Read Angami Naga Levimiako 17 Bible Online

Levimiako 17 - Angami Naga bible

Levimiako 17

¹Jihovae Mosa ki:

²Aron mu puo nuo thepfuko mu Israelmia pete ki pushülie: Jihova diekhakeshüu sü hau zo.

³Israelmia puoe razhüchüu nunu, morei süu casie nu thudo puo morei tekuo puo morei temvü puo dukhri di,

⁴rüsuopfhekiu mhodzünu se Jihova tsüketuo la kehou pfhekiu kikha nu se vor moro, thezie pekrukecü kejo pie süu geishütuo; puoe thezie pekrukewa la, puo themia donu nu puo dathewatuo.

⁵Hauha Israel nu khunuo bu ruotho la phouyo nu khunuo dukhri ro, süu se kehou pfhekiu kikha nu Jihova ki vor di vitho ruotho chü di dukhripie Jihova ki khashülieketuo la,

⁶mu zievo-ue thezieu kegepie rüsuopfhekiu kikha nu Jihova ruosuoba gei vatuo, di puoshuou thepie puore kethengu puo chüpie Jihova ki shütuo,

⁷sidi uko bu temvü-rhuou ruotho khashü mu thethe lie sa molieketuo la. Hau uko nuosenuoyie pete la kechachie zho puo chütuo.

⁸Mu uko ki pu sashülie: Israel yie kehoupuorei morei uko ze lhouketa solhimia kehoupuorei puo kethe ruosuo,

⁹pie Jihova tsütuoü rüsuopfheki kicie nu vor kemo-u themiako donu nu puo kelhiwatuo.

¹⁰Israel kinumia morei solhimia uko donu lhou keba kehoupuorei thezie kehoupuorei cü ro, a a zie pie thezie kecüu petsoutuo, di puo themiako donu nu puo dathewatuo;

¹¹kekreilamonyü kerhei-e thezie nu bakecü la, mu ae nie kerheiro la nie phou mesakecü chüketuo la, süu nie la khapie ruosuobau gei shüwate; kekreilamonyü thezie-e kerheiro puo gei kebau la u ruori chülieyakecü la.

¹²Süla ae Israelmiako ki pushüwate. Nie donu, morei solhimia nieko donu lhou keba miapuorei bu thezie cülie lho.

¹³Israelko donu morei solhimia uko donu lhou keba kehoupuorei, chüwhuo di chü morei pera cülie kevi kehoupuorei bielie ro puozieu pekruwa di nyophe pie süu whewatuo.

¹⁴Khunuo kehoupuorei puozie-e puo kerheiro zokecü la; süla ae Israelko ki pushüwate, nieko khunuo kehoupuo zie rei cülie lho, khunuo kehoupuorei puozie-e puo kerheiro zokecü la; kehoupuorei süu cükecüu dathewatuo.

¹⁵Mu themia kehoupuorei khunuo puo thuo siaketau morei khunuo bu puo tewaketau cükecüu, süu khenu kelhoumia morei solhimia shierei, puo pfhenei menyi di dzü rülutuo, mu thevatie ketso mesa mo batuo; süsie puoe mesatatuo.

¹⁶Derei puoe süko menyiwa mo morei dzü rüluwa mo ro, puoe puo kejo toupfütuo.