Read Angami Naga Jeremia 26 Bible Online

Jeremia 26 - Angami Naga bible

Jeremia 26

¹Juda kediu Josia nuou Jehoiakim kedi chükelie therie ki Jihova kinu die kevor:

²Jihova hakemhie puya: Jihova kifükhro thalie di, Juda nadi peteko nunu Jihova kiu nu rüsuotuoü kevorko pete ki, a n bu uko ki pu nu keshü dieko pete pushülie, die yopuo rei bie petsawa hie.

³Sitse uko rünyülie rei silie lho mu, sidi themia pete rei puo zho kesuo nunu rüdilie mu ae uko mhatho kesuo la uko gei chüshütuoü lekecüu nu a nou rüdita rei silie lho mu.

⁴No uko ki pushülie: Jihova hakemhie puya: mhanuü niekoe a pfhe rünyü mo, a thezho pie nie mhodzünu keshü medzilie mo,

⁵tsiu a te mo zo di a kituo siedzekesiko dieko rünyülienu ketseshü, derei niekoe rünyülie mo liro

⁶ae ki hau chüpie Shilo kemhiewatuo, tsiu nadi hau chüpie puo bu kijüu nu seyie pete rüsekewa chüwatuo.

⁷Siro zievoko mu siedzekesiko tsiu themiako pete Jeremia-e Jihova kiu nunu die hako kepu si.

⁸Siro Jeremia-e Jihova puo bu themia pete ki pu nu di diekhakeshü pete pu thewa tse, zievoko mu siedzekesiko tsiu themia petekoe puo telie di sie, “No sia tou zotuo!

⁹No kiüdi Jihova za nunu siedzekesi die pu di sie, ‘Ki hau pie Shilo kemhiewatuo, siro nadi hau nu themia puorei ba mota di chü kemethuowatuo’ isiya ga?” sita. Sidi themiako pete vor Jihova kiu nunu Jeremia houpfülie.

¹⁰Siro Juda nu kezhakoe hako sikeshü ki, ukoe kediu ki nunu Jihova kinu khor, sidi Jihova kiu nu kharu kesau ki balie.

¹¹Süsie zievoko mu siedzekesikoe sie kezhako mu themiako pete ki, “Themia hau siata sü zo, kekreilamonyü puoe nadi hau petsoukecü siedzedie pu, nie thuo rei nie nyie pie siwate” sita.

¹²Sitse Jeremia sie kezhako pete mu themiako pete ki, “Nieko sikeshü die hako pete Jihovae a bu ki hau mu nadi hau petsoukecü siedzedie pu nu shüwe.

¹³Süla tsie nieko zho rüli mu nieko mhatho chükedilie, sidi nieko Kepenuopfü Jihova die chüüzelie, sitse Jihova nieko petsou di pukeshü geinu puo nou kedilietuo.

¹⁴Derei a zo we, nieko dzie nu ba. Süla nie mhodzü ki viü mu puotoukecüu chüpie a gei shüwalie.

¹⁵Derei nieko si toulie, mhanuü nie a biekhriwa liro, kejo kejü zie se nie thuo nie gei mu nadi hau gei, tsiu sünu kelhoumia gei votatuo, kekreilamonyü Jihovae a bu die hako pete pie nieko nyieto nu shünu di a ketseshü ketho zo” sishü.

¹⁶Sitse kezhako mu themia petekoe sie zievoko mu siedzekesiko ki, “Themia hau bu siaketuo mese mo, puoe Kepenuopfü Jihova za nunu uko ki diepu shü zocü la” sita.

¹⁷Süki kijüu nu pehümia kro puo sietha di vor kengukeba themia peteko ki pukecü,

¹⁸“Moresheth nu Mika Juda kediu Hezekia teiki siedzedie pu di Juda themia pete ki pushülie: ‘Krodiko Jihova hakemhie puya, Zion-e lie kemhiei phiewatatuo; Jerusalem va pie kepupfü zhütatuo, tsiu kiu kijüthou gei sei lhou sie puo thou chü tuo’ sishü.

¹⁹Juda kediu Hezekia mu Juda themia pete-e puo dukhriwaü me? Puo Jihova prei di Jihova neiu chü, sidi Jihova uko pekatuoü pushükewau nunu puo nou kedilie moü me? Derei úkoe kepeka kemeriekecü se u thuo u gei vortuoü bate!”

²⁰Siro themia kekrei puo Jihova za nunu siedzedie pu, Kiriat-jerunmia Shemaia nuou Uria, Puoe Jeremia kepu mhie di nadi hau mu kijü hau kepetsou siedzedie pu.

²¹Mu kediu Jehoiakim, puo terhümiavi pete mu kezhako pete, puo dieko sitse, kediu puo dukhriwatuoü pfhü sieta; derei Uria süu sikeshü ki, puoe michieta di Ijipt nu tsuta.

²²Sitse kediu Jehoiakim-e mia ketsepie[45] Akbor nuou Elnathan mu puo sa themia kro puo ketse pie Ijipt nu shü.

²³Sidi ukoe Ijipt nunu Uria telie, di puo ze kediu Jehoiakim ki vor, sitse puoe zhiecha pie puo dukhriwa, di puo kesiamo kelhoupie miaümia mekhru nu shüwa.

²⁴Derei Shafan nuou, Ahikam dzie-e Jeremia kitsa ba, süla uko bu puo khapie themiako tsüwa di puo bu siata molie.