Read Angami Naga Jeremia 17 Bible Online

Jeremia 17 - Angami Naga bible

Jeremia 17

¹Juda kephouma thegi kethusei mu diamond tie pie thupie zhüwate, süu uko melou gei tsiu uko ruosuo kiako gei rhipie zhüwate,

²Uko nuonuoko uko ruosuobako mu uko nanyü seiko[34], seibo kepejo khieki, mu kijükhru kerükrieko gei,

³rüna kezha nu kijüthou kebako rükralie. N kijü pete nunu vo kijü tierie ketso n nyaürako mu n kinyiko pete pie nie kephouma la kepeka nu shüwatuo.

⁴N thuo n mhatho la a khapie n ketsü kayieu pejüwatuo, mu n bu no sikemo kijü nunu n ngumvümia lie chütuo, kekreilamonyü a nouyie miu petushüte mu süu kechachie tu batatuo.

⁵Jihova hakemhie puya: Themia peleyakezhamia mu chüüphou pie puo kekuo chükecümia, puo nou Jihova ki nunu rüreiketamia rüse pfütuo.

⁶Ukoe kijükesia nu nhabo mhietatuo, sidi kekhruohi kevor ngulie lho. Ukoe rayha thechü kesora, themia lhoukemo metsie kijüra lhoutuo.

⁷Jihova peleyakezhau, puo kemerü pie Jihova gei kebau thejakepfümia zo.

⁸Ukoe dzü khie ki seibo pelhou pie keba tuoilietuo, rücü khie ki süu mieko krazhüya. Teile vor zorei michielie lho, mu puo nyüko pejo rükhripfü balietuo; teiso gei rei puo nou meyhumezhielie lho, tsiu puo si vü moketa chülie lho.

⁹Themia melou ha mha pete kirei suo; mharhi mo zo, supuonie süu silie vi ga?

¹⁰A Jihovae themia nou dojü mu themia melou kevikesuo pfhüya, uko zho ki ze, tsiu uko mhatho kheki sü chü khashütuoükecü la.

¹¹Peüpfü puo pedzü shükemo puo be keba tuoi, sütuoi mezhü kemo nunu kinyi ngukelie pete sümhie zo; puo kelhou theweluo ki süko puo khawatuo, sidi süko thelanu ukoe kemelomia ücü thashütuo.

¹²He-i zapuzayie kedibau, sietsenu chü kerükriekeshüu, hie kemesa rüsuochüu zo;

¹³He-i Jihova; he-i Israel kemerüu! N khakewamia thenga chülietuo; n kinu tuoketa khe kijü nu leshükethu tuoi tuo motatuo, kekreilamonyü ukoe Jihova, kerheidzüluo khawate.

¹⁴He-i Jihova, a chü keshürhoshücie, sitse a shürholietuo; a kelashücie, sitse a kelalietuo; no sü a ketsheu zocü la.

¹⁵Uko kimhie di a ki puya shi mehoshücie, “Jihova die kirapuo ba ga? Süu bu vorliecie” iya.

¹⁶Derei a we n lietho nu, kepfheu chü mo di tatatuoü mo zo, morei a kemeriekecü teisozhau menguta mo. Noe a tienu kepar-u kedipuo shi si ba, süu n mhodzü ki ba zo.

¹⁷A chü kemidewa hiecie, noe kepeka teisozha nhie a keyau zo;

¹⁸A pechüyakezhamia bu mengalie, derei a bu we mengata hie; uko bu u shüshütalie, derei a bu we a shüshüta hiecie; kepekau se uko gei vorshücie; tsiu kepeka va kenie de pie uko pekawacie!

¹⁹Jihovae a ki hakemhie pu: Vo di Themia Kharuu nu, Juda kediko ler mu prayakezha nu, mu Jerusalem kharu pete nu thaliecie,

²⁰Sidi sie uko ki; Jihova die rünyülie, nie Juda kedi pete, mu Juda pete, tsiu kharu hako nu leyakezhau Jerusalem nu kelhou pete,

²¹Jihova hakemhie puya; Nie kerheiro la, sabat nhie thepie pfü morei Jerusalem kharuko nu süko se ler molieketuo la menuoliecie

²²Siro sabat nhie nieko kinu thepie puo rei pfü pra hie, morei mhatho puorei chü hie, derei a nie puonuoko ki diekhakeshü mhie sabat zhau se kemesalie,

²³Sishü rei ukoe rünyü morei uko nyie kedeishü mo. Derei u vo meteilie, sidi mia pfhe silie lhoü mu pethakeshü lielie lhoüta.

²⁴Derei mhanuü nie a pfhe rünyülie, Jihova siya, sidi sabat nhie thepie puorei pfü di nadi hau nu ler mo, derei sabat zhau chükemesalie mu mhatho puorei chü molie,

²⁵silie ro no kharu hako nunu kedimia[35] David kediba nu baketuomia lelietuo, guragari mu gura gei tuotuo, uko mu uko kezhako, Juda themiako mu Jerusalem nu kelhouko, sidi nadi hau kechachie balietuo.

²⁶Sidi themiako Juda nadiko nunu mu Jerusalem khie thechüko nunu, Benjamin kijü nunu, Shefela nunu, kijükhru rüna nunu mu Negeb nunu kethe ruosuoko mu ruosuo khakeshüko, thoulha mu kethengu ruosuo, tsiu ketshe mu kethengu ruosuo, tsiu ketshe ruosuoko se Jihova kiu nu vortuo.

²⁷Derei mhanuü nie a pfhe rünyü mo, sabat zha se kemesa mo, mu sabat nhie thepie pfü di Jerusalem kharuko nu le suokecü si mo ro, a kharuko nu mi petushütuo; süue Jerusalem nu kedikiko thewatuo, sidi sü tshülie lhotatuo.