Read Angami Naga Jeremia 22 Bible Online

Jeremia 22 - Angami Naga bible

Jeremia 22

¹Jihova hakemhie puya: Juda kediu ki tsu di hau pushülie.

²Sidi sie: Jihova die rünyüliecie, he-i Juda kediu, David kediba gei bayakezhau no, mu n kituoko siro n themia kharu hakoha ze di leyakezhako,

³Jihova hakemhie puya: Kethoca mu kemiatho chüshülie, sidi mia peseyakezhamia dzie nunu mia bu u pekawaketamia kelashücie. Siro kekrükecü mu mha kesuo puo rei chü pie rüsomia, u puonuo kejümia gei, morei samimia gei shü hie, morei thechü hau nunu u kejokejümia zie pekru hie.

⁴Kekreilamonyü mhanuü nie die hau dieze chü kethokelie sie, ki hau kharuko nu David kediba gei keba kedimia le tuo, guragari gei mu gura gei tuotuo, uko mu uko kituomia, mu uko themiako.

⁵Derei no die hako rünyülie lhoü liro a thuo rüse keshü, Jihova puya, ki hau methuotatuo.

⁶Kekreilamonyü Jihova Juda kediu kiu dze pukecü hamhie: Noe a la Gilid kemhie, tsiu Labanon tsüu kemhie zo; derei a n chüpie kijükesia tsiu nadi nu themia lhou moketa[40] chüwatuo.

⁷Ae mhapekayakezhamia kese pie n perhietuo, uko pete bu u rünyieko setuo; ukoe nie sedarbo keviko wiwatuo, sidi süko kelhoupie mi nu shüwatuo.

⁸Siro seyie kekra nadi hau khierho votuo, sidi uko sie huoniehuo ki, “Kiüdi Jihovae hamhiekecü chüpie nadi hau gei shüwate shi?” ituo.

⁹Sitse uko sie, “Kekreilamonyü ukoe Kepenuopfü Jihova ze dietseidiekhokelieu khawate, sidi terhuo kekrei rüsuo mu süko lie chü tuoketa la nu lie,” ituo.

¹⁰Siaketamia la kra ba hie, morei puo krükra hie; derei kepetse nu voketamia la kraliecie, puoe la vo puo kepenuo rüna ngulie lhotakecü la.

¹¹Kekreilamonyü Jihovae Juda kediu Josia nuou Shalum, puo puo sounu kedi kechüu, thechü hau nunu tuo praketau dze hakemhie puya: Puoe hanu la vorlie lho,

¹²derei puoe kedie chü voketa ra nu siatatuo, sidi kijü hau ngu lalie lho.

¹³Dietho kemo geinu puo ki chükelieu, kekrü di puo kibouko chükelieu; puo zanuou mhatho pie kemethuochükewau, tsiu uko zhapie uko tsükemo-u we ce chülietie;

¹⁴puoe sie, “A a thuo a la ki kemeya puo peso gei nu kibou kezhazhakecüko chülietuo” ibaya, tsiu sünu khirkiko chülie, mu sedar la pie sozha dalie, siro kemeriedzü pie thelietuo ibayakezhau.

¹⁵No sedar kedalie üdi kedi chülietieya me? N puo thuo rei cüükrie, sidi kethoca mu kemezhüu chü moü me? Mu süu puo la vi.

¹⁶Puoe kejümia mu ketsopfhümiako nyiekecü; mu süu vi zo. Hau nunu a silie ketuo la me? Jihova siya.

¹⁷Derei n mhi mu n noue dietho mo di ngukelie rübei le, siro kejokejümia zie pekrutuoü, mu mia kepese tsiu mha pekatuoükecütsa la zo.

¹⁸Süla Jihovae Juda kediu Josia nuou Jehoiakim dze hakemhie puya: Uko puo krü di, “He-i, a dzürieu” morei “He-i a üpfü” isilie lho. Uko puo krükra di, “He-i a niepuu” morei “he-i puo zayieu” isilie lho.

¹⁹Gada kekhru tuoi di puo khrutuo, puo teshü se pra kelhoupie Jerusalem kharuko sie shüwatuo.

²⁰Tuo Lebanon nu kho di shieshülie, tsiu Bashan nu shiekhouishülie, Abarim nunu shieshülie, kekreilamonyü n kekhriemia pete pekawate.

²¹No lhou pevi keba ki a n rüchü, derei no sie, “A rünyülie lho” ite. No n khriesa tei ki nu, hai zo a pfhe ze mo.

²²Teikhrie-e n kepfheko pete pfhelietuo, mu n neimia pete mia die chü votatuo; sitse noe n rügerüzhüko pete la menga mu n ziekejü chü batatuo.

²³He-i Lebanonmiako, sedarboko geinu u kru chüse kebako, thenumia nuonuovachü tuoi kechü n gei kephir nhie, no meheimelo[41] pie kedipfü chütie shi!

²⁴A rhei ketuo tuoi, Jihova siya, Juda kediu Jehoiakim nuou kediu Konia thuo a dzie a zatsa dziekha kemhie ba zo shierei a sünunu rei n cierha pieta tuo.

²⁵Sidi n khapie n kerheiro pfhü ketuoko dzie nu mu noe preiketuoko dzienu, Babilon kediu Nebukadnezar dzie nu, Chaldianmia dzie nu shüwatuo.

²⁶Sidi ae no mu n penuokeshü n zuo chü kelhoupie rüna kekreira, n penuo kemo ra shüwatuo, sidi nie sünu nu siatatuo.

²⁷Derei uko la vo nyükecü kijüu nu vorlie lho.

²⁸Konia hau thikewa liproketau, miapuorei lie nyü moketau me? Kiüdi puo mu puosepuoyie chü kelhoupie u si kemo kijü nu shüwata ga?

²⁹He-i kijüu, kijüu, Jihova die rünyüliecie!

³⁰Jihova hakemhie puya: Themia hau puo nuo jü, puo kelhou tei ki vilie kemo puo ükecü thupie zhüwaliecie; kekreilamonyü puosepuoyiemia miapuorei vilie lho, David kediba gei ba di Juda nu mia kekhalie lho.