Read Angami Naga Levimiako 19 Bible Online

Levimiako 19 - Angami Naga bible

Levimiako 19

¹Siro Jihovae Mosa ki:

²Israel mechü kehouu ki pushülie: Nie mesaliecie, A Jihova nie Kepenuopfü mesa zokecü la.

³Nie kehoupuorei puo zuo mu puo puo rhutuo, mu nie a sabatko se batuo: A Jihova nie Kepenuopfü zo.

⁴Rürei se terhuo miarhi vata hie morei thepie chükecü terhuoko nie thuo nie la chü hie: Ae Jihova nie Kepenuopfü zo.

⁵Nie vitho ruosuo chüpie Jihova ki keshü ki, nie ruosuo bu lielie kesü chüketuo la khashütuo.

⁶Nie süu khakeshü nhie morei süsie nhie süu cülietuo; puo zha se ketso peshapie keba pete mi pie thewatuo.

⁷Zha se nhie süu cü ro, süue kerütse puote, süu lielie lho,

⁸kehoupuorei süu cükecüu puo kejo zhakhra pfütuo; puoe Jihova vie kemesa, se perhuwaketa la; süu puo themiako donu puo kelhiwatuo.

⁹Nie nie lie rekecü ki, nie lie mhou ketso re phi suo, morei nie lie rekelie sie siepfhülie lho.

¹⁰Mu nie khubelieu kepa tsei zowa suo, morei nie khubelie nu khubesi teketsuko palie lho; kejüko mu chazoumia la süko khapie zhütuo: Ae Jihova nie Kepenuopfü zo.

¹¹Nie mha rügu lho, morei cürü, morei huoniehuo selie lho.

¹²Mu nie bu cürü di a za pie rüselie lho, mu sidi nie Kepenuopfü za perhulie lho: Ae Jihova zo.

¹³Nie-e nie zanuou pese morei puo vie rüdie lho, zhakhra lietho-u zha khashü mo ba khise tsolie lho.

¹⁴Nie nyievüu rüselie lho morei thephi kemesü puo pie mhicieu mhodzünu shülie lho, derei nie Kepenuopfü preituo: Ae Jihova zo.

¹⁵Nie capi nu puotou kemo puorei chülie lho, nie kejüu kelhi pekrei morei kezhau nei chü kreitalie lho, derei kethoca se nie zanuou capi chütuo.

¹⁶Nie nie donu sieükechümia tuoi kho mu kelie lho, mu nie zanuou zie[12] geinu nie mevi pfhü lho: Ae Jihova zo.

¹⁷Nie nie nou nu nie siezedzürie ngumecü suo, derei nie siezanuou ze mha kepukekielie, nie puo la kephouma toupfüta rei silie lho mu.

¹⁸Nie nie khepu morei nie themia nuonuoko gei rünoukemo chü suo, derei nie zanuo-u khriepie nie thuo nie kekhrie mhielie: Ae Jihova zo.

¹⁹Nie a zhoko zetuo. Nie kiri bu khunuo kekrei ze kerüpie hie; nie tsia kekreikecü kenie pie nie lie nu prushü hie morei mha kekreikecü kenie pie chükecü pfhenei se hie.

²⁰Mia puo mia diemiapfü puo, mia vakhapie ba rei puo rhalie moluo morei khashüwa moluokecüpfü puo zezhüwa ro, puo nyie ketsotuo. Unie bu siatalie lho, puoe khashüwaketamiapfü moluokecü la.

²¹Derei puoe puo thuo puo la kehou pfhekiu kikha nu tekuochü puo se kejo ruosuo la Jihova ki vortuo.

²²Mu zievo-ue kejo ruosuo la tekuochüu pie puo la Jihova mhodzünu puo ruori chütuo, puoe kephouma chükewa la, mu puoe kephouma chükewau vashü puo tsüwatuo.

²³Niekoe kijüu nu vorlieta di sei nie ca neiü leishü ro, nie bu teicie se phrü di uko si kecü khatuo,[13] süu cü suotuo.

²⁴Mu cie dia cie puo si pete Jihova tsheketuo la kedakreilie tuo.

²⁵Derei cie pengou cie nie uko si cülie vitatuo, uko bu nie la vü phi salieketuo la: Ae Jihova nie Kepenuopfü zo.

²⁶Nie mha kehoupuorei puozie sa cülie lho: Nie thuophi morei themoulie lho.

²⁷Nie nie daphi houpfülie lho mu nie tiemie kewhilie lho.

²⁸Nie kesiamia la nie chü geilie lho morei nie gei mha khu puorei thulie lho: Ae Jihova zo,

²⁹N nuopfü pie thethelie di puo bie kezhase hie, kijüue thethe nu teleta di kerüzhüu bu nie kijü nu tshuta rei silie lho mu.

³⁰Noe a sabat zetuo mu a kemesachüu rhutuo: Ae Jihova zo.

³¹Themoupfü mu themouu rüsa hie, uko pfhü di uko bu n perhu hie: Ae Jihova nie Kepenuopfü zo.

³²Nie phichümia mhodzünu sieta morosuo, mu ketsamia zieu rhu morosuo, mu nie nie Kepenuopfü prei morosuo: Ae Jihova zo.

³³Solhimia puo nie kijü nu ba ro, nie solhi-u peselie lho.

³⁴Solhimia nie ze rüna chü kebau pie nie mhodzü ki khenu kelhoumia tuoi zolie. Mu nie puo khriepie nie thuo nie kekhrie mhielie; nie Ijipt kijü nu solhimia chükecü la: Ae Jihova nie Kepenuopfü zo.

³⁵Nie mha kemejü nu mia se suo, puocha, puo mesi morei puo ketsa kekra kemejü nu rei.

³⁶Nie roshükhou dietho, mesitsie bu dietho, efa kedietho mu hin diethokecü setuo: Ae Jihova nie Kepenuopfü, Ijipt kijü nunu nie ze parkelieu zo.

³⁷Mu nie-e a zhoko pete mu a rhükeshü pete chüü zetuo: Ae Jihova zo.