Read Angami Naga Jeremia 19 Bible Online

Jeremia 19 - Angami Naga bible

Jeremia 19

¹Jihova hamhiekecü puya: Vo di lithomia rünyo pie kechü li puo khrüliecie, sidi uko donu phichümia mu thetsei zievoko huo sa zelie,

²sidi Hinnom nuou razha nu Litho Kharuu kele ki kebau nu volie, sidi a n ki pushüketuo dieko pesishülie.

³Noe hai di putuo: Jihova die rünyüliecie, he-i Juda kediko, mu Jerusalem nu kelhouko, Krodiko Jihova, Israel Kepenuopfü hamhiekecü puya: A kepeka se thechü hanu vortuo, süusü themia kehoupuorei sishü ro, puo nyieto mesotatuo.

⁴Kekreilamonyü themiako a khawate, mu thechü hanu nu mharekethengu thepie terhuo kekrei tsü di thechü hau bie perhuwate, süusü uko rei morei u puonuoko rei morei Juda kediko rei si vor mo, sidi kejokejü zie pie thechü hau ketshu chüwate;

⁵Tsiu ukoe Baal kijü kerükrieko nu vo di u nuonuo the di kethe ruosuo chüpie Baal tsü, süu a chünu morei thezho khashü mo, morei süu a nou rei vor mo zo;

⁶Süla teisozha vorzhü ketho, Jihova siya, thechü hau üse Tofet, morei Hinnom nuou razha üdi kie salie lho, derei Kedukhri razha ütuo.

⁷Mu thechü hau nunu a Juda mu Jerusalem unie mharhüko pie kemethuo chüwatuo, tsiu ae uko bu u ngumvümia mhodzü zhiecha geinu mu uko kerheiro pfhüketuomia dzie nunu tetsutatuo. Sidi ae uko kesia moko pie perako mu nhanu khunuoko ca chüwatuo.

⁸Siro ae nadi hau chü kemidewatuo, tsiu mia rütseketa puo chütuo; themia kehoupuorei süu pfüthe kevomia u ngo mu rütsetuo kekreilamonyü süu pekaperuowaketa la.

⁹Siro ae uko bu u nuonuo thepfumia chü mu thenumia chü cütuo, tsiu uko terhü kechü mu kemezhiekecü nunu u thuo u zanuomia chü cütuo sidi u ngumvüko mu u kerheiro pfhü ketuoko u pechütuo.

¹⁰Sitse noe n ze kevoko mhodzünu nu lipfhüu biephroshütuo.

¹¹Sidi uko ki hakemhie pushülie: Krodiko Jihova hakemhie puya: Ae rünyo lipfhüu biephrokewa tuoi di themia hako mu nadi hau biephrowatuo, mu süu chükema lalie kenjü. Tofet nu u kekhru chü ba sa mota kemochie khru ba zotuo.

¹²Hamhiekecü ae chüpie thechü haunu, siro hanu kelhoumiako gei shütuo, sidi nadi hau pie Tofet kemhiewatuo.

¹³Siro Jerusalem kiko mu Juda kediko kiko Tofet thechüu tuoi perhuwatuo, u kiko, kitieko nunu ruosuo chü pie teigei krodiko pete tsü, tsiu ruosuo rupie terhuo kekrei tsüketa la.

¹⁴Jeremia-e Tofet nunu vorlie tse, Jihova puo bu siedzekesidie punu di ketsekeshü sidi puoe Jihova kiu kitiezha nu thalie di sie themia pete ki:

¹⁵Krodiko Jihova Israel Kepenuopfü hakemhie puya: Ae nadi hau nu mu puo nado pete nu kepeka dze pukeshü pete se vortuo, kekreilamonyü uko vo meteithor di a die rünyü mvüketa la.