Read Angami Naga Jeremia 2 Bible Online

Jeremia 2 - Angami Naga bible

Jeremia 2

¹Jihova die a ki vor di pukecü:

²Vo di Jerusalem nyieto nu hakemhie pushülie, Jihova hakemhie puya: No n rüüki pecükecü, yasapfü chü di n nou pie a ketsü, noe rayha nu tsia va moluokecü kijü nu, a siemedzilie shicü rükra ba.

³Israel-e Jihova kitsa mesa, mu puo lieyie donu puo si kerieu chü. Süu cükewa pete rei joüta; kepekau sümia gei vor, Jihova siya.

⁴He-i Jakob kinuko, mu Israel kinuko pete, Jihova die rünyüliecie.

⁵Jihova hakemhie puya: Nie puonuoko a gei puotou kemo kikecüpuo ngulie di uko a kinu pecieta, sidi mhathokemo medzi, mu u thuo kemethuo chüta ga?

⁶Ukoe, “Jihova Ijipt kijü nunu u ze parkeshüu, rayha nu, kijükesia mu thekheko nu, kijü keso nu, tsiu kesia khrü nu, miapuorei vo kemo kijü, tsiu miapuorei lhouya kemo ra u chatha ze ketuou kirapuo tuota ga?” sikecü rei puya mo,

⁷A nieko ze mhakenyi kijü puonu, nie bu süu si cütuoü mu süu keviu cütuoü di nieko ze vorshü. Derei nie sünu lelie tse, niekoe a kijü bieperhuwa, mu a kayieu pie kerütse chüwa.

⁸Zievokoe, “Jihova kirapuo ba ga?” sikecü pu mote. Siro thezho kesekoe a si mo; kezhako[3] a gei kejokemou chü; siedzekesiko Baal geinu siedzekesidie pu, sidi puo kemevi kejütsa whuo vota.

⁹Süla a tsie rei nie pejo zotuo, Jihova sidi puya, tsiu a nieko nuonuo nuonuoko pejo zotuo.

¹⁰Kupra kijü khietsa pfü di mehoshücie, mia ketsepie Kedar nu shü di meho menuoshücie; sidi mha hakemhiekecü tuoya mo mo shi mehoshü phi.

¹¹Seyie puoe puo rhuoko, terhuomia mo shierei bie kediwaya me? Derei a themiako we uko zayieu pie puo kemevi kejü vie puo ze keliliete.

¹²Nie mekeso chülie, he-i teiko, hau la, sidi nie kedethelie, mu thezie kejü chü batalie, Jihova siya.

¹³A themiako mha kesuo kenie chüwaketa la; uko a khawate, kerhei dzüluo-u, sidi uko thuo dzükhou thielie, rükoketa dzükhou kro puo, dzü thoulie kelho dzükhou kropuo.

¹⁴Israel-e miadiemia me? Puoe kinunu penuokelie miadiemia me? Kiüdi puoe mia bu puo pekakewamia chüta ga?

¹⁵Loshako meho puo petsoute, ukoe ruorüite. Ukoe puo kijü chü kemethuowate; puo nadiko ruote themia lhou sa mote.

¹⁶Süsierei Memfimia mu Tahpanhemia bu n tsü gei keditsüre bie pesuowate.

¹⁷No n Kepenuopfü Jihova, puo n chatha zeketuou khakewa lanu, n thuo mha hakoha se n gei vorta moü me?

¹⁸Siüro Ijipt nu kele kedipuo mevilie ga? Nail dzü krie ketuo la me? Morei Asiria nu tsu kedipuo mevilie ga? Eufrat dzü krie ketuo la me?

¹⁹N rüzhüko thuo n pechütuo, mu no kenyükecü chükecüko thuo n pejotuo. N Kepenuopfü Jihova khakewa; mha kesuo mu kepfhü ücü siliecie, a khrüpreiu n gei tuo mote, krodiko Kepenuopfü, Niepuu sidi puya.

