Read Angami Naga Levimiako 5 Bible Online

Levimiako 5 - Angami Naga bible

Levimiako 5

¹Mhanuü mia puo kephouma chüwa, mu no süu ngu morei si di zhapu chüshülie vi ba zo, derei mhapuorei pu mo ro, no siazha ngulietuo.

²Morei miapuoe mha mesa kemo puo biewa, nhachü mesa kemo kesiamo morei khurinuo mesakemo kesiamo shierei, puoe ngu mo di nyüwa ro, puoe mesa motatuo, puoe jotatuo.

³Morei noe themia mesakemo puo biewa, mesakemo-u puo thuo kehoupuo shierei, puoe si ba mo di nyüwa, derei puoe silieta tse puoe jotatuo.

⁴Morei mia puoe meyhu di puotie se mha kesuo morei mha kevi chütuoü rüsewa, kemeyhu rüse kehoupuorei themia se rüsewa, mu puo süu le tuo mo di puo süu süsienu silie tse, puoe hako kehoupuonurei jotatuo.

⁵Mia puoe mha hako kehoupuonurei jota ro, puoe phoumaketau phratuo.

⁶Mu noe phoumawaketa la kejo ruosuo khashüketuou se Jihova ki vortuo, kephouma ruosuo la tekuokro nu, tekuokrü, tekuo morei, temvü puo se vortuo; mu zievo-ue puo kephouma sou nu süu khashütuo.

⁷Derei puoe tekuo puo khashülie re ro, puoe phoumawaketa ruosuo la mekhru kenie morei paruonuo kenie se Jihova ki ruosuo khashütuo; puoe kephouma ruosuo khashüketuo la mu kekreiu kethe ruosuo la.

⁸Puoe sünie se zievo-u ki vortuo, sidi zievo-ue kephouma ruosuou khashü rietuo, puoe puo vo-u kereitheshü di puo tsüu biewatuo, derei biethe zowalie lho,

⁹puoe kephouma la ruosuo khakeshüu zie huo kegepie ruosuobau tsei vashütuo, mu thezie keshako pezupie ruosuobau phi nu shüwatuo; hau kephouma la ruosuo khakeshü puo zo.

¹⁰Süsie puoe kekreiu pie thezho ki ze kethe ruosuo khashütuo; mu zievo-ue puo kephouma la puo phou mesakecü chütuo, sidi puo kephouma vawatuo.

¹¹Derei puoe mekhru kenie morei paruonuo kenie rei khashülie re ro, puoe phoumakewa ruosuo la thou kevitho efa ker za puo se vortuo, kephouma ruosuo khashüketuo la; puoe tier pie sünu shülie lho, süue kephouma ruosuo khakeshü puocü la.

¹²Mu puoe süu se zievo-u ki vortuo, mu zievo-u süu dzielhi puo pie kerükra yau chü di ruosuobau geinu süu thetuo; mi geinu ruosuo khapie Jihova ki keshü puo zo.

¹³Hakemhie di zievo-ue puo mha kehoupuonurei kephouma chükewa la puo phou mesakecü chütuo, mu puo kephouma vawatuo. Siro peshapie kebako we zievo-u latuo, lhacülhale ruosuo khakeshü tuoi.

¹⁴Süsie Jihovae Mosa ki:

¹⁵Kehoupuorei mha pie puo pelekeshüu nu pecülie mota di lekemo puo nu Jihova vie kemesa kehoupuonurei phoumawa ro, puoe kephouma ruosuo chüpie Jihova tsütuo, tekuo kro nu tekuochü ciewa kemo puo se vortuo, mu no rakachü pie shekel kechü, kemesachü nu shekel seyakecüu le di puoma thotuo; süue kejo la ruosuo khakeshü puo zo.

¹⁶Puoe mha kemesau se pecü mokewa la thesu khashütuo, mu puoe pengou za puo pie bashü di pie zievo-u tsütuo; mu zievo-ue kejo la ruosuo khakeshü tekuochüu pie puo la puo phou mesakecü chütuo, di puo kephouma vawatuo.

¹⁷Mia puoe Jihova chü hienu di diekhakeshüko puo chüwa di phoumata, mu puoe süu si mo, sizoü rei puoe jotatuo mu kejo-u toupfü zotuo.

¹⁸Puoe tekuokro nunu tekuochü ciewa kemo puo se zievo-u ki vortuo, kephouma la ruosuo khakeshü ma thokeshü mhiei di, sidi zievo-u bu puoe lekemo nu kekrükewau la, puo lanu puo phou mesakecü chütuo, sidi puo kephouma vawatuo.

¹⁹Haue kejo la ruosuo khakeshü puo zo, no Jihova mhodzünu kejo chükewa la.