Read Angami Naga Jeremia 12 Bible Online

Jeremia 12 - Angami Naga bible

Jeremia 12

¹He-i Jihova, a n petsou di kenyakesie ki, noe kemezhütsatie tha zotuo; derei a bu a nyieu pie n ki shücie. Kiüdi kerüzhümia kruo miemielieya mu? Kiüdi kelhiecümia lhou pevilieya mu?

²No uko pelhoushü, mu uko u mie krelie; uko memielie di uko si vülie; uko tienu zowe n penuotuo, sirei uko melou n ze kepetse phi.

³Derei no we he-i Jihova, a si ba; No a ngu di a dojüshü, a noue n ze tuo zo. Tekuo dukhrituoü ketuo tuoi uko teshü thalietacie, tsiu dukhriwaketuo teisozha nhie la uko shükholiecie;

⁴Kichiepuo kijüu bu meheimelo, mu lie pete nu nha bu rüwi zhü ta? Sünu kelhouko rügerüzhü la, khunuoko mu perako tshowate, mu themiako sie, “Puo u rüliko[25] kitsa lawe puo mhicie” iya.

⁵Noe thephi se takecüko ze takewhuo, sidi n nyieta üro, no kedipuo mhie di gura ze ketilie vituo ga? Siro no kijü kemezhü nu rei tetsuta ro, kimhie di no Jordan ketsa kesou nu tuolie vi ta?

⁶Kekreilamonyü n siezedzürieko mu n kinuko zorei, ukoe n gei kelhieta; ukoe krodi chü n siewhuo; uko n ki die kevi pu zorei, uko pele hiecie.

⁷Ae a ki khawate, ae a phruokeshüko vawate; a a nou kekhriepfü pie puo ngumvümia dzienu shüwate.

⁸A kayiekoe ketsa nu losha puo tuoite; hapfüe puo pfhe phrapie a petsoute, süla a puo ngumecüte.

⁹Hyenae a diekhakeshü la a kayie mehoute[26] me? Tekecü perako puo houpfü ba me? Vo di nha khunuo pete kie kenguliecie; puo pekacü ketuo la uko ze vorlie.

¹⁰Kepfhemia kekra a khubelie pekawate, ukoe a yau kedewate, a ya a keneiu bie perapie kijükesia puo chüwate.

¹¹Ukoe süu chü kemethuowate; methuo zhüte, süu a ki meloshü. Kijüu pete methuo zhüte, derei miapuorei puo nou nyü mo.

¹²Mha pekawayakezhamia rayha pfhüthe thechü kerükrieko gei vorte; kekreilamonyü Jihova zhiechaue kijü tietsa puo nu vo kijü kekreitsa ketso pekawatuo; miapuorei krulie lho.

¹³Ukoe thoulha tsia prushü mu zohu retuo, ukoe u thuo kemezhie seshü, derei mhapuorei mevilie lho. Ukoe lie rekelieko se mengatatuo, Jihova noupfhüu kemeriekecü la.

¹⁴Jihovae a zanuo kesuomia pete, a a themia bu welietuoükeshüu bie kecüko pete petsou di hakemhie puya; Ae uko kijü nunu uko ciethewatuoüzhie, tsiu Juda kinuko uko donunu ciethewatuo.

¹⁵Siro a uko ciethekewa sie, a uko ngumezhie lashütuo, sidi a uko mia puopuokecü ze la u vieu nu mu u kijü nu la voshütuo.

¹⁶Süsie ukoe a themia zhoko thetho chü di dojülie, a za nunu rüse di, “Jihova rheiketuo tuoi” idi ukoe a mia petha pie Baal gei rüsekecü mhielie liro, uko bu a themiako donu lhoulietuo.

¹⁷Derei mhanuü seyie puoe a die rünyülie moro, ae süu mie phewatuo tsiu süu pekawatuo, Jihova sikecü puya.