Read Angami Naga Jeremia 23 Bible Online

Jeremia 23 - Angami Naga bible

Jeremia 23

¹Kuopfhe kehoupuorei a lie nu a kuoko peka mu phruo kecürewaya kezhako we ce chülietie! Jihova siya.

²Süla krodiko Jihova Israel Kepenuopfü a themia pfhekezha kuopfheko dze pukecü hamhie: A kuonuoko bu cüre tuoketa, mu whuo petakewau nieko la zo, siro niekoe süko meholie moketa la. Süla a nie mhatho kesuoko la nieko mehoshütuo, Jihova sikecü puya.

³Süsie a whuoshükewa rünako nunu a a kuo lhiekelieko pfhü kengulietuo, sidi a süko ze la vor uko kro nu shülietuo; sitse ukoe u si vülie tsiu kruolietuo.

⁴Siro a uko pfhelieketuomia pie uko mho shütuo, mu uko michie salie lho, morei mezie salie lho, morei pejüwalie lho, Jihova sikecü puya.

⁵Teisozhako vor touzhie, Jihova siya, sükisü ae kemiatho co puo pie David tsütuo, tsiu puoe kedimia puo chü dituo sidi mha puotouu chütuo, siro kijü gei kethoca mu kemezhüu chüshütuo.

⁶Puo teiki Juda kelalietuo mu Israel khrukhre di lhoutuo. Siro puo za kieketuou sü hau: “Jihova u kemiatho-u zo.”

⁷Süla, teisozhako vor touzhie, Jihova siya, süki, “Jihova rhei ketuo mhie Ijipt nunu Israel nuonuoko ze parkeshüu” ikecü pu salie lho,

⁸derei sie, “Jihova rhei ketuo mhie Israel kiu pesotsa nu, tsie ae whuoshükewa kijü pete nu cha tha ze ketuou” isikecü putuo. Süsie uko u thuo u kijü nu lhoutuotatuo.

⁹Siedzekesiko dze pukeshü: A meloue a nounu prote, a ruko pete mele bate; ae kesiamia tuoi, zu bu puo penyü seketuomia puo tuoite, Jihova mu puo kemesa die lanu.

¹⁰Kekreilamonyü kijüue pieü thuo tshute; rüse la nu kijüu thekrü chüya, tsiu nhatsa nu thu tuoko sote. Uko medzikezha chau suo, tsiu uko kekuou puo tou mo.

¹¹Siedzekesiko mu zievoko rei Ukepenuopfü kitsamia mote; a kinu zorei a uko rügerüzhüko ngute, Jihova sidi puya;

¹²Süla uko chae kezei nu cha kerünyüko tuoitatuo, sidi sünunu uko whuoshütuo mu tetsutatuo; kekreilamonyü uko pechükecü teicieu nu, ae mha kesuo se uko gei vortuo, Jihova sidi puya.

¹³Ae Samaria nu siedzekesimia donu kerütsekecü puo ngu; uko Baal geinu siedzekesi die pu sidi a themia Israel bu cha vajopfü tuote.

¹⁴Derei Jerusalem siedzekesiko donu mha kemeriekuokecü puo ngu; ukoe pieü chü, sidi kecürü nu tuo; ukoe mha kesuo kechümia chü kemeteishü, sidi miapuorei puo rügerüzhü nunu rüreilie mo; uko pete rei a mhodzü ki Sodom kemhie, mu sünu kelhoumia pete Gomora tuoite.

¹⁵Süla krodiko Jihova siedzekesiko dze pukecü: “Ae ciena pie uko va chütuo, sidi uko bu therei dzü krietuo; Jerusalem siedzekesiko kinunu miatho kemo kijü pete nu votakecü la.”

¹⁶Krodiko Jihova hakemhie puya: Siedzekesiko nieko ki siedzekesidie pukecü rünyü hiecie; ukoe nie chü penya keba zo. Ukoe u thuo u nou nu kenguu puya, süla Jihova tie nunu kevor puya mo.

¹⁷Ukoe Jihova die rütsekecüko ki pu di, “Süu nie la vituo” iya; tsiu u nou nu tuoyakezhamia pete ki pu di, “Mha kesuo puo rei nieko gei vorlie lho” siya.

¹⁸Süko donu supuonie Jihova kepetha nu thalie, tsiu puo die silie mu rünyülie vi ga? Supuonie puo die rünyülie di süu pu pesishülie ta?

