Read Angami Naga Jeremia 15 Bible Online

Jeremia 15 - Angami Naga bible

Jeremia 15

¹Süsie Jihova a ki: Mosa mu Samuel unie thuo a mhodzünu thalie zorei, a nouwe themia hako kitsa rürei volie kenjüte. A mhodzünu nu uko ketsewatacie, sidi uko bu tuotalie!

²Mu ukoe sie n ki, “Hie bu kirapuo vota?” idi pukecü ki, no uko ki pushülie; Jihova hakemhie puya: Kesia nu votatuoü ketuoko bu kesia nu votalie, mu zhiecha nu votatuoü ketuoko bu zhiecha kitsa votalie, pekriekecü nutuoü ketuoko bu pekriekecü nu votalie, mu mia die chütuoü ketuoko bu mia die chü votalie.

³Siro a mhakepeka kekreikreikecü dia khapie uko gei shütuo, Jihova sikecü puya: Zhiecha bu dukhrituo, tefüko bu cierha setatuo, tsiu teigei perako, mu kijü nu khunuoko bu peka mu bie pesuoketuo la.

⁴A uko chüpie kijü nu kedi pete bu merietatuo kekreilamonyü Hezekia nuou Manasseh, Juda kediue Jerusalem nu chüshüwaketa la.

⁵He-i Jerusalem, supuonie n ngumezhielie, morei supuo n krükratuo mu? Supuonie rürei vor n dze kevi ketsolie shi?

⁶No a khawate, Jihova siya, noe tsiesiete; süla a dzieyhapie n petsou di n pekawatuo, a thenou shükhre ba a nyiete.

⁷Ae kijüu nu kharu ki nu lieherü pie uko hewate; a uko pesiashüte, a a themiako pekashüte; ukoe uko zhoko nunu rüdi lalie mote ru.

⁸Uko samiko kra pie dzükezha nu theshünyo kirei krakuote. Ae khinhieluo ki u khriesako zuonuoko perhie di kepeka se vorshü; ae nousuo mu kemeriekecü bu te mhai uko gei tsukecü chüshüte.

⁹Thenie penuokeshüpfü puocha meziete; puo ruopfüu cie vote; teiso baluokecü nu puo niakiu lete; puo pie kethenga shüte mu puo ziejü bate. Siro ae uko khapie ngumvümia mhodzünu zhiechau tsüwatuo, Jihova siya.

¹⁰A sü chülietie, a zuo, no kijü pete nu themia ze kegei mu mia perhie tuoyakezha, a penuokeshü ha! Ae mhapie mia thepu mo, morei mia vie rei thepu mo, sirei uko pete rei a rüpfhü rüse.

¹¹Jihovae sie: A n kelhou nu vathe lerkecü kevi puo la zo ketho, puotei kesuo puo nu kemezhiekecü tei puo nu ngumvümia pie n gei shüshü.

¹²Thegiu mu merenyi pesotsa thegiu bietshalie vi me?

¹³N kinyi, n vie puoma kere pie puoma kejü mhava chüwatuo, n phouma la n tuo pete nu siwatuo.

¹⁴A n chüpie n bu sikemo kijü nunu n ngumvümia lie chütuo, kekreilamonyü a nouyie nunu mi puo tu parte süu kechachietatuo.

¹⁵He-i Jihova, noe si; a rükrashücie di a ki vorcie, sidi a peseyakezhamia gei a khepushücie. No shügeshühiekezha nunu a chü seta hiecümu; n lanu mia a kengakecü siliecümu.

¹⁶N dieko ngulie, sidi a süko cülie, mu n diekoe a nou chü pemvü mu a neilie; kekreilamonyü n za nunu mia kieya, he-i Jihova, krodiko Kepenuopfü.

¹⁷Ae keyukenyü chükebako kro nu bata mo, morei a a nei bata mo; n dzieu mesi khro nu a rübei ba mo, kekreilamonyü noe noupfhü pie a ketshu chüshü.

¹⁸Kiüdi a kechü lata mo, mu a rüzapfüu menelie mota, süu kiüdi vilie kenjüte shi? Ketho zo, noe a la ketho kemo rücü puo tuoi, dzü jüketa tuoite.

¹⁹Süla Jihova hakemhie puya: No rürei la vorlie üro, a n ze lalietuo, sidi n bu a mhodzünu thalietuo. Noe diethuodieruo mo di mha puoma kereu hachielie üro, noe a tie mhie mhachülietuo. Uko bu rürei n kitsa valietuo, no rürei uko kitsa vota lho.

²⁰Sitse a n chüpie themia hako la merenyi piekechü dahou chüshütuo; ukoe n perhietuo, derei uko n mhodzü thalie lho, kekreilamonyü a n zetuo, mu n kelashütuo, Jihova sidi puya.

²¹A kerüzhümia dzie nunu n kelashütuo, sidi nouzhie kejü dzie nunu n rhashütuo.