Read Angami Naga Levimiako 4 Bible Online

Levimiako 4 - Angami Naga bible

Levimiako 4

¹Jihovae Mosa ki pukecü,

²Israelko ki pushülie, themia kehoupuorei lekemo puo nu vo Jihova chü hienukecü puo chüwa di phoumata ro,

³mu süu zievo-uta ro, sidi puoe kejo se themiako gei vorwa ro, puo bu phoumakewau la thudonuo mesacü puo pie kephouma la ruosuo chü pie Jihova ki shücie.

⁴Puoe thudo-u ze Jihova mhodzünu kehou pfheki kikha ki vortuo, di puo dzie pie thudo-u tsü gei shütuo, di Jihova mhodzünu thudo-u dukhrituo.

⁵Siro kenhelieketa zievo-ue thudo-u zie huo pielie di kehou pfhekiu nu vortuo;

⁶mu zievo-u puo dziekinuo pie thezieu nu shü di kemesachü keyapfheu mhodzünu nu va thenie chü thezieu huo kegepie Jihova mhodzünu shütuo.

⁷Zievo-u thezie huo pie kehou pfhekiu nu keba mharekethengu kethe ruosuobau kia gei Jihova mhodzünu shütuo mu puoe thudo-u zie kepeshako rupie kethe ruosuo khakeshü la ruosuoba kehou pfhekiu kikha ki kebau phi nu shüwatuo.

⁸Kephouma ruosuo khakeshü thudo-u geinu puoe puoshuo pete bielietuo, puorierhuoko peteko,

⁹mu puo mecünie mu puoshuo puo chieca ki puo mecünie kuketuoko sa, mu puose gei khepfüketuou sa bielie.

¹⁰Vitho la ruosuo khakeshü ruotho-u mu thudo-u geinu biekelie mhie tou di, mu puo zievo-u kethe ruosuo khakeshü ruosuobau geinu hako theshütuo.

¹¹Derei thudo-u zhü mu puochü pete, puo tsü, puo phiko, puo rieko mu puoshuo sa,

¹²puoe thudo-u pete toupie razhüchüu cie pra thechü kemesa ki puo, mige lashükecü ki puo nu seipie mi chülie di thewatuo; mige lashüyakecü ki puo nu süu thewatuo.

¹³Mhanuü Israel mechü kehouu pete lekemo nunu kephouma tho puo chüwa di kehou silie mota liro, mu ukoe Jihova chü hienukeshüko puo chüwa di jota ro,

¹⁴mu uko kephouma chükewau si parta ro, kehouue kephouma ruosuo khashüketuo la thukro-u nunu thudo puo se kehou pfhekiu mhodzünu vortuo;

¹⁵mu mechü kehou nu phichüko bu Jihova mhodzünu nu uko dzie pie thudoyo tsü gei shü di, Jihova mhodzünu nu thudo-u dukhrituo.

¹⁶Sidi kenhelieketa zievo-ue thudo zie huo pie kehou pfhekiu nu vortuo.

¹⁷Sitse zievo-ue puo dziekinuo pie thezieu nu shü di kemesachüu keyapfheu mhodzünu nu va thenie thezieu huo kegepie Jihova mhodzü shütuo.

¹⁸Mu puoe thezieu huo pie Jihova mhodzünu keba kehou pfhekiu nu ruosuobau kia gei shütuo; tsiu puoe thezie keshako rupie kethe ruosuo khakeshü ruosuobau kehou pfhekiu kikha ki kebau phi nu shüwatuo.

¹⁹Mu puoe puo geinu puoshuo pete bielietuo di ruosuobau geinu thetuo.

²⁰Puoe thudo-u pie hakemhie chütuo; kephouma ruosuo nu khakeshü thudo-u pie chükecü tuoi puoe hau pie sükemhie chütuo; zievo-u uko la kevi kechü chütuo; sidi uko kephouma vawatuo.

²¹Puo thudo-u toupie razhüchüu tse pra di, puoe thudo kerieu thekewa mhie süu thewatuo; süu pie mechü kehou la kephouma ruosuo khakeshüu chütuo.

²²Krütamia puoe phoumawa, mu puoe Jihova puo Kepenuopfü chü hienukeshüko puo chüwa di jota

²³mu puo kephouma chüwaketau pupie puo pesiwata ro, puoe ruosuo khashüketuo la temvüchü ciewa kemo puo se vortuo,

²⁴di puo dzie pie temvüu tsü gei khashütuo, sidi ukoe Jihova mhodzünu kethe ruosuo khakeshüu dukhriyakecü chüu nunu süu dukhrituo; süue kephouma la ruosuo khakeshü puo zo.

²⁵Süsie zievo-u puo dziekinuo pie kephouma la ruosuo khakeshü zie huo pielie di kethe ruosuo khakeshü kia vashütuo, sidi thezie keshako rupie kethe ruosuo khakeshü ruosuobau phi nu shüwatuo.

²⁶Puoe puoshuo pete pie ruosuobau geinu thetuo; vitho la ruosuo puo khakeshü shuo mhie di, sidi zievo-ue puo kephoumau la puo phou mesakelie chütuo, di puo kephouma valietuo.

²⁷Miahoumia puoe Jihova puo bu chü hienu die khakeshü puo chüwa di jota.

²⁸Siro puo kephouma chükewau pupie puo pesishüwata ro, puoe phoumawaketau la temvü, mvükrü ciewa kemo puo se vortuo.

²⁹Mu no n dzie pie kephouma la ruosuo khakeshüu tsü gei shütuo, sidi kethe ruosuo khakeshü chüu nunu kephouma la ruosuo khakeshüu dukhrituo.

³⁰Zievo-ue puo dziekinuo pie puo zie huo bielie di kethe ruosuo khakeshüu kia vashütuo, mu thezie keshako rupie ruosuobau phinu shüwatuo.

³¹Puoe puoshuo pete bielietuo, vitho la ruosuo khakeshüu geinu puoshuo biekelie mhiei. Sidi zievo-ue süu pie ruosuobau geinu thetuo, Jihova ki puore kethengu puo chüketuo la; mu zievo-ue puo la kevikechü puo chütuo, sidi puo kejo vawatuo.

³²Puoe kephouma la ruosuo khashütuoü di tekuo puo se vor ro, puoe puoü kejo jükecü puo se vortuo,

³³sidi puo dzie pie kephouma la ruosuo khakeshü tsü gei shütuo, sidi kephouma la ruosuo khakeshü pie kethe ruosuo khakeshü chüu nu dukhrituo.

³⁴Sitse zievo-ue puo dziekinuo pie kephouma ruosuo khakeshüu zie huo bielie di kethe ruosuo khakeshü ruosuobau kia vashütuo, sidi thezie keshako rupie ruosuobau phinu shüwatuo.

³⁵Mu puoe puoshuo pete bielietuo, vitho la ruosuo khakeshü tekuonuou geinu puoshuo biekelie mhiei, sidi zievo-ue ruosuobau geinu süu thetuo, mi pie Jihova ki ruosuo khakeshüko geinu; mu zievo-ue puo kephouma chükewa la puo phou mesakecü chütuo, sidi puo kejo vawatuo.