Read Angami Naga Levimiako 2 Bible Online

Levimiako 2 - Angami Naga bible

Levimiako 2

¹Themia kehoupuorei lhacülhale ruosuo se vor Jihova ki khashü ro, puoe thou kevithopfü khashütuo; puoe süu gei tier lashütuo, mu mharekethengu pie sünu shütuo.

²Süu se Aron nuo zievoko ki vortuo. Siro puo sünu nu thou kevitho dzielhi puo mu tier, mharekethengu pete sa di pielietuo, mu zievo-ue hau pie rükraketuo yau chü di ruosuobau geinu the pekruwatuo. Puo bu mi ruosuo khakeshü puo, Jihova ki puore kethengu puo chütuo.

³Mu lhacülhale ruosuo khakeshü nu peshakelieko pie Aron mu puo nuonuoko ya chütuo; hau sü mi nu ruosuo khapie Jihova ki keshü nu kemesatho puo chütuo.

⁴Noe lhacülhale ruosuo khakeshü miphu nunu rie di se vor ro, süu no khreiü shükemo thou kevitho se tier sa kereituo, morei khreiü shükemo niekhrüda rüpfüpfekecüu tier pie kenhetuo.

⁵Siro no lhacülhale ruosuo khakeshüu süu kethuoli nu rie ro, süu khrei shükemo thou kevitho pie tier sa kereituo;

⁶no süu ciechü petselie di tier lapie puo gei shütuo, süue lhacülhale ruosuo khakeshü puo.

⁷Mu n ruosuo khakeshü li puo nunu cha liro, süu thou kevitho pie tier sa di chütuo.

⁸Siro no lhacülhale khakeshü ruosuo nu khakeshü mha hako chükelieko se Jihova ki vortuo; mu hau se zievo-u ki vor ro, puoe süu se ruosuobau gei vortuo.

⁹Mu zievo-ue lhacülhale ruosuo khakeshü nunu rükraketuo yau chü phrelietuo, di hau pie ruosuobau geinu thewatuo, Jihova ki puore kevi khakeshü puo chütuo.

¹⁰Siro lhacülhale ruosuo khakeshü nunu peshakelieu we Aron mu puo nuonuoko la zotuo; hau sü mi pie Jihova ki ruosuo khakeshü nu kemesatho puo chütuo.

¹¹Lhacülhale ruosuo khakeshü puorei khrei pie shü di se Jihova ki vorlie lho; noe Jihova ki kethe ruosuo khakeshü nu khrei morei mepfhidzü thelie lhocü la.

¹²Noe sünie pie ruosuo kevitho chü di se volie vi; derei sünie pie puore kethengu chüketuo la ruosuobau gei khashülie lho.

¹³Noe lhacülhale se ruosuo kechü pete rei metsie rükra mota suo; nie Ukepenuopfü ze dietseidiekhokelie metsieu pie nie lhacülhale ruosuo nu khashü metuo; noe mha khakeshü pete nu metsie sa khashütuo.

¹⁴Nie nie chieshü kerieu nunu lhacülhale ruosuo khapie Jihova ki shü ro, nie-e thoulha khakeshü nie chieshü puokre kesa nunu biepie gelie, mi pie houlie di khashütuo.

¹⁵Siro tier pie sügei shütuo, di mharekethengu pie puo gei shütuo; süu we thoulha khakeshü puo chütuo.

¹⁶Mu zievo-ue kerükra yau chüketuo la thoulha gekelie huoyo pie tier mu puo mharekethengu pete sa di thewatuo; hauha mi nunu Jihova ki mha khakeshü puo chütuo.