Read Angami Naga Jeremia 20 Bible Online

Jeremia 20 - Angami Naga bible

Jeremia 20

¹Süki Pashur, Immer zievo nuou Jihova ki kepfhe kezhaue Jeremia siedzekesidie pukeshüko sishü.

²Sitse Pashur-e Jeremia siedzekesiu vüta, sidi puo pie Benjamin Kharu kerükrieu nu Jihova kiu cabo nu shüwa.

³Süsieduü Pashur-e cabo nunu Jeremia ze kepar ki, Jeremia sie puo ki, Jihovae n za pie Pashur üdi kie lhote, derei, “Mha pete nu kemeriekecü” ütatuo.

⁴Kekreilamonyü Jihova hakemhie puya: A n chüpie n thuo n la mu n zemia la kemerie puo chüwatuo; tsiu uko ngumvümia zhiecha geinu tetsutuo mu n mhi-e süu ngutuo. Siro ae Juda pete phapie Babilon kediu dzie nu shüwatuo, sidi puoe uko ze kedie chü Babilon nu votatuo, mu zhiecha pie uko dukhriwatuo.

⁵Siro a nadi hau kinyi pete, süu vienya pete, mhanya puoma kere pete, mu Juda kediko kinyi pete pie puo ngumvümia dzie nu shüwatuo, uko pekawaketuoko, uko chüse Babilon nu votaketuoko.

⁶Siro no, Pashur, mu n kinu keba pete mia die chü votatuo, mu no Babilon nu votatuo; sidi sünunu no siatatuo, mu sünu nu n khruwatuo, no mu n zemia pete no uko ki ketijü siedzedie pukeshü kheko.

⁷He-i Jihova, noe a seshü, sidi a sewate; noe a ki kuokuo; süla no thaliete. A teisonhie mia krenyü chü bate; mia pete rei a krete.

⁸Kekreilamonyü a diepukeshü ki, a shieshü morosuo, a shiepeto di, “Mha kemvü kechü mu kepeka!” ishü morosuo. Kekreilamonyü zhate Jihova dieu a kerhie tsiu a krenyü bate.

⁹Ae sie, “A puo dze pu salie lhote, morei puo za mha pu sa lhote” ishü ro, mha puo a nou a ru nunu mi pie thekeba mhietaya; a süu khapie bakecü a nyiete, khalie kenjüte.

¹⁰Kekreilamonyü mia kenupu di: “Mha pete nu kemichie bate! Puo meliewa khe! Úko puo meliewa khe!” ikecü a siya. A khriethomia pete a phi mesükecü meho baya. “Puo selie rei silie lho mu, siro we puo penyülie vi, we puo gei u khepulietuo” ibaya.

¹¹Derei Jihova kemerie chü di a ze ba; süla a peseyakezhako phi mesülietuo, mu uko thalie lho. Uko mengadapfü chü lho, kekreilamonyü ukoe vilie lho. Uko thenga chüketa mhakipuorei kechachie rükra motalie lho.

¹²He-i krodiko Jihova, noe kemiathomia dojüya; noe themia melou mu puo kele nguya; a bu uko khepu nguyi, kekreilamonyü no a kitsa thate.

¹³Keli pie Jihova ki shücie; Jihova tsheliecie! Kekreilamonyü puoe kesuo kechümia dzie nunu kejümia kerheiro kelashüte.

¹⁴A kepenuo teisozha bu keviu chükenyü! A zuo a penuokeshü nhie bu thejapfü hie!

¹⁵A puo ki dielie se, “Thepfunuomia puo penuo pie n tsü ho,” sidi puo nou chü pemvü keshü themiau bu keviu chü kenyü.

¹⁶Themia süu bu Jihovae ngumezhie mo di kelhoukewa puo tuoitalie; puo bu khise kekra pfhe si, mu khinhie shiekeshü pfhe sitalie.

¹⁷Kekreilamonyü puoe a zuo va nunu a dukhriwata mo; süla a zuo bu a mekhru chü mo, mu puo nuobvü bu zha sei tuota mo.

¹⁸Kiüdi a mhachümhalie tsiu thenou kesuo ngutuoü, a teisozha thenga nunu pevotuoü a zuo va nunu parta mu?