi mpakechüu vilie di mesata ro, puo chü kemesaketuo zasi la zievo-ue puo bu pera kemesa kerhei kenie, sedarsei, kelo kemerie mu hisop se vor nushütuo;

⁵zievo-ue uko bu dzübou puo nu dzü kemesa keba mho gei peranie puo dukhrilie nu shütuo.

⁶Puoe pera kerheiu sa, süsie sedarsei, kelo kemerie, mu hisop sa, di süko pie dzüsa mho geinu dukhrikelie perau zie nu seshütuo;

⁷sidi puoe va thenie süu kegepie mpakechü nunu chü kemesatuoü kebau vatuo; süsie, puoe puo üse mesataü pushütuo, mu pera kerheiu khapie phouyo nu shüwatuo.

⁸Mu puo chü kemesatuoü kevor-u bu puo pfhenei menyiwatuo, mu puomie pete thiewa mu dzü rüluwa di mesatatuo, süsie puoe razhüchüu nu vortuo derei zha thenie puo bu pfheki chazou batuo.

⁹Sidi zha thenie nhie puo tsütha pete thiewatuo; puo tiemie mu puo mhimie mu puomie pete thiewatuo; sidi puoe puo pfhenei menyiwa, di dzü nunu puo mo khrüwatuo, di puoe mesatuo.

¹⁰Zha thetha nhie puoe tekuochü ciewa kemo kenie mu cie puo kuonuo puoü kemesa puo, mu ruosuo thou kevitho efa ker za se tier sa kereilie di mu tier pou puo pielietuo.

¹¹Mu puo chü kemesakecü zievo-ue chü kemesaketuo themiau mu mha hako pie kehou pfhekiu kikha ki Jihova mhodzünu shütuo.

¹²Mu zievo-ue tekuochü yopuo pielie di kejo ruotho la tier pou[3] huo sa di khashütuo, sidi pie sie kegekecü ruosuo la Jihova mhodzünu sünie piesieshütuo;

¹³puoe kephouma ruosuo mu kethe ruosuo dukhriyakecü kemesachüu nunu tekuo dukhrituo, kejo ruosuou sü kephouma ruosuo tuoi, zievo-u vie zocü la, süu mesatho zo.

¹⁴Zievo-ue kejo ruosuou zie huoyo pielietuo, sidi pie puo chü kemesatuoü kevor-u nyietshe puo zatsa, puo dziekrü thezatsa mu puo phikrü thezatsa kenheshütuo.

¹⁵Siro zievo-ue tier pou [4] puo pielie di rupie puo thuo puo dziezhü thevitsa shülietuo,

¹⁶di puo dziekinuo puo zatsa pie puo vitsa keba tier-u kethulietuo, sidi puo dziekinuo pie tier huoyo bielie di va thenie kegepie Jihova mhodzünu shütuo.

¹⁷Mu zievo-ue puo dzie nu tier peshapie keba huoyo bielie di pie chü kemesatuoü kevor-u nyietshe thezatsa, puo dziekrü thezatsa mu puo phikrü thezatsa kenheshütuo, kejo ruosuo zieu mho gei shütuo.

¹⁸Siro zievo-u dzie nu peshapie keba tier-u puo chü kemesatuoü kevor-u tsü kenheshütuo. Süsie zievo-ue puo la Jihova mhodzünu puo phousou chüshütuo.

¹⁹Mesa kemo nunu chü kemesaketuo la zievo-ue kephouma ruosuo-u khashütuo.

²⁰Mu kenuotsa puo kethe ruosuo-u dukhrituo. Siro zievo-ue kethe ruosuo mu lhacülhale ruosuou pie ruosuoba gei shütuo. Hamhie di zievo-ue puo la phou mesawatuo, di puo mesatatuo.

²¹Derei puoe mhajü di mha süde khashü re ro, puoe puo phousou chüketuo la tekuochü yopuo pfhülietuo, kejo ruosuo chü di pie sie kegeketuo la, mu thou kevitho efa ker za puo tier sa di kereipie lhacülhale ruosuo chüketuo la, mu tier pou puo satuo;

²²siro mekhru kenie morei paruonuo kenie rei sa, puo chülie kevi le di, puo kephouma ruosuo la mu kekreiu kethe ruosuo la.

²³Mu zha thetha nhie puoe puo chü kemesaketuo la süko se zievo-u ki vortuo, kehou pfhekiu kikha ki Jihova mhodzünu;

²⁴zievo-ue kejo ruosuo tekuonuou mu tier pou puo-u[5] pielietuo, sidi zievo-ue pie sie kegekecü ruosuo la Jihova mhodzünu piesieshütuo.

²⁵Mu puoe kejo ruosuo kuonuou dukhrilietuo, siro zievo-ue kejo ruosuou zie huoyo pielie di puo chü kemesatuoü kevor-u nyietshe puo zatsa, puo dziekrü puo zatsa, mu puo phikrü puo zatsa vashütuo.