¹⁹Harie, Jihova teikhrieu mehoshücie! noupfhünouyieu rükhrie prate, teikhrie kere puo; süue te kemerie chü di kerüzhüko tsü gei tsutuo.

²⁰Jihova medo chü tseilie kemochie, tsiu puo nou kele chülieta kemochie, puo noupfhüu lata lho. Thelatsa nie teisozha süu si kemecielietatuo.

²¹Ae siedzekesiko ketseshü mo, sirei ukoe ta vote; a uko ki die pushü mo, sirei ukoe siedzekesidie pu

²²Derei ukoe a kepetha thalie, sidi a dieko pie a themiako ki pushülie, sitse ukoe uko zho kesuo nunu rüreilie, mu uko mhatho kesuoko nunu rüdilie zotuo.

²³Ae kepenuo nu keba Kepenuopfü mo di kepetse nu keba Kepenuopfü moü me? Jihova sikecü puya.

²⁴Themia puo a bu puo ngulie lhoü di kerüshükerüviera nu puo kevie sebalie vi me? Jihova sikecü puya.

²⁵Ae siedzekesidie pu di, “A mho pema, a mho pema” isikecü siliete.

²⁶Siedzekesiko kedithechiepuo rürei vor mo di u nou se ketijü siedzekesi pu, tsiu u thuo u nou se u sese ketuo siedzekesi kro puo chü tuotuo ga?

²⁷Ukoe uko mho pemakecü pie a themiako ki pu di uko bu a za rükra motaketuo le, uko puonuokoe Baal se di a za rükra mo tuoketa tuoite.

²⁸Siedzekesiu puo mho pemakecüu bu puo mho-u pushücie, derei a die sekebau puo dietho di a dieu pushülie. Rügu mu telha unie kedipuo kekrei ga? Jihova sikecü puya.

²⁹A die-e mi kemhie zo moü me? Jihova sikecü puya, siro martul-e ketsie vütshie phawayakezha mhie zo moü me?

³⁰Süla siedzekesimia huoniehuo kinu a die rügukelieko perhie tuoya, Jihovae sikecü puya.

³¹Harie, ae siedzekesimia, u meü ki, “Jihovae puya” isikecüko perhieya, Jihova sikecü puya.

³²Harie ae u mho kemeda siedzekesi puyakezhako, tsiu menuokemo mu kemeda nunu a themia bu cha vajopfü ketuoko perhieya, ae süko ketseshü mo, morei uko pethoshü mo; süla ukoe themia hako gei mha kevi puo rei chüshü lho, Jihova sikecü puya.

³³Siro themia hako morei siedzekesi, morei zievo-u n ketso di, “Jihova pieu kikecü puo ga?” ikesie ki, noe uko ki, “Niekoe puo pieu, mu puoe kelhouwatuo, Jihova siya” sishülie.

³⁴Siro siedzekesiu, zievo-u morei themia “Jihova pieu” isi di kepumia la liro a uko mu uko kinuko siazha pie tsütuo.

³⁵Nieko pete rei hamhiekecü pie huoniehuo ki, nie thuo nie donu, “Jihova kedipuo pu kelashü ga?” morei “Jihova kedipuo pushü ga?” isituo.

³⁶Derei, “Jihova pieu” nie pu salie lho, kekreilamonyü thepieue themia pete dieu chütatuo, mu süla niekoe rhei tuoyakezha Ukepenuopfü, krodiko Jihova, úko Kepenuopfü dieko chü kediwaketa la.

³⁷Noe hamhiekecü pie siedzekesiu ki pushülie, “Jihova kedipuo pu n die kelashü ga?” morei “Jihova kedipuo pushü ga?” si.

³⁸Derei mhanuü noe sie, “Jihova pieu” ishü, siro Jihova hakemhie puya; kekreilamonyü niekoe, “Jihova pieu” sikecü dieko pukeshü la; a nie ketseshü, di sie, Jihova pieu isikecü nieko pu hiecie sishü.

³⁹Süla ae nieko chüwatuo[42] mu a mhodzünu nu nie kelhouwa tou zotuo, no mu nie puonuoko ketsü rünako nunu.

⁴⁰Sidi ae kechachie kemezhiekecü tsiu thenga se nieko gei vortuo, süu mhakipuorei rükra motalie lho.