Read Angami Naga Jeremia 16 Bible Online

Jeremia 16 - Angami Naga bible

Jeremia 16

¹Jihova die a ki vor di:

²No thechü hau nunu thenu lie hie, morei n nuo nuo thepfu rei thenu rei nyi hie.

³Kekreilamonyü Jihova thechü hau nunu penuokelie thepfumia morei thenumia tsiu uko penuokeshü zuopfüko mu u puonuoko dze pukecü hamhie:

⁴Ukoe kechü re sekecü chü di siatuo. Uko krükralie lho, morei uko khru reilie lho; sidi ukoe kijüu gei thebuo tuoitatuo; uko zhiechau geinu mu pekriekecü geinu katatuo, sidi uko kesiamo pie teirako mu kijüu gei khunuoko kecüca chüwatuo.

⁵Kekreilamonyü Jihova hakemhie puya: Krakeba kinu le hie, morei uko la thekrü chütuoü morei kratuoü vo hie; kekreilamonyü a themia hako kinu a nouneu, a kekhrieu mu ngukemezhieu chüsete, Jihova siya.

⁶Thechü hau nunu themia kezhamia rei kecü rei siatatuo; uko khrulie lho, mu miapuorei uko krükralie lho; uko la u geilie lho, uko la u tsü rei thielie lho.

⁷Miapuorei thekrü kechümia la kecüca keselie lho, kesiamia la uko nou thupeluolie lho; morei mia u puonuo morei u zuonuo la thenou chü peluokecü hiepie u bu krienu khashülie lho.

⁸No mia thehethehie chükeba kinu vo hie, vo uko ze ba di cüükrie tuoüta hie.

⁹Kekreilamonyü krodiko Jihova, Israel Kepenuopfü hamhiekecü puya: A thechü haunu nieko mhingu kinu, tsiu nieko teiki nu, kenei pfhe, thenoukemvü pfhe, yasau pfhe, mu yasapfü pfhe bu ba motatuo.

¹⁰Siro no die hako pete pie themia hako ki pushü, sitse uko n ki, “Kiüdi Jihova mha kesuo kemeriekecü hako pete pushüte shi? Hie kephouma kedipuo ta ga? Hie hie Kepenuopfü Jihova gei jokewa kephoumau kiu ga?” situo.

¹¹Sitse noe sie uko ki: Süu kekreilamonyü nie puonuokoe a khawate, Jihova siya, sidi terhuo kekrei siemedzi, tsiu süko lie chü mu süko rüsuo, sidi a khawa mu a zho ze balie mote.

¹²Mu niekoe nie puonuoko ki rei kesuo chükuo; kekreilamonyü nie pete rei kesuo keleu medzitsa tuote, sidi a pfhe rünyü mvüte.

¹³Süla a kijü hau nunu nieko khapie nie rei mu nie puonuoko rei sikemo kijüra shüwatuo; sidi süra nu niekoe teiso teizei terhuo kekrei lie chü tuotatuo; kekreilamonyü a ngukemezhie pie nie kielie lho.

¹⁴Süla, teisozha vor tou zotuo, Jihova siya, sükisü “Jihova rheiketuo mhie Ijipt kijü nunu Israel nuonuoko ze kepar-u” isikecü pu sa motatuo.

¹⁵Derei “Jihova rheiketuo mhie pesotsa nu, mu puoe uko whuoshükewa kijü pete nunu Israel nuonuo ze kevor-u” isituo. Kekreilamonyü ae uko ze la vor uko kijü nu a pie uko puonuoko ketsü nu shütuo.

¹⁶Ae khuoketemia kekra ketseshüzhie, Jihova siya, sidi uko süko telietuo; mu süsie a chüwhuomia kekra ketseshütuo, sitse ukoe kijüthou kheko nu mu kijükhru kheko nu tsiu tsiekrie gei tsiepfüko nu uko whuotuo.

¹⁷kekreilamonyü a mhi-e uko zhoko pete meho ba; ukoe a mhodzü rüshülie kenjü, morei uko kesuo kechü a mhingu nunu jütalie lho.

¹⁸Siro a uko kesuo kechü mu uko kephouma zhakhra de kenie khashütuo, kekreilamonyü ukoe kesiamo mhiei kerheiro kejü rhuoko se a kijü bie perhuwate, siro uko vie kerütsekecüko pie a kijü ketshu chüwate.

¹⁹He-i Jihova, a kekuo mu a dahouu, kemezhiekecü ki a keyau, kijü valako nunu seyieko n ki vor di sie: Hie puonuokoe mhapuorei welie mo, derei kemeda, puoma kejü vie sügeinu mha kemevi kejü rübei welie.

²⁰Themia puoe puo thuo puo la terhuo rhilie vi me? Sükemhie kecükoe terhuo mo zo!

²¹“Süla uko petha toushütuoüzhie, a tsieu va uko bu a kekuo mu a kezha silietuo, sitse ukoe a za Jihova ükecü silietuo.”