Read Angami Naga Jeremia 25 Bible Online

Jeremia 25 - Angami Naga bible

Jeremia 25

¹Juda kediu Josia nuou Jehoiakim kedi chükelie cie dia cie Juda themia pete la die Jeremia ki kevor, (süue Babilon kediu Nebukadnezar dikelie cie thenieu),

²süu dze siedzekesiu Jeremia Juda themia pete, mu Jerusalem nu kelhoumia pete ki pukeshü

³Juda kediu Amon nuou Josia dikelie cie kerese cie, vor teisozha hanhie ketso, süusü cie mepfüese cie Jihova die a ki vor, mu ae nie ki pu beishü zo, derei nieko a pfhe rünyü mvüte,

⁴Siro Jihovae te mo zo puo kituo siedzekesiko pete ketseshü zo, sirei niekoe rünyü mvü morei rünyütuoü nie nyie kedeishü mo,

⁵Uko sie, “Nieko kehoupuorei tsie nie zho kesuo nunu mu nie mhatho kesuo nunu rürei vorliecie, sidi Jihova pie nieko mu nieko puonuoko kechachie la tsükeshü kijü nu, balietuo.

⁶Siro terhuo kekrei lie chü morei rüsuota hie, siro nie dzie mhatho pie a nou chü kemeyieta hie. Sitse a nieko gei kepechü yopuo rei khashülie lho,” sishü.

⁷Sirei nieko a pfhe rünyülie mo, Jihova siya, süla nieko nie dzie mhathopie a nou chü kemeyie di nie thuo nie pechütuoüte.

⁸Süla krodiko Jihova hakemhie puya: Noe a dieko zelie moketa la.

⁹Ae pesotsa seyieko pete kieshütuoüzhie, Jihova siya. Babilon kediu, a kituou, sidi a uko ze vor kijü hau mu sünu kelhouko, mu seyie lutsahatsa houpfükeba pete perhietuo; sidi uko pekawatuo, mu uko chüpie mia bu u michie, mu u rütse tsiu kechachie mengazhütatuo.[43]

¹⁰Siro ae uko donu nu kenei pfhe, thenou kemvü pfhe, yasau pfhe, mu yasapfü pfhe, kegetsie pfhe mu mibou kezie chüsetatuo.

¹¹Sidi kijü pete peka mu chü kemethuowatuo, siro seyie hako cie hiethenie Babilon kediu lie chütuo.

¹²Situo di cie hiethenie tseitsa tse, uko kephoumako ae siazha pie Babilon kediu mu seyie süu, Chaldianmia kijüu tsütuo, Jihova sikecü puya, sidi kijüu bu kechachie methuo zhütatuo.

¹³Ae kijü süu petsoukecü die pukeshü pete, leshüda hau nu thupie kezhü kheko, Jeremia seyieko kepetsou siedzedieko, se vortuo.

¹⁴Kekreilamonyü seyieko mu kedi kezhamia rei süko lie chütuo; tsiu uko mhatho kheki sü chü mu uko dzie-e chükeshü tuoi a uko zhakhra chüshütuo.

¹⁵Kekreilamonyü Israel Kepenuopfü Jihova a ki: A dzie nunu nouyie zu hieu lieliecie, sidi a n ketsepie u ki keshü seyie pete bu süu krieliecie.

¹⁶Ukoe süu krielietuo, di pevüvüi votuo tsiu nyatatuo, ae zhiecha ketsepie uko donu shüketuou la sitatuo.

¹⁷Süla ae Jihova dzie nunu tehieu lielie, di Jihova a ketsepie u ki keshü seyie pete bu süu krie:

¹⁸Sükoe Jerusalem, mu Juda rünako, sünu kediko kezhako, uko bu thedzükezei mu methuotaketuo, mia krenyü chükecü mu rüsepfüketuo, thie nhie ha tuokecü chütuo;

¹⁹Ijipt kediu Faro, puo kituoko, puo kezhako, mu puo themiako

²⁰themia kereiketuoko; Uz kijü nu kediko, Filistin kijü nu kediko pete, Ashkelon, Gaza, Ekron mu Ashdod lhiekeshüko,

²¹Edom, Moab mu Ammonmiako;

²²Tur kediko pete, Sidon kediko pete, mu dzükezha khie kijü rüchütsokemo nu kediko,

²³Dedan, Tema, Buz mu kijü vala nu ketuo pete,

²⁴Arabia kedi pete, mu kijü kesia nu themia kerei di lhou ketuo kedi pete;

²⁵Zimri kedi pete, Elam kedi pete, mu Media kedi pete,

²⁶Pesotsa kedi pete, kepetse nu mu kepenuo nu ketuoko, puo sie puopuo idi, mu kijüu gei ketuo kedirüvie peteko, siro süko sie kediu Sheshak-e[44] krietuo.

²⁷Sitse noe uko ki, Krodiko Jihova Israel Kepenuopfü hakemhie puya: Krielie mu mezelie di merülie, tetsutalie mu mhakipuorei lasie hie, kekreilamonyü a zhiecha ketsepie nieko donu shütuo.

²⁸Siro mhanuü uko n dzie nunu tehieu krietuoü pie mvü ro, noe süko ki, hakemhie pushülie, krodiko Jihova hakemhie puya: Nieko krie bei morosuo!

²⁹Harie, a nadi a za kieyakezhau gei kepeka se vorzhie, mu süla nie kimhie di siazhau therhielie vi üya ga? Nieko siazha ngu motalie lho, kekreilamonyü a zhiecha puo kie pie kijüu gei kelhou themia pete gei shütuo, krodiko Jihova sidi puya.

³⁰Süla no die hako pete se siedzekesidie pu uko petsoushülie: Sidi uko ki Jihova peso geinu mehoshütuo, mu puo keba kemesa chü nunu puo pfhe phrashütuo; puoe ruo kemerie chü di puo themiako petsoutuo, puoe kijüu gei lhoukeba peteko petsou di khubedzü theyakezhamia tuoi shiekhouishütuo.

³¹Mhapfhe puo kijü vala ketso votuo, kekreilamonyü Jihovae seyieko pejoshüte; puoe u chü u phoukepfü pete nyie pepituoü thate, mu puoe kerüzhümia pie zhiecha tsüwatuo, Jihova sidi puya.

³²Krodiko Jihova hakemhie puya: Harie, kepekau seyie puo nunu seyie kekreiu gei vortuo, tsiu kijü vala nu khriedi puo vortuo!

³³Jihova bu dukhrikewa teisozha süu kijüu tietsa puo nu vo kijü kekreitsa tsotuo. Mia süko krükralie lho, morei pfhü kengulie lho, morei khrulie lho, süko kijüu gei thebuo chütatuo.

³⁴Kuopfheko, thekrü chü mepfükeruoilie, mu kralie; sidi mige nu nie kephrelie, kuopfheko mho niepuko, kekreilamonyü nie dukhriketuo teisozha mu nieko bie kezawaketuo vor bate, mu niekoe mhabou kevi puo tetsuketa tuoi zotuo.

³⁵Kuopfheko takelie cha jütatuo, mu tekuo kro mho niepuko tapralie lho.

³⁶Tekuokepfheko kekra pfhe, mu tekuo kro niepuko pfhe si partuo. Kekreilamonyü Jihovae uko nha kemeneko bie pesuowate,

³⁷Mu lhou menekebako bie pesuowate, kekreilamonyü nouyieu kemerie chüketa la.

³⁸Puoe losha tuoi puo keyau khawate, kekreilamonyü zho suo zhiechau, mu nouyie kemerie chüketa la uko kijüu bie kemethuowate.