Read Angami Naga Jeremia 21 Bible Online

Jeremia 21 - Angami Naga bible

Jeremia 21

¹Jihova kinu die Jeremia ki kevor, süsü Zedekia kediue Melkia nuou Pashur mu Zefania zievo-u Maseia nuou ketsekeshü ki pukecü,

²“N pezie rei hie la Jihova ki ketsocie, kekreilamonyü Babilon kediu Nebukadnezar-e u ze terhü chü tuoü bate, mu Jihovae u ngokecü chüshü di puo bu u kinu tuotakecü chülie üthienyü.”

³Sitse Jeremia sie uko ki:

⁴Nieko hamhiekecü se Zedekia ki pushücie: Jihova; Israel Kepenuopfü hakemhie puya: Ae nie dzie nu keba terhü nyieko nie-e se Babilon kediu, mu Chaldianmia dahou sie nu nie ze kegeikecüko, ze kegeikecüko ae bie kemeduowatuo; sidi a süko ze vor nadi hau metsuo nu kengushütuo.

⁵Siro a a thuo a bou yha se mu a bou kekuo se di a nouyie nunu, a noupfhüu nu, tsiu a nei mo se di nieko ze kegeituo.

⁶Sidi a nadi hau nu kelhouko themia rei khunuo rei dukhriwatuo; ukoe thepetheruo kemeriekecü nunu siatuo.

⁷Mu süsietsa Jihovae puya, ae Juda kediu, mu puo kituoko, tsiu nadi hau nu themiako, thepetheruo nunu zhiecha nunu, mu pekriekecü nunu lhie se kebako pie Babilon kediu Nebukadnezar dzie nu mu uko ngumvüko dzienu, uko kerheiro pfhü ketuoko dzienu shüwatuo. Puoe zhiecha üse uko dukhrituo; puoe uko ngumezhielie lho, morei peshashülie lho, morei khrieshülie lho.

⁸Siro no themia hako ki: Jihova hakemhie puya: Harie, ae kerheicha mu kesia cha pete pie nieko mhodzü shü ho.

⁹Themia vadi hau nu kebamia zhiecha, mu pekriekecü nu, mu thepetheruo nunu siatatuo; derei themia pra di Chaldianmia nie kewhuomia dzie nu lekeliemia rheilietuo, mu uko rheikelie-e terhü nu zhakhra puo tuoitatuo.

¹⁰Kekreilamonyü mha kevi la mo di mha kesuou chüshütuoü a zie pie nadi hau petsou bate, süu pie Babilon kediu dzienu shüwatuo, sidi puoe mi pie süu thewatuo.

¹¹Juda kediu kinuko ki pukecü: Jihova die rünyüliecie,

¹²He-i David kinuko! Jihova hakemhie puya: Khise gei kethocau chüshücie, mu mia peseyakezhau dzie nunu, mia bu u kechükede setuoketako kehoupuorei kelashücie, mo üro a nouyie miü tuoi partuo, sidi bie pemhelie motatuo, n kesuoko la.

¹³Harie, a n petsoutuo, he-i razha nu kelhouko, He-i kijü kemezhü nu tsiekrieu, Jihova puya, nie-e sie, “supuonie tsur hie perhie, morei supuonie hie keya chüko nu lelie ta?” iba bayakezhako.

¹⁴Ae nie mhatho kheki sü chü di siazha pie nie tsütuo, Jihova sidi puya; siro ae ketsa süu nu mi puo petushütuo, sidi süu khieümhou keba pete thewatuo.