²⁶Siro zievo-ue tier huo rupie puo thuo puo dziezhü thevitsa shülietuo;

²⁷di puo dziekinuo puo zatsa pie puo dzie thevitsa keba tier-u huo bielie di va thenie kegepie Jihova mhodzünu shütuo;

²⁸zievo-ue puo dzie nu keba tier huo pie puo chü kemesatuoü kevor-u nyietshe puo zatsa, puo dziekrü thezatsa mu puo phikrü puo zatsa shütuo, kejo ruosuo zieu pie kenhekeshü chüu nu,

²⁹zievo-u dzie nu tier peshakebako pie chü kemesatuoü kevor-u tsü gei shütuo, Jihova mhodzünu puo phou chü kemesaketuo la.

³⁰Mu puo chülie kevi mekhru nie morei paruonuo nie,

³¹puo[6] pie kephouma ruosuo la mu puo pie kethe ruosuo la khashütuo, lhacülhale ruosuou sa di; mu zievo-ue chü kemesakebau la Jihova mhodzünu puo phou chü kemesakecü ruosuou khashü tuo.

³²Mpachükewau chü kemesaketuo la ruosuo khakeshü pfhü tsolie kereko la rei thezho-u sü hauha zo.

³³Jihova Mosa mu Aron unie ki:

³⁴Niekoe a khapie nie tsü di nie bu nie vie chütuoükeba Kanan kijü nu vorlie, mu nie vie chülieketa kijüu nu ae mpakechüpie ki puo nu shü ro,

³⁵ki niepuu vor di zievo-u ki, “A kinu kechü puo baketa mhietelie” isituo.

³⁶Sitse zievo-ue uko bu kiu kemethuoshünu di diekhashütuo, zievo-u vo di kechüu mehowaketa sie, kiu nu bakecü mha pete mesa motaüwalie kevi la; mu süsie nu zievo-e le di kiu mehotuo.

³⁷Mu puo kechükhuu mehotuo. Sidi kechükhuu sozha gei pejoda morei meriedakecü pfü huo ngu mu süue puo sozha ki soukuokecü mhie ro,

³⁸zievo-ue kiu nunu tuo kikha ki pratatuo, sidi zha thenie kiu khawatuo.

³⁹Mu zha thenie nhie zievo-ue la vor di mehotuo; mu kechükhuue kiu sozha gei keza vota ro,

⁴⁰zievo-ue uko bu kechükhu keba ketsieko biewa di kelhoupie nadiu casie thechü mesa kemo nu shüwanu di diekhashütuo;

⁴¹puoe mia bu kiu nu lutsahatsa mewewatuo, mu kinyhü mewekeshüko lapie nadiu casie thechü mesa kemo nu shüwatuo;

⁴²sitse ukoe ketsie kekrei pie vor di ketsie luko tha nu shüwatuo, mu puoe kinyhü kekrei pielie di kiu nyhüshütuo.

⁴³Ketsieko biewa mu kiu mewewa mu nyhüwaketa sie rei kechükhuu la parta ro,

⁴⁴zievo-ue vo di mehotuo; mu kechükhuu keza vota ro, kiu nu mhakechü kemhie puo bate, süu mesa mote.

⁴⁵Siro puoe kiu rhuowanu tuo, ketsieko mu seiko mu ki nyhükeshü pete lawatuo, sidi süko pie nadiu cie vo thechü mesa kemo puo nu shüwatuo.

⁴⁶Sizomonyü kiu khapie keba ki sünu keleu thevatie ketso mesa mo batuo;

⁴⁷mu kiu nu kezhüu puo pfhenei menyiwatuo mu kiu nunu mhakecüu puo pfhenei menyiwatuo.

⁴⁸Derei zievo-u vor meho di kiu nyhükewa sie kechükhuu keza sa mota ro, zievo-ue kiu mesataücü pushütuo, kechüu mesaketa la.

⁴⁹Mu puoe kiu chü kemesaketuo la pera kenie selietuo, sedarsei mu kelo kemerie mu hisop nha sa di.

⁵⁰Sidi rünyoli puo nu dzüsa keba mho nu pera puo dukhrilietuo,

⁵¹süsie sedarsei, hisop nha mu kelo kemerieko pie pera kerheiu sa di pera dukhrikewau zie nu mu dzüsau nu setuo, sidi süu pie va thenie kiu vatuo.

⁵²Hai di puoe perau zie mu dzüsau, pera kerheiu, sedarsei mu hisop nha mu mha kemerie pie kiu chü kemesatuo.

⁵³Mu puoe pera kerheiu khapie nadiu ciepra phouyo nu shüwatuo; sidi puoe kiu chü kemesawatuo, di süu mesatatuo.

⁵⁴Mpakechü kehoupuo la shierei thezho-u sü hau zo; kemeso puo la,

⁵⁵pfhemenei gei morei ki puo nu mpakechü kemhie baketako la.

⁵⁶Mu kerümie morei kepou morei puopfü puo la,

⁵⁷kedimesekipuo mesa mota mu kedimesekipuo mesate shikecü pekieshüketuo la. Mpa la thezho-u sü hau zo.