Read Angami Naga Jeremia 24 Bible Online

Jeremia 24 - Angami Naga bible

Jeremia 24

¹Jihova e chiedesi rhakenie Jihova rüsuoki mhodzünu keba pie a kie. Hauha Babilon kediu Nebukadrezar-e Juda kedi Jehoiakim nuou Jekonia, Juda nu kezhako, seimistiriko mu rükreimiako sa di Jerusalem nunu ze Babilon nu vorkelie sie we.

²Merha puo nu chiedesi vi sekecü ba, sükoe melie kerieu ki tuoi, derei merha kekreiu nu chiedesi we suo se, sükoe suo pie cülie kenjü.

³Sitse Jihova sie a ki, “Jeremia no kedipuo ngu ga?” si. Sitse a sie, “Chiedesi keviko vithor, mu kesuoko suothor, süko suothorcü la cülie kenjü” sishü

⁴Sitse Jihova die a ki vor,

⁵Jihova Israelko Kepenuopfü hakemhie puya: Judako mia die chü voketako, ae thechü hau nunu uko ketsepie Chaldianmia kijü nu shükewako, ae süko pie chiede kevi hako mhie üdi letuo.

⁶Ae uko dzevi la a mhi pie uko mehotuo, sidi a uko ze la kijü hau nu vorshütuo, tsiu ae uko phou sesie shütuo, mu uko biekhrü pie tsu zhüwalie lho; ae uko pelhoushütuo mu uko phewalie lho.

⁷Ae Jihova zoükecü silieketuo nou pie uko tsütuo; sitse ukoe a themia chülietuo, mu ae uko Kepenuopfü chülietuo, kekreilamonyü ukoe thenou pete se a ki vorlieketuo la.

⁸Derei Jihova hakemhie puya: Chiedesi kesuoko suothorkecü la cülie kenjü kecüko tuoi, ae Juda kediu Zedekia, puo kezhako, Jerusalem nu lhiepie kijü hau nu kebako tsiu Ijipt kijü nu kelhouko gei chüshütuo.

⁹Sidi ae uko chüpie kemeriekecümia, mu kijü nu kedi pete la mha kesuo puo, thengachü, mia diebo chü, u pese, mu a uko whuokeshü thechü kheko nu mia bu u rüsekecü chütuo

¹⁰Siro ae zhiecha, pekriekecü mu thepetheruo ketsepie uko donu shütuo, a pie uko mu u puonuoko ketsü kijüu nunu pekawa kemochie si batuo.