Read Angami Naga Jeremia 18 Bible Online

Jeremia 18 - Angami Naga bible

Jeremia 18

¹Jihova kinu die Jeremia ki kevor:

²“Vorlie, di litho-u ki kecie, sitse sünunu a n bu a die silietuo” sita.

³Süla a litho-u kinu ke, siru puoe puo lithuo-u se mha chü ba.

⁴Siru linyo pie kechü mhabouu puo dzie nunu suota, süsie puoe süu pie mhabou kekrei puo chü lalie mu süu puo mhodzü ngu zivita.

⁵Süsie Jihova die a ki vor:

⁶He-i Israel kinuko, litho hau kemhie a nieko gei chüshülie lhoü ba me? Jihova sikecü puya; Linyoe litho-u dzie nu keba tuoi, nieko ha rei a dzie nu ba zo, he-i Israel kinuko.

⁷A va puo nunu seyie puo morei kedirüvie puo dze, phewaketuo mu bietshebietshawa di pekawaketuo pushülie vi,

⁸derei mhanuü seyie a puo dze pukeshü süu kesuokechü nunu rüdilie liro, a uko gei mha kesuo chüshütuoü di lekebau nunu a nou rüditatuo.

⁹Sidi puotei kekrei puo nu seyie puo morei kedirüvie puo dze pu di a süu chüshü mu pelhou lashülie vi,

¹⁰derei mhanuü süu a mhingu ki mha kesuo chü a pfhe rünyü mvüta ro, a mha kevi chüshütuoü kebau nunu rüditatuo.

¹¹Süla tsie, Juda themiako mu Jerusalem nu kelhouko ki pushüliecie: Jihova hakemhie puya: Harie, ae mha kesuo puo rhipie nieko ngumvütuoü bate tsiu mhapuo rhüpie nieko petsoutuoü bate. tsie nie pete mhatho kesuo nunu rüreilie, sidi nie zhoko mu nie mhathoko bu viliecie.

¹²Derei ukoe sie, “Süu kemethuo zo! Hie hie thuo rhükelie medzituo, tsiu mia puopuokecü hie nou kekhrü kesuo keleu medzi zotuo” sita.

¹³Süla Jihova hakemhie puya: Seyieko ketsoshü phi: Huomia mha haikecü si me? Israel phousepfü mha kemerie se puo chüwate.

¹⁴Lebanon pekrie Sirion[36] tsiekrieu khawaya me? Kijüthou[37] dzü sotaya me,[38] rücü dzü mekutaya me?

¹⁵Derei a themiako a rükra mote, ukoe mhakethengu the u seketuo zo, ukoe u chako nu, thiedzü kerieki chako nunu u phi mesü, mu chatseko nu vote, cha mezhükemo nu tuote,

¹⁶Ukoe kijü chüpie kemeriekecü puo chüwate; kechachie pesekecü vie puo chüwate. Süu pfüthe kevo kheko u ngo, tsiu u tsü kegetatuo.

¹⁷Ae süko kezapie ngumvümia mhodzü, niathutsa teikhrie mhiewatuo. Ae uko kemezhiekelie nhie rünoupie uko tsütuo, a zie pie uko meholie lho.

¹⁸Sitse ukoe sie, “Vorlie, uko mharhü pie Jeremia petsou khe, kekreilamonyü kepethadie zievo-u kinu jütalie lho, morei mhakesiu kinu tahitarhokecüu jüta lho, morei siedzekesiu kinu dieu jüta lho. Vorlie, úko theda pie puo dalie khe,[39] sidi puo die yopuorei rünyü hie” sita.

¹⁹He-i Jihova, a pfhe rünyüshücie, sidi a ngumvüko kepuko rünyüshücie!

²⁰Mha kesuo pie mha kevi zhakhra chütuo me? Sirei uko a kelhou la thekhe puo holiete. A n mhodzünu tha di mha kevi se uko ki pukeshü, n nouyieu uko geinu teshü kereiwatuoü ketha rükrashücie.

²¹Süla uko nuonuoko pie pekriekecü nu shüwacie; zhiecha kekuo geinu uko zie peruwalie, u kimiako bu nuojü mu samimiapfü chütacie. Uko thepfuko thepe geinu siatacie, u khriesako bu terhü nu zhiecha geinu sia üthienyü.

²²U kiko nu kekra pfhe sicie, noe kepeka se u gei vor mhaikeshü ki! Kekreilamonyü uko a telietuoü di thekhe puo thielie, tsiu a phi la kebie pethupie zhü.

²³Sirei Jihova, uko a dukhriketuo mharhü pete noe si. Uko kejo vashü uko tsü hiecie, n kengu kinu uko kejovawa hiecie. N mhingu kinu uko chü kelhouwacie, n nou meyiekelie kinu uko gei hakemhie chüshücie.