Read Angami Naga Levimiako 26 Bible Online

Levimiako 26 - Angami Naga bible

Levimiako 26

¹Nie rüsuoketuo la, nie thuo nie la terhuo miarhi puorei chülie lho, siro sei ketsie dupie mharhi morei tsiepou puorei piesie doulie lho, mu nie ketsie mharhi pie nie kijü nu balie lho: Ae Jihova nie Kepenuopfü zo.

²Nie-e a sabatko zetuo mu a kemesachüu rhutuo: Ae Jihova zo.

³Nie-e a zhoko nu tuo mu dietho di a diekhakeshüko chü mu ze ro,

⁴ae puo teiki tei perüpie nie tsütuo, sitse kijüu gei mha lhou kra parlietuo, mu seiboko u si vüshütuo,

⁵mu nie lienyükelieu khubesi kerie kezie balietuo, mu khubesi riekelieu tsia vakecü kezie balietuo; mu nie niekhrüda cü nie kelhuo chütuo, mu nie kijü nu khrukhre di lhoutuo.

⁶Siro ae noune pie kijüu nu khashütuo, mu nie zhütsutuo, mu miapuorei nie bie kemichielie lho; siro a kijüu nu nhachü kekhriekezeiko whuowatuo, mu zhiechae nie kijü pfüthe volie lho.

⁷Mu nie-e nie ngumvümia whuotuo, mu uko nie mhodzünu zhiecha geinu tetsutuo.

⁸Nie mia pengoue mia krie puo whuotuo, mu nie mia krie puoe nyie ker whuotuo; mu nie ngumvümia nie mhodzünu zhiecha geinu tetsutuo.

⁹Mu ae nie vi medo di nie chü pekruo mu pekrashütuo, mu a nie ze dietseidiekhokelieu se balietuo.

¹⁰Nie-e rüwe ba pecha ketako cütuo, mu nie mha kesau se vorketuo la keweu bie kemesawatuo.

¹¹Mu ae nie donu a kebachü chülietuo, mu a ruopfüe nieko rütselie lho.

¹²Siro ae nie donu tuotuo, di nie Kepenuopfü chütuo, mu nie a themia chütuo.

¹³Ae Jihova nie Kepenuopfü, nie bu uko die chülie lhoü di ae Ijipt kijü nunu nie ze parkeshüu, mu ae nie vocie seiko bietshewate mu nieko bu tha pedu di tuoliete.

¹⁴Derei nie a dieze mo mu a diekhakeshü hako pete chü mo ro,

¹⁵mu nie a zhoko melie; mu a die khakeshüko mecü, sidi a diekhakeshüko chü mo mu dietseidiekho-u varhuo ro,

¹⁶a rei nie gei hau chütuo; a michie phikecü se nie gei vor shütuo, mu nie cü pejükecü, mu ruki di nie mhi bie kethachükecü, mu nie kerheiro bie pejüwaketuo, nie tsia vashü rei süu kemethuo chütatuo, nie ngumvümia thuo süu cülietatuo;

¹⁷ae a thuo nie petsoutuo, mu nie ngumvümia bu nie biewatuo, nie ngukemecüko nie mho dituo, mu mia nie whuozhü morei nie tatuotuo.

¹⁸Mu mha hako nu zorei nie a die rünyülie lho ro, a nie kephoumako la hade thenie pie nie pechütuo.

¹⁹Sidi a nie kemiakokecü kekuou bietshewatuo, mu nie teiko chüpie thegi mhie mu nie kijü chüpie mese mhiewatuo.

²⁰Mu nie kekuou kemethuo nu pevowatuo, nie kijüe rüchü mota mu kijü nu seiboko u si vüshü motaketuo la.

²¹Siro nie a petsouzhü zo mu a die rünyülie lho ro, nieko kephoumako la a nieko pechükecü kerieki de thenie khashütuo.

²²Mu a nhachü kekhrieko khapie nie donu shütuo, sükoe nie kinu nie nuonuo se setatuo, mu nie kicükiriko pekawatuo, mu nie chü petsawatuo, sidi nie chako bu ra ratatuo.

²³Mu nie pethazhü zorei nie-e rürei a kitsa vorlie mo, di a petsoutuo zo ro,

²⁴a rei nieko petsou sa votuo, nieko kephoumako la a thuo süde thenie nieko vütuo.

²⁵Siro a zhiecha se nieko gei vortuo, dietseidiekho-u khepuketuo la, mu nie-e nie nadiko nu vo kengulie ro, ae thesa ketsepie nie gei shütuo, di nie khapie nie ngumvümia dzie nu shüwatuo.

