Read Angami Naga Levimiako 24 Bible Online

Levimiako 24 - Angami Naga bible

Levimiako 24

¹Jihovae Mosa ki:

²Israelko bu mitubouu la Oliv thupie chükecü tier kemesa se n ki vornu di diekhashülie, mi bu tu sei baketuo la.

³Aron-e süu khapie dietseidiekho[19] keyapfheu sietsa, kehou pfhekiu nu süu kha menuopie batuo, thevatie nu khise ketso Jihova mhodzünu kha seipie batuo; hau nie nuosenuoyie pete nu kechachie la thezho puo chütuo.

⁴Puoe mitubouko pie Jihova mhodzünu suna ketho pie kechü mitubako[20] gei kha menuopie ba seituo.

⁵Siro nie thou kevitho se niekhrüda kerekenie rielietuo; niekhrüda puo bu efa ker za kenie batuo.

⁶Mu nie süko pie suna ketho se kechü mizhüu[21] gei cha kenie chü di pie thashütuo, cha puo nu sorourou idi.

⁷Siro nie cha puo tse nu mharekethengu kemesa khashütuo, süu pie niekhrüdau se ruosuokechü puo chütuo mi nu ruosuo chüpie Jihova ki shütuo.

⁸Sabat zha metsei Aron-e Israelmiako la Jihova mhodzünu süu tha menuoshüshü seituo, themiako u khakeshü puo chü di kechachie dietseidiekho puo la.

⁹Mu süusü Aron mu puo nuonuoko latuo, mu ukoe süu kemesachü puo nunu cütuo, süue mi pie Jihova ki ruosuo khakeshü nunu puo ya kemesatho puo, puo la khashü sei morokesuo puo zokecü la.

¹⁰Siro mia puo puo zuo Israelmiapfü, mu puo puoe Ijiptmia, mu themia süue Israelmiako donu pra; sidi Israelmiapfü nuou mu Israel mia puo unie-e razhüchü nunu kegeita,

¹¹mu Israelpfü nuoue Thezau gei die kerhu pu di süu bie perhuwa. Sitse ukoe puo ze Mosa ki vor. Puo zuopfü za Shelomith, Dan yiemia, Dibri nuopfü,

¹²mu ukoe puo khapie ba, Jihova medo-u pie uko pesishü kemochie.

¹³Siro Jihovae Mosa ki:

¹⁴Razhüchüu nunu rüse diekepuu ze parlie; mu puo die kesi pete bu udzie pie puo tsü gei shülie, mu mechü kehou bu ketsie pie puo vawalie.

¹⁵Siro Israelko ki pushücie, kehoupuorei puo Kepenuopfü rüsekecüu puo kephouma toupfüpfü zotuo.

¹⁶Jihova za pu pesuokecüu pesiatuo. Mechü pete ketsie pie puo pu kepesuo-u vatuo. Solhimia rei khenu kelhouu rei, Thezau pu perhu ro, puo pesiatuo.

¹⁷Mia dukhrikecüu pesiatuo.

¹⁸Khunuo puo dukhriwa ro süu su latuo, kerheiro sou kerheirotuo.

¹⁹Mia puoe kekreimia puo bie kerünyiewa ro, puoe chükeshü tuoi puo gei rei chü lashütuo,

²⁰bietshekecü sou bietshekecü, themhi sou themhi, thehu sou thehu; rüza pie mia gei chükeshüu, puo rei süu pfütuo.

²¹Khunuo puo dukhriwa ro süu sou su latuo; mia dukhrikecüu pesiatuo.

²²Nie-e solhimia la mu khenukelhou-u la thezho puo setuo: Ae Jihova nie Kepenuopfü zocü la.

²³Sidi Mosae Israelko ki pushü; mu ukoe, rüsedie kepuu ze razhüchüu cie pralie, di ketsie pie puo vawa. Hai di Israelkoe Jihova Mosa ki diekhakeshü mhiei chülie.