Read Angami Naga Jeremia 27 Bible Online

Jeremia 27 - Angami Naga bible

Jeremia 27

¹Kedi Zedekia, Josia nuou, Juda kijü mho dikelie therieki Jihova kinu die Jeremia ki vor.

²Jihova hai di a ki pukecü: No seita pie vocie chülie, sidi süko pie n vo nu shülie.

³Sidi die ketsepie Edom kediu, Moab kediu, Ammonmia kediu, Tur kediu, mu Sidon kediu tsücie, Jerusalem nu kediu Zedekia ki vor keba dieliemia dzie nunu ketseshücie.

⁴U niepuko la die hau pushülie: Krodiko Jihova, Israel Kepenuopfü hai di puya: Hau sie nieko niepuko ki pushücie;

⁵Kijüu, themia mu khunuo kijüu gei ketuoko, a kekuo kezha tsiu a bou yhapie chüshü, sidi süu pie a mhodzü ki puotoukecümia tsüya,

⁶Siro tsie a kijü hako pete pie Babilon kediu Nebukadnezar, a kituou dzie nu shüwate, siro lie nu khunuoko bu puo lie chünu di ae pie puo tsüwate.

⁷Sidi seyie pete puo lie chütuo, mu puo nuo, mu puo tsunuoko idi puo kijüu teiu vorlie kemochie situo; mu süsie seyie kekra mu kedi kezhako puo pie uko diemia chülietatuo.

⁸Derei seyie kehoupuorei Babilon kediu Nebukadnezar lie chü mo, mu u vo nu Babilon kediu vocieu shükemomia, ae zhiecha mu pekriekecü, tsiu thepetheruo pie seyie süu pechütuo, ae puo dzie bu süko pekawa kemochie si tuo, Jihovae siya.

⁹Süla nie siedzekesiko, nie themouko, nie mho kepemako, meduoyakezhako, mu mhasekedoyakezhako pfhe rünyü hie, sükoe nie ki, “Nieko Babilon kediu lie chü hie” isiya.

¹⁰Kekreilamonyü ukoe nieko ki ketijü siedzedie pu di nie kijüu nunu nie ze kepetsera vota, sidi a bu nie whuowa, mu nie bu kaüjütatuo.

¹¹Derei u vo pie Babilon kediu vocie nu shükelie seyiemia, mu puo lie chükeliemia ae süko bu u thuo u kijü nu balietuo, Jihova sicü puya, mu ukoe süu cielie di sünu lhoutatuo.

¹²Ae Juda kediu Zedekia ki rei sükemhie tou di pu: N vo se Babilon kediu vocie nu leliecie, sidi puo mu puo themiako lie chülie

¹³Kiüdi no mu n themiako, zhiecha geinu, pekriekecü geinu, mu thepetheruo geinu siatuoü, Jihovae Babilon kediu lie chü kemo seyieko dze kepu kemhietatieya ga?

¹⁴Nieko Babilon kediu lie chü hiecie idi kepu siedzekesiko die rünyü hie, kekreilamonyü ukoe nieko ki ketijü siedzedie puya.

¹⁵Ae uko ketseshü mo, Jihova siya, derei ukoe a za nunu ketijü siedzedie puya, sikecü la nieko mu nie ki siedzekesidie kepuko whuowa di nieko bu katatuoükecü la.

¹⁶Süsie ae zievoko mu themiako pete ki pu di, Jihova haicü puya; siedzekesiko nieko ki siedzedie pu di, “Jihova kinu mhabouko Babilon nunu se la vortatuo” ikecü kepuko pfhe rünyü hie.

¹⁷Uko pfhe rünyü hie; Babilon kediu lie chülie, sidi rheiliecie, kiüdi nadi hau perawatuo ga?

¹⁸Ukoe siedzekesimia üliro, mu Jihova die uko zetuoü liro, uko bu tsie krodiko Jihova ki chacie, sidi Jihova kinu nu, Juda kediu kinu, mu Jerusalem nu mhabou peshapie kebako bu Babilon nu vota molieketuo la.

¹⁹Kekreilamonyü krodiko Jihova ki coko, dzükezhau dze, mvüdzeko dze, mu nadi haunu pesha piekeba mhabouko,

²⁰Babilon kediu Nebukadnezar-e Jerusalem nunu Juda kediu Jehoiakim nuou Jekonia, mu Juda mu Jerusalem nu pehümia peteko te ze kedie chüketa ki ze tsu kemoko.

²¹Krodiko Jihova Israel Kepenuopfüe Jihova kinu mu Juda kediu kiu nu mu Jerusalem nu mhabouko baluokecüko dze hamhiekecü puya.

²²Süko toupfü Babilon nu tsutatuo, sidi a vo uko mehoketuo teisozhau vor kemochie, süko sünu ba zotuo, Jihova sicü puya, süsie ae süko se vorlietuo, sidi süko pie thechü hau nu shü lalietuo.