Read Angami Naga Levimiako 15 Bible Online

Levimiako 15 - Angami Naga bible

Levimiako 15

¹Jihovae Mosa mu Aron unie ki:

²Israelmiako ki pushücie: Mia puo puo mo geinu zu kepar huo nyi ro, zu kepar süu mesa mo.

³Mu zu kepar mesakemo-u la thezho-u hauha: Puo mo geinu zu kepar ze di kru shierei, morei puo mo nu zu par sa mota rei, süue puo gei mesa mo phre zo.

⁴Puo gei zu kebau thezhü kehoupuo gei zhü ro, süu mesa motatuo, mu puoe bakewa kehoupuorei mesa motatuo.

⁵Mu kehoupuorei puozhü kebieu puo pfhenei menyiwatuo, mu dzü rülutuo, di thevatie ketso mesa mo batuo.

⁶Mu puo geinu zu kepar kenyiue bawaketau gei kehoupuorei sügei ba ro puo pfhenei menyituo mu dzü rei rülutuo, sidi thevatie ketso mesa mo bataütuo.

⁷Mu kehoupuorei puo gei zu kebau mo bie ro puo pfhenei menyituo mu dzü rülutuo, di thevatie ketso mesa mo batatuo.

⁸Siro puo gei zu kebau mhitsie pie kemesamia puo va ro, puoe puo pfhenei menyituo, mu dzü rülutuo, di thevatie ketso mesa mo batatuo.

⁹Puo gei kru kebau gurabakhra puo gei bawa ro süu mesa motatuo.

¹⁰Mu puo khro keba mhanya kehoupuorei kebiemia mesa mo ba thevatie tsotuo; mu mha sikecü toupiekecüu puo pfhenei menyituo, mu dzü rülutuo, di thevatie ketso mesa mo bataütuo.

¹¹Puo gei zu kebau puo dzie metei mo di mia puo bie ro süu puo pfhenei menyituo mu dzü rülutuo, di thevatie ketso mesa mo batuo.

¹²Siro puo gei zu kebau rünyoli puo bie ro süu biephrowatuo; seikhou kehoupuorei dzü nunu keshütuo.

¹³Siro puo gei zu kebaue zu kepar nunu puo chü kemesalieta ro, puo thuo puo chü kemesakecü la zha thenie phrülietuo, di puo pfhenei menyiwatuo; mu dzü sa rülutuo di mesatatuo.

¹⁴Mu zha thetha nhie puo mekhru kenie moro paruonuo kenie pielie di Jihova mhodzü kehou pfhekiu kikha nu vortuo, di pie zievo-u tsüshütuo;

¹⁵zievo-ue puo pie kephouma ruosuo mu puo pie kethe ruosuo la khashütuo; mu zievo-ue puo gei nu zu kepar-u la puo phou mesatuo.

¹⁶Siro mia puoe puo phoudzü peprashü ro, puoe puo mo pete khrütuo, di thevatie ketso mesa mo batuo.

¹⁷Siro pfhe morei chüzhü üse kechü kehoupuorei puo phoudzü pie vakewau menyituo, di thevatie ketso mesa mo batuo.

¹⁸Mia puoe thenumiapfü puo zezhü di puo phoudzü peprashü ro, unie kenienie dzü rülutuo, di thevatie ketso mesa mo bataütuo.

¹⁹Thenumiapfü puoe thezie kru mu süue puo geinu prakecü lhenuzho ki zo ro, hapfüe zha thenie mesa mo batuo, mu kehoupuorei hapfü kebieu mesa mo ba thevatie tsotuo.

²⁰Puoe mesa mo keba teiki mha kehoupuo gei rei zhü ro süu mesa motatuo, mhakehoupuo gei rei bakewau mesa motatuo.

²¹Kehoupuorei puo zhü kebieu mesa motatuo. Puo dzü rülutuo, di thevatie ketso mesa mo batuo.

²²Kehoupuorei hapfü bawaketau bie ro, puo pfhenei menyituo, mu dzü rülutuo, di thevatie ketso mesa mo batuo.

²³Puoe puo gei bakecüu, thezhü shierei, mha kekrei kehoupuorei hapfü biekewau mesa mo ba thevatie tsotuo.

²⁴Siro thepfumia puo hapfü zezhü, mu hapfü kerhu puo gei pfüta ro, puoe zha thenie mesa mo batuo; mu puoe thezhü gei zhükecüu mesa motatuo.

²⁵Thenumiapfü puoe kerhukese ki zo mo di zha kekra thezie kru bata, morei puo kerhu sekecü tei keyie di thezie kru bata ro, puoe thezie kru keba teisozha pete mesa mo batuo; puo kerhu kese ki tuoi, puoe mesa motaü zotuo.

²⁶Puoe thezie kru keba teisozhako mu, puo gei zhükecü thezhüu, puo kerhu kese ki zhüu tuoi zotuo, mu puo gei keba khe mesa motatuo. Puoe kerhu kese ki mesakemo tuoi,

²⁷kehoupuorei mha hako kebieu mesa motatuo, di puo pfhenei menyituo, mu dzü rülutuo, di thevatie ketso mesa mo batuo.

²⁸Derei puoe thezie krukecü nunu mesata ro, puo thuo puo la zha thenie phrütuo. Mu süsie mesatatuo.

²⁹Zha thetha nhie puoe mekhru kenie morei paruonuo kenie se kehou pfhekiu kikha nu zievo-u ki vortuo. Mu zievo-ue puo pie kephouma ruosuo la mu kekreiu pie kethe ruosuo la khashütuo;

³⁰zievo-ue mesa kemo puo geinu prakecü la Jihova mhodzünu puo phou mesatuo.

³¹Hamhie di nie Israelmiako mesa kemo nunu kha kreipie balietuo, uko bu rüsuopfhekiu u donu bakecüu perhuwa di siata molieketuo la.

³²Mia puo puo geinu zukecüu la mu puo phoudzü pepra di mesa moketau la.

³³Mu miapfü puo kerhu se di mhachü kebapfü la süusü, thepfumia rei thenumia rei u geinu zukecü nyiyakezhamia la, mu thenumiapfü puo mesa ba di puo zezhükecüu la thezho sü hau zo.