Read Angami Naga Levimiako 6 Bible Online

Levimiako 6 - Angami Naga bible

Levimiako 6

¹Jihova Mosa ki:

²Mia puoe puo zanuou mha pie puo pelekeshüu nu dietho mota di puo zanuou sewa, morei mia vie selie, morei puo zanuou peseta, di Jihova mhodzü phoumawa.

³Morei puoe mha puo ngulie derei medata, mu themia mha chü di phoumatayakecüko nu meda di rüse,

⁴mu phoumawa di jota ro, puoe mia vie sekelieu, morei mia pese di piekelieu, morei mia mha pie puo pelekeshüu nu, morei mha pejükewa ngukelieu nu,

⁵morei mha puo la puoe meda di rüsekewau puoe kha tsei lashütuo, mu puoe kejo la ruosuo khakeshü nhie pengou za puo pie ba sashütuo, di supuo vie shikecüu tsütuo.

⁶Mu puo kejo la Jihova ruosuo khakeshüu se zievo-u ki vortuo, tekuokro nunu tekuochü kemesa puo, kejo ruosuo khakeshüu nu tuoi puo thuo puo ma tholie.

⁷Sidi zievo-ue Jihova mhodzünu puo phou mesakecü chütuo, mu puoe kehoupuorei chüwa di joketau la puo kejo vawatuo.

⁸Jihovae Mosa ki:

⁹Aron mu puo nuonuo thepfuko ki hamhie di pushücie, kethe ruosuo khashüketuo la thezho hauha, kethe ruosuo khakeshüu bu teizei pete ruosuobau mho miphu gei zha khise tsotuo, mu ruosuobau gei mi bu tu sei batuo.

¹⁰Mu zievo-ue puo linen pfhenei selietuo mu puo linen pfhenei pekhroko pie puo gei shülietuo, mu puoe migeko pie phi ruosuobau gei mi bu kethe ruosuo khakeshü the pejükewau khieki shütuo.

¹¹Süsie puo pfheneiko rhuowa di pfhenei kekrei selietuo, di migeko pie razhüchüu cie vo thechü kemesa puo nu shüwatuo.

¹²Ruosuobau gei miu bu tu sei batuo, puo bu mhetalie lho, zievo-ue teisoduü sei pie vo sügei nu thetuo, mu puoe kethe ruosuo khakeshü pie puo gei shü menuoshütuo, di puo geinu vitho la ruosuo khakeshü shuoko thetuo.

¹³Ruosuobau gei mi bu tu sei batuo, süu bu mhetalie lho.

¹⁴Mu lhacülhale ruosuo la thezho hauha. Aron nuo thepfukoe süu pie Jihova mhodzünu ruosuobau dzütsa nu khashütuo.

¹⁵Mu uko mia puo bu thou ruosuo khakeshüu nunu thou dzielhi puo mu tier sa mu thou pete sa pielie di ruosuobau geinu puo kerükra yau chü di thetuo, Jihova ki puore kethengu puo chütuo.

¹⁶Mu keshako Aron mu puo nuonuoko thuo cütuo; süu khrei sa mo di thechü kemesa puo nunu cütuo; kehou pfhekiu kitiezha nunu ukoe süu cütuo.

¹⁷Süu khrei sa di rielie lho. Mi se a ki ruosuo khakeshü nu, ae süu pie uko ya chüketuo la khashü; süu mha kemesatho puo; kephouma la ruosuo mu kejo la ruosuo khakeshü tuoikecü puo zo.

¹⁸Aron nuonuoko donu thepfumia kehoupuorei süu cülie vi, mi se Jihova ki ruosuo khakeshüko nunu, nie nuosenuoyie pete nu kechachie la pushüwaketa tuoi; kehoupuorei süko nyükecüu mesatatuo.

¹⁹Jihovae Mosa ki hakemhie pushü:

²⁰Puo kenhekelie teisozha nhie Aron mu puo nuo thepfuko Jihova ki ruosuo khashüketuo hauha: Thou kememhie efa ker za puo pie lhacülhale ruosuo khashü seiyakecüu chütuo. Süu ketou puo pie khise gei mu ketou puo pie thevatie khashütuo.

²¹Shüthuoli nunu tier sa di süu rietuo; no süu kerei menuo se vor morosuo, lhacülhale pie ruosuo khakeshü nu tuoi di niekhrüda chüpie vor morosuo, sidi Jihova ki puore kethengu puo la khashü morosuo.

²²Aron nuo thepfuko donu, puo sou nu zievo chütuoü di kenhelieketau bu kechachie la pushüwaketa tuoi, süu pie Jihova ki khashütuo; süu pete the zotuo.

²³Zievo-ue lhacülhale pie ruosuo khakeshü kehoupuorei pete the zotuo; süu cülie lho.

²⁴Jihova Mosa ki:

²⁵Aron mu puo nuo thepfuko ki pushülie: Hauha kephouma la ruosuo kechü zho-u Jihova mhodzünu nu kethe ruosuo khakeshüu dukhrikecü chüu nunu kephouma ruosuo khakeshüu dukhrituo; hauha kemesatho.

²⁶Kephouma la ruosuo khakeshü zievo-u bu süu cütuo; kemesachüu nu, kehou pfheki kitiezha nunu süu cütuo.

²⁷Mha kehoupuorei süu chü nyüshü ro mesatatuo, mu puo zie huoyo rei kegepie pfhe vawa ro, noe thechü kemesa puo nunu kegepie vawaketa süu menyituo.

²⁸Mu rünyoli nunu be ro, süu biephrowatuo; derei merenyili puo nunu süu be ro, süu kezhüwatuo. Sidi dzü nunu kenouwatuo.

²⁹Zievoko donu thepfuko pete süu chülie vi; süu mha kemesatho.

³⁰Derei kemesachüu nunu thephou mesakecü chüketuo la, kephouma la ruosuo khakeshüu, puo geinu puo zie huoyo rei bielie di se kehou pfhekiu nu kevor-u we cülie lho; mu pie süu thetuo.