Read Angami Naga Jeremia 1 Bible Online

Jeremia 1 - Angami Naga bible

Jeremia 1

¹Jeremia, Hilkia nuou, Benjamin kijü nu Anathoth nu zievoko mia puo die:

²Amon nuou Josia, Juda kijü nu dikelie cie kerese cie, Jihova die puo ki vor.

³Süusü Juda kediu Josia nuou Jehoiakim tei ki rei vor, mu Juda kediu Josia nuou Zedekia dikecü teicie kerepuo thela, thekhrü pengouu nu Jerusalem ze mia die chü voketa ketso.

⁴Siro Jihova die a ki vor di sie,

⁵“Ae n zuo va nu n rhikelie mhodzü n si, tsiu n penuokelie mhodzü a n chü kemesaliete; a n bu seyieko ki siedzekesimia puo chütuoü di petholiete” si.

⁶Sitse ae sie, “He-i Niepuu, Ukepenuopfü! A die pulie si mo ketho zo, nhicumia puo zoluoe” si.

⁷Derei Jihova a ki, “A nhicumia puo zoluoe, sikecü pu hie, kekreilamonyü noe a n ketsekeshü pete ki vo zotuo, tsiu a n ki diekhakeshü pete no pu zotuo.

⁸Uko prei hie, a n zetuo di n kelalie zotuocü la, Jihovae siya” sishü.

⁹Süsie Jihovae puo dzie yhapie a tie nyüshü, sidi Jihovae a ki, “Tsie a dieko pie n tie nu shüshüte ho.

¹⁰Harie, thie a n pie seyieko mu kedirüvieko mho shüwate, phewa mu shükhrüwa, peka mu kelhouwa, tsiu chüshü mu pelhoushüketuo la” ita.

¹¹Siro Jihova die a ki vor di pukecü, “Jeremia, no kedipuo ngu ba ga?” si. Sitse A sie, “A almond seico[1] puo ngu balie” sishü.

¹²Sitse Jihova a ki, “No ngu touta zo, kekreilamonyü a a dieu chüshütuoü süu meho ba”[2] si.

¹³Süsie Jihova die va kenieu a ki la vor di sie, “No kedipuo ngu ba ga?” si. Sitse a sie, “A gali mekhrokeba puo ngu ba, süu pesotsanu rülhi kekreitsa va ba” sishü.

¹⁴Sitse Jihova a ki: Pesotsa nu kepeka par di kijüu nu ketuo themia pete gei votuo.

¹⁵Kekreilamonyü a tsie pesotsa kedi seyieko pete kieshütuo, Jihovae siya; mu ukoe vortuo, sidi uko pete u kediba chü pie Jerusalem kharu nu shülie di, sü khieümhoura dahouko pete, tsiu Juda nadiko pete petsoutatuo.

¹⁶Sidi a uko petsou di uko dienya kecütuo, süusü uko rügerüzhü di, ukoe a khakegewatakecü la, sidi uko ruosuo chüpie terhuo kekrei tsü, mu u thuo u dzie mhatho rüsuo tuote.

¹⁷Derei no we n chiephalie, sielie, sidi a n ki diekhakeshü pete se uko ki pushülie. Uko mhodzünu tetsuta hie, mo liro a uko mhodzünu nu n pekrüshütuo.

¹⁸Kekreilamonyü a kitsa nu n bu kijü perhieketuo la n chüpie dahou baketa nadi puo, thegi pie kechü co puo, tsiu merenyi pie kechü sozha puo chüshüte, Juda kediko, kedinuoko, zievoko, mu kijü nu themianuoko, petsoulietuoü di.

¹⁹Ukoe n perhietuo; derei uko n penyülie lho; kekreilamonyü n kelalieketuo la a n ze tuo zo, Jihova siya.