Read Angami Naga Levimiako 16 Bible Online

Levimiako 16 - Angami Naga bible

Levimiako 16

¹Aron nuo thepfunie Jihovae mhodzü penuo phir di siaketa sie, Jihovae Mosa rüchü.

²Sidi Jihova Mosa ki: N dzürieu Aron bu puotei kehou nu keyapfheu sietsa kemesachüu nu, dietseidiekho mhogei keba ngukemezhie bau[7] mhodzünu le hienushücie, puo bu siata molieketuo la; kekreilamonyü ae ngukemezhie bau[8] gei kimhou geinu partuo.

³Derei Aron bu hamhie di kemesa chüu nu vortuo, kephouma ruosuo la thudonuo yopuo mu tekuochü puo se di.

⁴Puo bu kemesa linen boulie boulietuo, mu linen pfhenei pekhroko setuo, linen chiepha pie puo chie phatuo, mu linen tsüzeu setuo; kemesa pfhenei-e hako zo. Puo bu dzü rüluwa di hako setuo.

⁵Mu puoe Israelmia mechü kehouu nunu kephouma ruosuo la mvüdo kenie mu kethe ruosuo la tekuochü puo se vortuo.

⁶Aron-e puo thuo puo la thudo-u pie kephouma ruosuo puo chüshütuo, mu puo thuo puo la mu puo kikru la phousa chütuo.

⁷Süsie puoe mvüdo nie selie di, unie pie kehou pfhekiu kikha nu Jihova mhodzü khashütuo;

⁸mu Aron-e temvü nie se dapetuo, puo Jihova la mu kekreiu Azazel[9] la.

⁹Mu Aron-e Jihova za nu parkelie temvüu pie kephouma ruosuo la khashütuo;

¹⁰derei Azazel[10] za nu parkelie temvüu we pie perhei di Jihova mhodzünu khashü di süu geinu puo phou chü kemesatuo, perhei puo peta pie Azazel ki shüwaketuo la.

¹¹Aron-e thudo-u pie puo thuo puo la kephouma ruosuo khashütuo, sidi puo la mu puo kinumiako la ruori chütuo, puoe puo kephouma ruosuo la thudo-u, dukhrituo.

¹²Mu puoe Jihova mhodzünu keba ruosuobau nu mizhü ketu mharekethengu kethekhu ketshu puo, mu getshiekewa mharekethengu puore kevi puo dzie nie ketshu selie di süu se keyapfheu sietsa lerlietuo,

¹³di mharekethenguu pie Jihova mhodzünu theshütuo, mharekethengu mikhu-u thuo dietseidiekhokelie bau gei keba ngukemezhie bau whelie di puo bu sia molieketuo la;

¹⁴mu puoe thudo-u zie huoyo pielie di puo dziekinuo se kegepie ngukemezhie bau mhodzünu puo dziekinuo se va thenie kegeshütuo.

¹⁵Süsie puoe kephouma ruosuo la themiako ya temvüu dukhrituo, di puo zie pie keyapfheu noutsa lertuo, di puo zie pie thudo-u zie pie chükecü tuoikecü chüshütuo, kegepie ngukemezhie bau gei mu puo mhodzünu votuo;

¹⁶hamhie di puoe kemesa thechüu chü kemesatuo; Israelmiako mesa kemoko la, mu uko kephoumako; sidi puoe kehou pfhekiu, mesa kemoko donu rei uko ze bayakecüu la hakemhie chütuo.

¹⁷Puoe puo thuo puo la, puo kikruko mu Israel mechü kehou chü kemesatuoü kemesachüu nu kele nunu vo la par kemochie kehou pfhekiu nu mia puo bu rei balie lho.

¹⁸Sitse puoe Jihova mhodzünu keba ruosuobau nu patuo, di ruosuobau la thudo-u zie huo mu temvüu zie huo pielie di ruosuobau khie puo kia kebako gei kenheshütuo.

¹⁹Mu puoe puo dziekinuo pie thezieu huo kegepie va thenie sügei shütuo, di Israelko mesa kemo donu keba süu chü kemesa mu chü peviwatuo.

²⁰Puoe kemesachüu la, kehou pfhekiu la mu ruosuobau la ruorei chü tseiwa tse puoe temvü kerheiu khashütuo.

²¹Aron-e puo dzie kenienie pie temvü kerheiu tsü gei shü di Israelko ukhre ura kechü kephouma pete, uko thezho varhuokewa pete, mu uko kephouma pete phrapie puo tsü gei shütuo, sidi mia puo süu la dojü se kebau bu ze vo rayha nu shüwatuo.

²²Temvüue uko kejoko pete pie puo gei shülie di toupfü thechü mekrikrükecü puo nu votatuo; mu puoe temvüu bu nha nu votatuo.

²³Sitse Aron-e kehou pfhekiu nu vortuo, di puoe kemesachüu nu kevo ki linen pfhenei keseko rhuopie sünu zhüwatuo,

²⁴puoe kemesachü puo nunu dzü rüluwa di puo pfheneiko selie, di partuo, mu puo la tsiu puo themiako la kethe ruosuou khashütuo, sidi puo la mu puo themiako la phousou ruosuo puo chütuo.

²⁵Puoe kephouma ruosuou chüshuoko ruosuobau geinu the pekhushütuo.

²⁶Temvüu ketsepie Azazel tsükewa themiau rei puo pfhenei menyiwa mu dzü rüluwatuo, sidi kenuotsa razhüchüu nu la vorlie vitatuo.

²⁷Kephouma ruosuo kechü thudo-u mu temvüu zie toupie kemesachüu nu ler di phousou chükewa sie, unie zhü, unie chü mu unie buo se razhüchüu casie pra di mi pie thewatuo.

²⁸Mu süko se vo thekeshüue puo pfhe menyi mu dzü rüluwa di süsie razhüchüu nu la vorlie vitatuo.

²⁹Mu hau nie la telhe zho puo chütatuo, khrü thenieu nu, zha ker nhie, nie-e nie kenyütuo, mu nie mhapuorei chülie lho, khenu kelhouu rei morei solhimia nie donu lhou kebamia rei.

³⁰Kekreilamonyü teisozha hanhie nie chü kemesaketuo la nie phou mesatuo; nie kephouma pete nu Jihova mhodzü mesatatuo.

³¹Süu nie la sabat zha pecü se di rüleituo. Nie-e nie kenyütuo;[11] süu kechachie la thezho puota zo.

³²Mia puoe puo puo sou nu zievo chütuoü di kenhelie mu chü kemesalieta ro, kemesa linen pfheneiko selie di nie phou mesatuo;

³³Puoe kemesachü kehou pfhekiu mu ruosuobau chü kemesatuo, mu puoe zievoko mu kehou pfhekiu themiako pete phou mesatuo.

³⁴Mu hau nie la kechachie zho puo chütuo, teicie nu va puo Israelko kephouma phou mesaketuo la. Mu Mosae Jihova diekhakeshü mhiei chülie.