²⁶A nie niekhrüda bo-u bietshewa ro, thenumia ker-e mibou puo nunu nie niekhrüda rietuo, sidi nie niekhrüda mesi mejü la pie nie tsütuo; mu no cü rei nie kelhuo chülie lho.

²⁷Mu ha zorei nie a die rünyü mvü di a petsoutuo zo ro,

²⁸a rei noupfhü nunu nie petsou tuo zotuo, di nie kephoumako la süde thenie se nie pechütuo.

²⁹Nie-e nie nuo thepfunuoko chü cütuo, mu nie nuo thenunuoko chü cütuo.

³⁰Mu a nie chü kerükrieko pekawatuo, mu nie mharekethengu kethe ruosuobako dutshewatuo, di nie kesiamoko kelhoupie terhuomiarhi kesiamoko gei shüwatuo; mu a ruopfüe n rütsetuo.

³¹Mu a nie nadiko pekawatuo, mu nie kemesa chüko themia jüta tuo, mu a nie vie re kethenguko thengulie lho.

³²Ae nie kijü pekaperuowatuo, sidi nie ngumvümia vor sünu lhoukecüko bu u ngo zotuo.

³³Mu a nieko kezapie seyieko donu shüwatuo, mu a zhiechau zupie nie petsoutuo, di nie kijüu thedzükezei chütatuo, mu nie nadiko kaüruotatuo.

³⁴Sitse kijüue lieva chükezhü chie, süu sabat-u ze di ketheguo[23] zhü zotuo; mu nie bu nie ngumvü kijü nu ketuo ki, süki kijüue rüleituo, mu puo sabatko ze ketheguotuo.[24]

³⁵Süu lieva chükezhü chie puoe rüleizhü zotuo, nie puo gei lhoukeba ki sabat zha nhie kerülei nguliekemoko ngulietuo.

³⁶Siro nie baluokecüko, ae uko ngumvümia kijü nu thachümeziekecü ketsepie u melou nu shütuo; nhanyü hekeshü pfhe rei uko kechü petawatuo, mu ukoe mia zhiecha therhiekecü tuoitatuo, mu mia uko whuo kemo nu tetsutatuo.

³⁷Uko huoniehuo perhepfülietuo, mia u whuo morei zhiecha therhietuoü takezhü mhiei; mu nie ngumvümia mhodzünu thalieketuo kekuo puorei jütatuo.

³⁸Mu nie seyieko donu katatuo, mu nie ngumvümia kijüu thuo nie mezulietuo.

³⁹Nie donu rheikelieko nie kejo la nie ngumvümia kijü nunu nie meyhumezhie tuotuo; mu uko puonuoko kejo la rei ukoe meyhumezhie di lhoutuo.

⁴⁰Derei ukoe a gei kecürü tho chü mu a petsou di tuowa,

⁴¹di a bu uko petsou di uko ze ngumvümia kijü nu vowa shierei, uko u kejo mu u puonuoko kejo phralie; mu u nou zhürekemo-u chü kerünuolie mu uko kejo mu kekrükecüko chü kemezhü lalie ro,

⁴²ae Jakob ze dietseidiekhokelieu rükrashütuo, mu ae Isak ze dietseidiekhokelieu mu Abraham ze dietseidiekhokelieu rükrashütuo, mu ae kijüu rükrashütuo.

⁴³Derei kijüue uko bu puo khawa di zhütuo: sidi uko sa mo di lieko lieva chükezhü ki puo sabatko ze di rülei ketheguotuo;[25] mu ukoe u kejo la, mhachü kemezhü latuo, ukoe a rhükeshüko melie mu uko ruopfüe a zhoko rütsekecü la.

⁴⁴Derei ukoe u ngumvümia kijü nu tuokecü ki ae uko meliewa, mu a uko rütse di uko pekawa di uko ze dietseidiekhokelieu bierhuowalie lho: Ae Jihova uko Kepenuopfü zokecü la.

⁴⁵Derei ae uko zhazhü la u puotsanuoko ze dietseidiekhokelieu rükrashütuo; ae uko Kepenuopfü chüketuo la seyieko mhingu chü di Ijipt kijü nunu uko ze parshü: Ae Jihova zo.

⁴⁶Hako Jihova Sinai kijüthou geinu Mosa geinu puo mu Israelmiako donu khapie bakelie, ze morokesuoko, diekhakeshüko, mu thezhoko zo.