Read Angami Naga Levimiako 7 Bible Online

Levimiako 7 - Angami Naga bible

Levimiako 7

¹Haue kejo la ruosuo khakeshü zho-u. Süue kemesatho;

²ukoe kethe ruosuo khakeshü dukhrikecü chüu nunu kejo la ruosuo khakeshüu rei dukhrituo, mu süu zie pie ruosuoba lutsahatsa vatuo.

³Mu puoshuo pete khashütuo, puomei shuou, puorierhuoko,

⁴puo mecünie gei khepfüketuoko mu puo mecünie sa bielietuo;

⁵sidi zievo-ue hako pie Jihova ki mi nu ruosuo khakeshü puo chü di ruosuobau gei thetuo; haue kejo la ruosuo khakeshü puo zo.

⁶Zievoko donu thepfumia kehoupuorei süu cülie vi, thechü kemesa puo nunu süu cütuo; süu kemesatho puo.

⁷Kejo ruosuo khakeshüue kephouma ruosuo khakeshü mhie zo, unie la thezho puo zo; mu pie thephou mesakecü zievo-u bu süu lietuo.

⁸Mu themia kehoupuo la shierei kethe ruosuo khakeshü zievo-ue kethe ruosuo khakeshü zhüu lielietuo.

⁹Mu lhacülhale pie ruosuo khakeshüu miphu nunu rie mu li nu morei shüthuoli nunu kethuotuo.

¹⁰Mu lhacülhale pie ruosuo nu khakeshü tier pie kerei morei peso shierei Aron nuo thepfuko vie chütuo, mu zatou phretuo.

¹¹Mu haue mia puo bu vitho ruosuo khapie Jihova ki shülie kevi zho-u.

¹²Puo kethezie la süu khashü ro, puoe khreiü shükemo niekhrüda tier sa kerei di; khreiüshükemo niekhrüda rüpfüpfekecü tier pie kenhe, mu thou kevitho pie chükecü niekhrüda tier pie kerei menuolie di kethezie ruosuo khashütuo.

¹³Kethezie la vitho ruosuo khakeshü ki puoe khreiü shükemo niekhrüdako khashütuo.

¹⁴Mu puoe Jihova ki ruosuo khakeshü la niekhrüda puo puo khashütuo; süue vitho ruosuo zieu kelhoukeshü zievo-u vie chütuo.

¹⁵Mu kethezie la vitho ruosuo khakeshü muo-u ruosuo khakeshü nhie cülie morosuo, puoe themuo süu khapie ba khise tso suo.

¹⁶Derei puo ruosuo khakeshüu phrakeshü morei mianyü ruosuo puo ro puoe ruosuo khakeshü nhie süu cütuo mu peshapie kebako süsie nhie cütuo,

¹⁷derei ruosuo khakeshü muo-u zha se ketso pesha ba ro süu mi pie thewatuo.

¹⁸Vitho la ruosuo khakeshü muo-u zha se nhie cü ro, ruosuo khakeshüu lie mvütatuo, morei ruosuo-u pie puo vie tho motatuo; süu pie mha kerütsethotatuo, mu kehoupuorei süu cü ro kejo-u toupfütuo.

¹⁹Themuo-u se vo mha mesa kemo nyüwa ro, süu cülie lho; mi pie süu thetuo, kehoupuorei mesakecümia themuo cülie vi,

²⁰derei mesakemo puo puo gei ba di Jihova vitho la ruosuo khakeshü cükecüu, themia süu puo themiako donu nu puo dathewatuo.

²¹Mu kehoupuorei mesakemo puo bie ro, themia mesakemo puo morei khunuo mesakemo puo shierei, morei mesakemo kerütse puo shierei, Jihova vitho la ruosuo khakeshüko cü ro, themia süu puo themiako donu nu puo dathewatuo.

²²Jihovae Mosa ki:

²³Israelko ki pushülie: Niekoe chüshuo, thudo, tekuo morei temvü shuo rei cülie lho.

²⁴Khunuo puo puo thuo siaketau shuo, mu khunuo bu ciechücierhawaketau shuo pie mha kehoupuorei chülie vi, derei nieko we süu cülie lho.

²⁵Kekreilamonyü themia kehoupuorei mi pie Jihova ki ruosuo khakeshü nu sekecü khunuou chü cükecüu puo themiako donu puo dathewatuo.

²⁶Sizomonyü niekoe nie kebachü kehoura rei thezie cülie lho, pera morei khunuo zie shierei.

²⁷Kehoupuorei thezie kecüu, puo themiako donu nu süu dathewatuo.

²⁸Jihovae Mosa ki:

²⁹Israelko ki pushülie, Jihova ki puo ruosuo khakeshüu puo ruosuou se Jihova ki vortuo; puo vitho ruosuo khakeshü nunu.

³⁰N thuo n dzie pie mi nu ruosuo khakeshüu se Jihova ki vortuo; noe puoshuo mu puo khouzü se vortuo, puo khouzü pie Jihova mhodzünu kegekecü ruosuo puo chülieketuo la.

³¹Zievo-ue puoshuo pie ruosuoba geinu theshütuo, derei puo khouzüue Aron mu puo nuo thepfuko la zotuo.

³²Mu puodo thezatsa pie noe u vitho ruosuo nunu khakeshü puo chü di se zievo-u tsütuo;

³³Aron nuo thepfuko donu vitho la thezie mu puoshuo ruosuo khakeshüu puodo thezatsa pie puo ya chütuo.

³⁴Kekreilamonyü ae Israelko ki nunu, uko vitho la ruosuo khakeshüko donu nu, puo khouzü kegeshükecüu mu puodo khakeshüu pielie di khapie Aron zievo-u mu puo nuo thepfuko tsüwate, Israelko kinu khapie uko ya chü seiketuo la.

³⁵Hauha mi pie Jihova ki ruosuo khakeshü nunu Aron mu puo nuo thepfuko ya chükeshüu, uko bu Jihova zievo chütuoü di uko khashüwakecü nhienu chü kemesapie uko tsüwaketau,

³⁶Jihovae uko kenhekecü teisozha nhie Israelmiako bu pie uko tsünu di diekhakeshü; uko nuosenuoyie pete nu hau uko ya chü seituo zotuo.

³⁷Hau kethe ruosuo, lhacülhale ruosuo, kephouma ruosuo, kejo ruosuo kha kemesakeshüu, mu vitho ruosuo la khakeshü zho-u zo.

³⁸Jihovae Sinai kijüthou geinu diekhakeshü, Israelmiako bu Sinai nhatsa nu uko ruosuo se Jihova ki vonu di diekhakeshüu zo.