²⁰Kekreilamonyü thiedzünu noe n vocieu bietshewa, mu n phako biethewa ru, noe sie, “A n lie chülie lho!” site. Noe kijüthou kerükrie kheko gei mu seibo kepejo kheko khro nu pelapfü di thethelie.

²¹Sirei a n leipie khubebo kevi puo chüshü, puo tsia vitseikecü. Siliro kiüdi nha khubebo kesuo puo chü la te mu?

²²N thuo daru se n khrüwa, tsiu sabou kekra se zorei, no kesuokechükoe a mhodzü ki ba seite, Jihova UKEPENUOPFÜ siya.

²³Noe kikemhie di, “Ae rhuta mo, a Baalko medzita mo” ikecü pulie vi ga? Razha nu n zho n rüli mehoshü phi; no kedipuo chüwa shikecü siliecie, noe bajülie kemo ut nuonuo puo cha nu rüge phi mu phi ketuo mhiei;

²⁴Gadapfü rayha pie puo tuo chüketa tuoi, thushü puo va di nyhüpfhü tseitsei! Supuo puo mengu nunu puo kekhalie ta? Mia puo rei puo pfhü kemezhie morei vi; puo teiu nu ukoe puo ngulie zotuo.

²⁵N phi bu phikou pfü mo, mu n mezha bu terhü moketuo la n kireilie, ishü. Derei noe, “Mhapuorei chülie suote, a sikemomia a neite, mu a süko siemedzi vota zotuo” ite.

²⁶Kerügumia mia puo tekelie ki mengatayakezha tuoi, sütuoi Israel rei mengalietuo, uko, uko kediko, uko kezhako, uko zievoko, mu uko siedzekesiko pete rei,

²⁷ukoe seibo ki, “No a puo,” iya, mu ketsie ki, “No a penuoshü” isiya. kekreilamonyü ukoe rünoupie a tsü, mu uko zie pie a tsü mo. Derei uko kemezhiekelie ki ukoe, “Vor di hie kelashücie” iya.

²⁸Derei n thuo chükelie rhuoko kirapuo tuota ga? No kemezhiekelie ki n kelalie vi üro, süko bu vorliecie; kekreilamonyü n rüna kedithedepuo ba shiü, n rhuo rei sü thede ba, he-i Juda.

²⁹No kiüdi a gei kenyaya ga? Nieko pete a petsoute, Jihova sidi puya.

³⁰A n nuonuoko vü thedo chü; uko pethapfülie mvüte. N zhiecha thuo siedzekesiko cülie, losha mhatekecü tuoi.

³¹Siro nieko, he-i themia phou, Jihova die rünyüliecie! Ae Israel mhodzü ki rayha puo mhiei, zeibouikecü kijü puo kemhieta zo me mu? Kiüdi a themiakoe, “Hie hie medo chülie vite, hie n ki vor salie lhote” iya ga?

³²Thenumiae puo pienyie rükra mota, morei yasapfüe puo pfhenei rükra motalie vi me? Sirei a themiakoe teisozha phrü hulie kelho a rükra mo tuote.

³³Kidepuo n cha kese pevi pie n khrieu pfhüya shi? Sümhie di no n zho pie thenu kerüzhüpfü pethawate.

³⁴Siro n nei gei mhakejü kejo kejüu zie ngute; no uko kekrükecü chü ba di ngulie mo rei. Mha hako pete donu rei,

³⁵noe sie, “A kejo jü; a geinu puo nouyieu rüditatuo,” isi baya. Noe, “A phouma mo” isi keba la, a n ze dienya chütuo.

³⁶No kiüdi n rienuochü n zho n rüli kedikeli ba zo mu! No Asiria dzie nunu mengakelie tuoi, Ijipt dzie nunu rei mengalietuo.

³⁷Sünu nu rei no n dzie pie n tsü gei shülie di tuotatuo; kekreilamonyü Jihovae noe u peleyakezhamia meliewate, mu no uko geinu vilie lho.