Read Angami Naga Levimiako 20 Bible Online

Levimiako 20 - Angami Naga bible

Levimiako 20

¹Jihovae Mosa ki:

²Israelko ki pu sashülie: Israelko donu, morei Israel donu lhou keba solhimia rei puo nuonuo pie Molek tsükecüu pie kesia nu shütuo; rüna nu themiakoe ketsie pie puo vakhrituo.

³A thuo a zie pie süu petsoutuo, di puo themiako donu nu puo kelhiwatuo, puoe puonuo puo pie Molek tsü di a kemesachüu perhu mu a kemesa zau bie kezhasekecü la.

⁴Mu kijü nu themiakoe uko nuo pie Molek tsükeshü ki, rünau themiakoe u mhi süu kinu kevieta di uko puo pie kesia nu shü moro,

⁵ae a zie pie themia süko mu puo kinumiako petsoutuo, mu uko donu nu uko kelhiwatuo, puo rei mu puo medzi thethelie di Molek kemedzi pete.

⁶Mia puoe rürei themoupfhi mu themoumia kitsa va, thethelie di uko sietuo ro, a a zie pie süu petsoutuo, mu puo themiako donu nu puo dathewatuo.

⁷Süla nie thuo nie chü kemesalie, mu mesaliecie, kekreilamonyü ae Jihova nie Kepenuopfücü la.

⁸A zhoko zelie, mu chülie; ae nie chü kemesashüyakecü Jihova zo.

⁹Puo puo morei puo zuo rüsekecüu pie kesia nu shütuo; puoe puo puo mu puo zuo rüsewate, puo zie thuo puo tsü gei pfütuo.

¹⁰Mia puo puo zanuou kimia ze pieü chü ro,[14] pieüu mu pieüpfü unie pesiawa tuo.

¹¹Puo puo kimia zezhükecüu puo puo kewheu rhuowate, unie pesiawatuo, mu unie zie unie tsü gei pfürtuo.

¹²Mia puoe puo miepfü zezhü ro unie pesiawatuo; unie kepenuo zo di keze mha kesuo chü, unie zie thuo unie tsü gei pfütuo.

¹³Mia puoe thenu zekezhü tuoi thepfumia rei zezhü ro, unie-e mha kerütsecü puo chüte, unie kenienie pie kesia nu shütuo, unie zie thuo unie tsü gei pfütuo.

¹⁴Mia puoe puo kimia mu puo kimianuo zuo salie ro, süue kerüzhü mhatho puote, süla mi pie uko pete thetuo, nie donu kerüzhü bu ba molieketuo la.

¹⁵Mia puoe khunuo zezhü ro, puo pesiawatuo; mu nie khunuou dukhriwatuo.

¹⁶Miapfü puoe khunuo puo ki vo di puo zezhüwata ro, nie thenupfü mu khunuou dukhriwatuo; unie pie kesia nu shütuo, unie zie thuo unie gei pfütuo.

¹⁷Mia puoe puo üpfü, puo puo nuopfü puo morei puo zuo nuopfü puo lielie di süpfü kemethuo nguwa, mu hapfü rei puo kemethuo nguwa ro, süue mha kethenga puo, süla unie themia nuonuoko mhingu ki nu unie kelhiwatuo. Puoe puo üpfü ze mha kesuo chüwaketa la, puoe puo siazha ngu zotuo.

¹⁸Mia puoe thenu mhachü kebapfü puo zezhü di puo ze mha kesuo chüwa, di puo hapfü zie bu kru parta ro, unie kenienie rei u themia donu nu unie kelhiwatuo.

¹⁹Noe n zuo siezepfü morei n puo üpfü ze mha kesuo chülie lho, süue puo thuo puo kepenuomia ze mha kesuo kechü la, unie-e unie siazha ngu zotuo.

²⁰Mia puoe puo nieu kimiapfü zezhü ro, puoe puo nieu rhu mowate; unie-e siazha ngutuo, unie nuo jü di siatuo.

²¹Mia puoe puo siezedzürie kimia lielie ro, süue mha mesa kemo puote, puoe puo siezedzürie rhu mowata zo, unie bu nuojü chütuo.

²²Süla unie-e a zhoko pete mu a rhükeshü pete zetuo, mu süu chütuo, a nie ze vorshü zhükecü kijüu bu nie melouwa molieketuo la.

²³Mu nieko we, ae nieko mhodzü ki nu whuoshükezhü seyieko zhoko nu tuo hieluo; ukoe mha hako pete chükecü la, mu süla ae uko mecüya.

²⁴Derei a nie ki pushüwate: Niekoe uko kijü wetuo, mu ae khapie nie bu pevielietuo, thunudzü mu mepfhidzü krukezhü kijüu. Ae Jihova nie Kepenuopfü zo, themiako kinu nieko kho kreilieketau zo.

²⁵Siro niekoe khunuo kemesa mu mesa kemo chükho kreituo, mu pera kemesa mu mesa kemo rei, niekoe khunuo, pera morei lhou kijü tshukezhüko bu rei nie bie kerütsewalie lho, ae nie la mesa mo üdi kha pekreikeshüko bu.

²⁶Nie-e mesakecü la; mu ae Jihova, nie kho kreilieketa la, nie bu a vie chütuoü di.

²⁷Thepfumia morei thenumia rei themoupfhi nu diepu mu themouyakecümia pesiawatuo; ketsie pie u vakhriwatuo, uko zie bu u tsü gei pfütuo.