Read Angami Naga Levimiako 18 Bible Online

Levimiako 18 - Angami Naga bible

Levimiako 18

¹Siro Jihovae Mosa ki:

²Israelko ki pushülie, Ae Jihova nie Kepenuopfü zo.

³Niekoe lhoukecü Ijipt kijü nu mia mhatho kemhie chülie lho, mu ae nie ze vorshü zhükecü Kanan kijü nu mia mhatho kemhie chülie lho. Niekoe uko zhoko nu tuo suo.

⁴Niekoe a rhükeshüu chü, a zhoko ze mu süko nu tuotuo. Ae nie Jihova nie Kepenuopfü.

⁵Süla nie-e a zhoko mu a rhükeshüko zetuo, silie liro puoe rheilietuo; Ae Jihova zo.

⁶Nie kehoupuorei puo seyie puo penuokecümia methuokecü kewheu hielie lho, ae Jihova zo.

⁷Noe n puo kewheu rhuo lho, süue n zuo kewheu zocü la; puoe n zuo zo, noe puo kewheu rhuo lho.

⁸Nie puonuo kimia kewheu rhuo lho, süu n puo kewheu zo.

⁹Noe n üpfü kewheu rhuo lho, n puou nuopfü shierei, n zuo nuopfü shierei, kinu puo nunu puo penuo shierei, morei kekreira nu penuo shierei.

¹⁰Noe n nuou nuopfü, morei n nuopfü nuopfü kewheu rhuo lho, uko whe moketa süu n whe mota zocü la.

¹¹No n puou kimia nuopfü penuopie n puo ketsüpfü kewheu rhuo suo, puoe n üpfü zocü la.

¹²No n puo üpfü kewheu rhuo lho, puo n chü n phou zo.

¹³No n zuo siezepfü ze thenga mhatho chü hie, puoe n zuo kepenuothomia zocü la.

¹⁴Noe n puo siezedzürie kewheu rhuo suo, puoca no puo kimia pfhü vo lho, puoe n thipfü zo.

¹⁵Noe n miepfü kewheu rhuo lho, puo n nuou kimiapfü zo, no puo kewheu rhuo lho.

¹⁶Noe n siezedzürie kimia kewhe rhuo lho, süue n siezedzüriemia kewheu zo.

¹⁷Noe thenumiapfü puo mu puo nuopfü kewhe rhuo lho, mu no puo nuou nuopfü morei puo nuopfü nuopfü kewhe rhuo suo; ukoe n chüüphou zocü la. Süue kerüzhütho zo.

¹⁸Noe n kimia siezedzüriepfü puo liepie n kimia rüduo di puo ze suo, n kimia rhei kebachie.

¹⁹Noe thenumiapfü puo kerhu se keba ki puo kemethuo rhuotuoü puo penuo vo hie.

²⁰Mu noe n keperomia kimia zezhü di puo ze n perhuwa suo.

²¹Noe n nuonuo miapuorei se ruosuo chüpie Molek tsü, di nie Kepenuopfü za bie perhukecü chü suo: Ae Jihova zo.

²²Noe thenumia zezhükecü tuoi thepfumia zezhü lho, süu chü kenyü.

²³Mu noe khunuo puorei zezhü di n thuo n perhu lho, morei thenumia rei khunuo bu puo zezhü suo, süue themia zho mo zo.

²⁴Mha hako puorei pie nie thuo nie perhu hiecie, kekreilamonyü a nie mhodzü kinu whuowakezhü seyiekoe, hako pie u thuo u perhuyakecü la;

²⁵sidi kijüu chü perhuwa, mu a mezhükemo süu pechüshü, sitse kijüe puo gei lhou kebako merüwate.

²⁶Derei nieko we a zhoko mu a rhükeshüko zetuo mu kerütsekecü hako puorei chülie lho, khenukelhou shierei morei nie donu lhou ketuo solhiu shierei.

²⁷(Nie mhodzü kelhouko mha kerütsekecü hako chü di kijüu bu rhuketa la.)

²⁸Kijüue nie mhodzü kelhou seyieu merükewa tuoi, noe puo perhuwa ro nieko rei merüwalie vikecü la.

²⁹Kehoupuorei mha kerütse hako puo chü ro, süko chükecü themiako u themiako donu nu puo kelhiwatuo.

³⁰Süla thezho kerütsekecüko nie mhodzü chü kevorko puorei chü molieketuo la, mu uko bu nieko perhu molieketuo la a dieu zeliecie, ae Jihova nie Kepenuopfü zo.