Read Angami Naga Levimiako 9 Bible Online

Levimiako 9 - Angami Naga bible

Levimiako 9

¹Zha thetha nhie Mosae Aron, puo nuo thepfuko mu Israelmia pehüko kielie.

²Puoe Aron ki pukecü, “Kephouma ruosuo la thudo yopuo selie, mu kethe ruosuo la tekuochü puo selie, kenienie rei ciewa kemo phretuo, sidi sünie pie Jihova mhodzünu shülie.

³Sidi Israelmiako ki, ‘Kephouma ruosuo la mvüdo puo selie, mu kethe ruosuo la mithunuo yopuo mu tekuonuo yopuo, kenienie rei cie puo nuo, ciewa kemo selie;

⁴mu vitho ruosuo la thudo puo mu tekuochü puo selie, Jihova mhodzünu ruosuo chüketuo la, mu siro tier pie kereikecü lhacülhale ruosuo rei sa; kekreilamonyü Jihovae thie n pengushütuo’ ” sishü.

⁵Mu ukoe Mosa pukeshü pete se kehou pfhekiu mhodzünu vorlie, mu mechü kehou pete vor Jihova mhodzünu thalie.

⁶Mosae sie, “Jihovae nie bu chünu di diekhakeshüu hau; mu Jihova zapuzayieu pie nie pengushüketuo la” si.

⁷Süsie Mosae Aron ki, “Ruosuobau penuo vorlie, sidi n kephouma ruosuo-u mu kethe ruosuou khashülie, mu n thuo n la mu themiako la thephou mesakecü chülie, Jihova diekhakeshü mhiei” sishü.

⁸Süla Aron-e ruosuobau penuo volie, di kephouma ruosuo mithunuoyo dukhrilie, süu puo thuo puo la.

⁹Mu Aron nuo thepfukoe thezieu pie puo tsüshü mu puoe puo dziekinuo pie thezieu nu shü di süu pie ruosuobau kia gei shü tsiu thezieu rupie ruosuobau phi nu shüwa;

¹⁰derei puoe kephouma ruosuou nunu puoshuo, puo mecü mu puose gei khepfüketuou pie ruosuobau geinu thewa, Jihova Mosa ki diekhakeshü tuoi.

¹¹Puochü mu puozhü we casie nu puoe mi pie thewa.

¹²Süsie puoe kethe ruosuou dukhrilie; mu Aron nuo thepfukoe puo zie pie puo tsüshü, mu puo süu kegepie ruosuobau khie lutsahatsa vashü.

¹³Siro ukoe kethe ruosuou khapie puo tsüshü, chükhrie puo puo idi mu puotsü sa, mu puoe süko pie ruosuobau geinu thewa.

¹⁴Puoe puo rieko mu puo phiko khrüwa, sidi ruosuobau geinu kethe ruosuo la khakeshü sa süko thewa.

¹⁵Süsie puo themiako ruosuou khashü mu themiako kephouma la ruosuo khashüketuo temvüu selie, di süu dukhrilie, di puoe kephouma la süu khashü, kephouma ruosuo khakeshü kerieu tuoi.

¹⁶Mu puoe kethe ruosuou khashü, mu thezho khakeshü mhie di khashü.

¹⁷Siro puoe lhacülhale ruosuo khashü, sidi süu puo dzie ketshu pielie, di khise gei kethe ruosuo khakeshüu zomonyü süu rei pie ruosuobau geinu theshü.

¹⁸Siro puo themiako la vitho ruosuo khakeshü thudo-u mu tekuochüu rei dukhrilie; mu Aron nuo thepfukoe puo zie pie puo tsüshü, mu puoe süu kegepie ruosuobau khieümhou vashü.

¹⁹Siro thudo-u mu tekuochüu shuo, puomei shuou, puorierhuoko, puo mecü[1] mu puose phrie rei khashü;

²⁰mu ukoe puoshuo pie puo khouzü geishülie, sidi puoe ruosuobau geinu puoshuo the pekruwa,

²¹derei Aron-e puo khouzü mu puodo thezatsa pie sie kegekecü ruosuo la Jihova mhodzünu kegeshü; Mosae diekhakeshü tuoi.

²²Süsie Aron-e puo dzie yhapie themiako kitsa shü di japie uko tsüshü, sidi puoe kephouma ruosuo; kethe ruosuo, vitho ruosuoko nunu kerta.

²³Siro Mosa mu Aron unie-e kehou pfhekiu nu leta, mu unie la par tse japie themiako tsüshü, sidi Jihova zapuzayieu themiako pete pengushü.

²⁴Jihova mhodzünu mi par di kethe ruosuo-u mu ruosuoba gei chüshuo-u the pejüwa; mu themiako süu ngushü tse ukoe melie petoshü, di tetsu zerepfü zhüta.