Read Angami Naga Jeremia 11 Bible Online

Jeremia 11 - Angami Naga bible

Jeremia 11

¹Jihova die Jeremia ki kevor:

²Dietseidiekhokelie hau dieko rünyüshücie, sidi se Judako mu Jerusalem nu lhoukebako ki pushülie.

³No uko ki, Jihova hakemhie puya, Israel Kepenuopfüu: Dietseidiekhokelie hau rünyü kemvüu bu rüsepfücie.

⁴Süusü ae nieko puonuoko Ijipt kijü nunu, thegi lho pezhayakezhau nunu uko ze parshü di diekhashü, di sie, a pfhe rünyüliecie, di a nie ki diekhakeshü pete chüliecie. Sitse nieko a themia chülietuo, a nie Kepenuopfü chülietuo,

⁵Sidi a nie puonuoko ki rüsekeshü, mithunudzü mu mepfhidzü krukezhü kijü puo, thie tuoikecü pie tsütuoü di rüsepie kezhüu chülieketuo la. Sitse a puo diekela di, “Jihova, süu siliecie” ishü.

⁶Sitse Jihova a ki: Die hako pete pie Juda nadiko, mu Jerusalem chaüko nu pushülie. Dietseidiekhokelie hau dieko rünyülie di süko chüliecie.

⁷Kekreilamonyü a hie chü di nie puonuoko Ijipt kijü nunu uko ze kepar nhie nu vor thie haketso rei mvürümvü chü uko ki pu di, A pfhe zelie si zo.

⁸Sirei uko zelie mo morei uko nyieto kereishü mo, derei kehoupuorei u nou khrü di u thuo u noule kesuo nu tuo phrete. Süla ae dietseidiekho hau dieko se u ki vor, uko bu chü nu di diekhakeshüko, derei uko chülie mo.

⁹Siro Jihova a ki: Judako mu Jerusalem nu kelhouko donu kepekhre mharhü puo bate.

¹⁰Ukoe rürei thiedzü u puonuoko a die rünyü mvüketa kephouma nu la vote; ukoe terhuo kekrei lie chütuoü di vote; Israel kinukoe mu Juda kinuko a uko puonuoko ze dietseidiekhokelieu varhuowate.

¹¹Süla Jihova hakemhie puya, a kepeka se uko gei vor tou zotuo mu uko tapralie kenjü; uko thuo a ki u mezhiemelo zorei, a uko pfhe rünyülie lho.

¹²Sitse Juda nadiko mu Jerusalem nu kelhouko, vo kethe ruosuo chüpie tsü kevor rhuoko ki vo u mezhiemelotuo, derei uko kemezhiekelie ki sükoe uko kelashü lho zo.

¹³Kekreilamonyü he-i Juda, n rüna kedithede ba shi süthede terhuorhiko rei ba, tsiu Jerusalem nu chaü kedithede ba shi süthede uko thenga ruosuoba chüpie ba, ruosuo chüpie Baal tsüketuo la.

¹⁴Mu no we themia hako la kechachü hie, morei uko sounu n mezhiemelo tsiu cha rei hie, kekreilamonyü uko kemezhiekelie ki a kiekeshü a rünyülie lho.

¹⁵A kekhriepfü mha kesuo chütaü liro, a gei puo mezhü kedipuo ba ta? Rüseko[24] mu kethe ruosuo muoe n siazhau chükedilie vi me? Sidi no zayie chülie vi me?

¹⁶Jihovae va puo n üse, “Olivbo kepejo puo, zivi mu puo si vi” isi, derei khriedi pfhe ze di puoe mipie süu thetuo, sidi puocoko thewatuo.

¹⁷Krodiko Jihova n pelhoukeshüu, mha kesuo n gei vorketuo pushüte, kekreilamonyü Israel kinuko mu Juda kinuko mha kesuo chükewa, süusü kethe ruosuo chüpie Baal tsü di a nou chü kemeyieshü.

¹⁸Süu Jihovae a pesishü, sidi a süu silie, süsie no uko mhatho kesuoko pie a pekie.

¹⁹Derei a we tekuonuo mene di dukhrituoü ze kevo tuoi zo, Mu ae süu a petsoukeba si mo, süu uko kelhiekecü doko, rhü di sie, “Uko seibo-u puo siko sa di pekawa khe, uko kerheimia kijü nunu puo dathewa khe, sitse puo za rükra sa motatuo” idi pukebako.

²⁰Derei no we, he-i krodiko Jihova, kemezhü nunu capi chüyakezhau, themia melou kese mehoyakezhau, no uko gei khepu lieketuou a bu ngu yi, kekreilamonyü a thau pie n dzienu shüshüte.

²¹Süla Jihovae Anathoth themia, n kerheiro pfhüketuomia la pu di sie, “No Jihova za nunu siedzekesi die pu hie, morei no hieko dzie nunu siatatuo” iya.

²²Süla krodiko Jihova hakemhie puya: A siazha pie uko tsütuoüzhie; khriesako zhiecha geinu siatuo; uko nuonuo thenu mu thepfu rei pekrie nunu siatuo;

²³Mu uko donu miapuorei lhieshülie lho. Kekreilamonyü a uko pechüketuo teicieu nu kepeka se vor Anathothmiako gei shütuo.