Read Angami Naga Jeremia 13 Bible Online

Jeremia 13 - Angami Naga bible

Jeremia 13

¹Jihovae a ki hakemhiekecü puya, “Vo di n thuo n la linen pfhe menei puo khrülie, sidi süu meneilie, derei süu pie dzü nu petsewa hie” isi.

²Süla Jihova die tuoi a menei puo khrülie, di meneilie.

³Süsie Jihova die vakenieu a ki vor di,

⁴“No menei puo khrülie di menei kebau selie, sidi tsie Eufrat[27] rü nu vocie, sidi süu pie ketsie ketsa puo nu keviewalie” sita.

⁵Süla a Jihova a ki kepu tuoi vo di süu pie Eufrat[28] khieki nu keviewa.

⁶Süsie zha kekra sie Jihova a ki pu di, “Eufrat[29] nu volie, di a n bu keviewanukeshü meneiu sünunu chüliecie” sita.

⁷Süla a Eufrat[30] nu vo, sidi sünunu menei keviekewau thielie, derei meneiu rieta, süu se mhapuorei chülie suota.

⁸Sitse Jihova die a ki vor:

⁹Jihova hakemhie puya: Hakemhie di ae kemelhatuoyakezha Juda tsiu kemelha setuoyakezha Jerusalem pekawatuo.

¹⁰Themia kesuo hako, a dieko rünyü mvüketako u nou khrü di u medo nu tuoyakezha tsiu terhuo kekrei lie chütuoü di medzi ketako, menei hau, se mhapuorei chülie kenjükecü mhietatuo.

¹¹Kekreilamonyü menei-e themia chiecha kupfü tuoyakezha tuoi, sütuoi ae Israel kikru pete mu Juda kikru pete a kupfü tuolieketuo chüshü zo, Jihova siya, sidi uko pie a themia chülie, a za chülie, thetshe pfü mu zayie chülietuoü sie zo. Derei ukoe rünyü mvüte.

¹²No uko ki die hau pushülie: Jihova Israel Kepenuopfü hakemhie puya: Lipfhü pete rei khubezu pie tshuliecie. Sitse ukoe n ki, “No hie üse lipfhü pete khubezu pie tshu morosuokecü si moü ba me?” isietuo.

¹³Sitse no sie uko ki: Jihova hakemhie puya: Ae kijü hau nu kelhoumia pete, David kediba gei keba kediko zo rei, zievoko, siedzekesiko mu Jerusalem nu kelhoumia pete, kemeze pie uko tshushütuoüzhie.

¹⁴Sidi a uko bu huoniehuo geinu kejochütuo, mia krünuoko mu u nuonuoko, Jihova sikecü puya. Ae mia ngumezhielie lho, morei peshashülie lho, morei khrielie lho, derei süko pekawatuo.

¹⁵Nie nyie kedeipie rünyüliecie, sidi kemiakota hie; kekreilamonyü Jihova die pushüte.

¹⁶Puo kezeiu se vortakemo nu, tsiu kijüthou gei teizei merü di nieko phi mesükemo nu, nie kezieu merü baluokecü nu, puoe süu pie kezei nu shüwa di süu bu zeibouitakemo nu, thetshetherhu pie nie Kepenuopfü Jihova tsüliecie.

¹⁷Derei nie rünyülie mo liro, nie kemiakokecü la a ruopfüe pekhre di kra batatuo; a mhi-e kra phituo sidi mhidzü pekrütuo, kekreilamonyü Jihova kuoko teze kedie chü vote.

¹⁸Kediu mu kedipfü zuo ki pushücie; “Theba kerünuo nu tsulie, kekreilamonyü n keditsüre keziviu n tsü geinu kertakecü la” siya.

¹⁹Negeb nadiko khawatuo, miapuorei süko khrü lalie lho; Juda pete ze kedie chü votatuo, peteko teze kediechü votatuo.

²⁰N mhi pfüsie di pesotsa nu kevorko mehoshücie. Tekuokro pie n ketsüu, tekuokro keziviu, kirapuo ba ga?

²¹No mia pethapie n zemia kechüko, süko pie n tsü gei keshü ki no kedipuo puta? Kemezhiekecü thenumia nuonuovachü tuoi n gei vor lhoü ba me?

²²Siro noe n nou nu, “Kedipuo la üdi mha hako a gei vorta shi?” i üro, süue n kejokemou kemeriekecü la, n nei hieshü di, n bie kethengawate.

²³Ethiopiamia[31] puo zhü bie kedilie morei khurhü puo mie rhi kedilie vi me? Silie üro mha kesuo chütuoyakezhamia mha kevi chülietuo.

²⁴Kijükesia nunu teikhrie sier shübe hesetayakezha tuoi, a n bie kezawatuo.

²⁵Hau n yau, a mejüpie n ketsü n yau, Jihova siya, kekreilamonyü noe a rükra mo di ketijü peleketa la.

²⁶A thuo n nei hiepie n zie dzewatuo, sidi mia bu n kemengau ngutuo.

²⁷Ae no kerütse chü keba, n pieü mu rügerüzhükecü, tsiu noe menga mo di kijükhruko gei nu thethelie keba ngushüte. Nowe cie chülietie, he-i Jerusalem! Kichiepuo n chü kemesalie mo batuo ga?