Read Angami Naga Levimiako 8 Bible Online

Levimiako 8 - Angami Naga bible

Levimiako 8

¹Jihovae Mosa ki pukecü:

²Aron mu puo nuo thepfuko zelie, mu uko pfheneiko, kenhekecü tier-u, kephouma ruosuo la thudo-u, tekuo chünie, mu khreiü shükemo niekhrüda rhau sa selie;

³sidi kehou pfhekiu kikha kinu mechü kehou pete kie kengushülie.

⁴Sitse Mosae Jihova diekhakeshü kemhiei chülie; sidi mechü kehouu bu kehou pfhekiu kikha kinu kengulie.

⁵Mosae mechü kehou ki pukecü, “Hau Jihova chünu di diekhakeshüu zo” sishü.

⁶Siro Mosae Aron mu puo nuo thepfuko ze vorlie di dzü pie uko khrüwa.

⁷Sidi puoe boulieu pie puo geishü, mu terhau pie puo gei shüshü, tsiu pfhedzieu pie puo pedzieshü, mu zievo boulieu pie puo gei shü, mu zievo boulieu chiepha do menuokelieu pie puo chie whi di boulieu phapie puo kushü.

⁸Mu puoe uka kewheu pie puo gei shü, sidi mha kewheu gei Urim mu Thumim khashü.

⁹Siro puoe tsüzeu pie puo tsü gei shü, mu u mhodzütsa tsüzeu gei puoe suna rütsonyie kemesa tsüreu khashü, Jihovae Mosa ki diekhakeshü tuoi.

¹⁰Süsie Mosae u kenhekecü tier-u selie di pie kerüsuo pfhekiu mu mha puo nu keba pete kenheshü, di uko chü kemesashü.

¹¹Siro puo tier huo kegepie ruosuobau va thenie vashü, mu pie ruosuobau nu puokhou puoli pete, mu puo seikhouko mu kedoubau chü kemesaketuo la.

¹²Mu puoe kenhekecü tier huo rupie Aron tsü gei shü, di puo kenheshü, puo chü kemesaketuo la.

¹³Mu Mosae Aron nuo thepfuko ze vorlie, di boulie pie uko bu boulielie mu terha pie uko geishü, mu tsüre pie uko tsü gei khashülie, Jihovae Mosa ki diekhakeshü tuoi.

¹⁴Süsie puoe kephouma la ruosuo khashüketuo thudo-u se vorlie; sitse Aron mu puo nuo thepfuko uko dzie pie kephouma ruosuo la khakeshü thudo-u tsü gei shü.

¹⁵Mu Mosae süu dukhrilie, sidi puo zie pielie di puo dziekinuo pie ruosuobau kia gei va voshü, sidi ruosuobau chü kemesashü, sidi thezieu rupie ruosuobau phinu shüwa, sidi miu chü kemesashü. Puo la thephou mesakecü chüketuo la.

¹⁶Mu puoe puorierhuoko selie, mu puose gei rhüpfüketuou rei sa, mu puo mecünie shuo sa, sidi Mosae ruosuobau geinu süko theshü.

¹⁷Derei thudo-u mu puo zhüko, puo chü, mu puo buo, puoe pie casie nu mi nu thewa, Jihovae Mosa ki diekhakeshü tuoi.

¹⁸Süsie puoe kethe ruosuo la tekuochüu khashü mu Aron mu puo nuo thepfuko uko dzie pie tekuochüu tsü gei shü.

¹⁹Mosae süu dukhrilie, di puo zie kegepie ruosuobau va houshü.

²⁰Mu tekuochüu khrie petselieta tse, Mosae puo tsüu, puo khrieko mu puoshuoko theshü.

²¹Sidi dzü pie puo rieko mu puo phiko khrüwa di Mosa ruosuobau geinu tekuou pete theshü di süu bu kethe ruosuo, puore kethengu, mi nu thepie Jihova ki khakeshü puo, Jihova Mosa ki diekhakeshü tuoi.

²²Süsie puo tekuochü kekreiu ze vor, chü kemesakelie tekuochüu; sitse Aron mu puo nuo thepfuko u dzie pie tekuochüu tsü gei shü.

²³Mu Mosae süu dukhrilie, di puo zie huoyo pie Aron nyie puo zatsa puo nyietshe gei kenheshü, mu puo dziekrü puo zatsa mu puo phikrü puo zatsa vashü.

²⁴Süsie Aron nuo thepfuko ze vorlie, di Mosae thezieu huo pie uko nyietshe u zatsa kenheshü mu u dziekrü u zatsa mu u phikrü u zatsa kenheshü; mu Mosa thezieu kegepie ruosuobau va houshü.

²⁵Mu puoe puoshuou, puomei shuou mu puorierhuo gei keba pete, mu puose gei rhüpfüketuou, mu puo mecünie shuo sa, mu puo do puo zatsa sa selie.

²⁶Mu Jihova mhodzünu keba khreiü shükemo niekhrüda rhau nunu puoe khreiü shükemo niekhrüda puo, mu tier sakecü niekhrüda puo, mu rüpfükecü niekhrüda puo chüpielie, di süko pie puoshuo gei mu puodo puo zatsa gei shülie;

²⁷puoe hako pete pie Aron mu puo nuo thepfuko dziezhü nu shü di Jihova mhodzünu piesie kegekecü ruosuo chüshü.

²⁸Sitse Mosae uko dzie nunu süko pielie, di chü kemesakecü ruosuo, puore kethengu, mi pie Jihova ki ruosuo chüketuo la ruosuobau geinu süko theshü.

²⁹Siro Mosae puo khouzüu pielie di Jihova mhodzünu kegekecü ruosuo kechü la kegeshü, sidi chü kemesakelie tekuochüu süue Mosa yau, Jihova Mosa ki diekhakeshü tuoi.

³⁰Süsie Mosae kenhekecü tier-u huo mu ruosuoba gei keba thezie huo pielie, di kegepie Aron mu puo pfheneiko vashü. Mu puo nuo thepfuko mu uko pfheneiko rei vashü, sidi puo Aron mu puo pfheneiko, puo nuo thepfuko mu u pfheneiko chü kemesalie.

³¹Siro Mosae Aron mu puo nuo thepfuko ki pukecü, “Kehou pfhekiu kikha kinu themuou chalie, di sükinu süu mu chü kemesakelie ruosuo rhau nu keba niekhrüdau sa cülie, ae ‘Aron mu puo nuo thepfuko bu süu cütuo’ idi diekhakeshü tuoi.

³²Siro themuo mu niekhrüda peshapie kebako mi pie thewatuo.

³³Mu noe zha thenie kehou pfhekiu kikha ciepralie lho, n chü kemesakecü zhako tseita kemochie, n chü kemesakecü zha thenie lietaketuo la.

³⁴Jihovae n la kevi chüketuo la, thie chükecü mhiei chünu di diekhashüwate.

³⁵Noe teizeiteiso zha thenie kehou pfhekiu kikha ki batuo, sidi Jihova chünukeshüko chütuo, no siata molieketuo la; kekreilamonyü ae diekhashüwaketa la” sishü.

³⁶Mu Aron mu puo nuo thepfukoe Jihova Mosa geinu diekhakeshü pete chülie.