Read Angami Naga Jeremia 29 Bible Online

Jeremia 29 - Angami Naga bible

Jeremia 29

¹Jeremia siedzekesiue Jerusalem nunu leshü thupie te ze mia die chü voketa pehüko, zievoko mu siedzekesiko, siro Nebukadnezar-e Jerusalem nunu te ze Babilon nu voketa themia peteko ki keshü die hako.

²Hau kediu Jekonia, mu kedipfünuo zuo, kediki nu kezhako, Juda mu Jerusalem krütako, sei mistiriko mu rükreimiako, Jerusalem nunu te zeketa sie nu ketseshü.

³Kediu Zedekia-e Shafan nuou Elasa mu Hilkia nuo Gemaria unie ketsepie Babilon nu kediu Nebukadnezar ki shü mu unie dzie nunu leshüu ketseshü. Sünu pucü:

⁴Krodiko Jihova Israel Kepenuopfüe mia die chü voketako, ae Jerusalem nunu te ze Babilon nu tsuketako ki hakemhie puya.

⁵Ki chülie, sidi sünu lhou balie, tezie chülie, sidi sünu lhou parkelie cülie.

⁶Thenu lielie, sidi nie nuonuo thenu rei thepfu rei nyilie; nie nuonuo thepfuko bu thenu lielie, nie nuonuo thenuko bu nyhülie, sidi uko bu thenu rei thepfu rei pelhoulie, sidi nieko sünu kruolie mu tsata hie.

⁷Derei a nieko bu ta voketa nadiu dzevi pfhülie, tsiu Jihova ki süu la chalie, kekreilamonyü süu dzevi nunu nie dzevi rei ngulietuo.

⁸Krodiko Jihova, Israel Kepenuopfü hakemhie puya: Nieko donu siedzekesiko mu kemeduoko bu nie sekedowa hie, morei u kepema mhoko rünyü hie,[46]

⁹Kekreilamonyü uko a za nunu ketijü siedzedie puya; a uko ketseshü mo, Jihova sikecü puya.

¹⁰Kekreilamonyü Jihova hakemhie puya: Babilon nu teicie hiethenie tseiketa ze nu a nieko ki la vortuo, sidi a phrakeshüu nieko gei chü tseishütuo, mu a thechü hanu nieko ze la vorshütuo.

¹¹Ae nieko la mharhü kebako ae si ba, Jihova sikecü puya, nie dzevi la mharhü zo mu nie pesuowaketuotsa mo, siedze kemerü puo pie nie tsüketuo la

¹²Süsie niekoe a kietuo, sidi vor di a ki kecha chütuo, sitse ae nie pfhe rünyütuo.

¹³Nie a kiekecü ki, nieko a ngulietuo; nie nou pete se a pfhü liro,

¹⁴nieko bu a ngulie tuo, tsiu nieko whuopie seyie neiünei nu mu thechü neiünei nu shükewara nu ae nie ze vor kengulietuo, Jihova sikecü puya, mu ae nieko te ze voketa thechüu nu nie ze la vorshütuo.

¹⁵Kekreilamonyü niekoe pukecü, “Jihovae Babilon nunu u la siedzekesimia pie sierliete” iya.

¹⁶David kedibau gei keba kediu, siro nadi hau nu kelhou themia peteko tsiu nieko siezedzürie nieko ze ta kemoko dze Jihova hakemhie pushü.

¹⁷Krodiko Jihova hakemhie puya, ae uko gei zhiecha, pekrie, thepetheruo khashütuo, sidi ukoe suothorketa chiedesi cülie kenjükecü tuoiwatuo.

¹⁸Ae zhiecha, pekrie mu thepetheruo se uko pechütuo, sidi uko pie kijüu gei kedirüvie neiü nu mia bu u michie, rüsekepfü viepuo, mu miakechükede, mu mia bu rütse, mu uko whuopie seyie neiü nu keshü kheko nu mia bu u pesetuo,

¹⁹Kekreilamonyü ukoe a pfhe rünyü mvüte, Jihova siya, ae temo zo di a kituo siedzekesiko ketseshü, derei uko rünyü mvüte, Jihova siya.

²⁰Derei tsie nie miadiechü voketako, a bu Jerusalem nunu ketsepie Babilon nu shükewako:

²¹Krodiko Jihova Israel Kepenuopfüe Kolaia nuou Ahab mu Maseia nuou Zedekia a za nunu ketijü siedzekesidie pu di: Ae uko khapie Babilon kediu Nebukadnezar dzie nu shüwatuo, mu puoe nieko mhingu kinu uko dukhriwatuo.

²²Süko la nu Juda mia die chü Babilon nu keba pete rüse hau setuo: “Jihova n chüpie Zedekia mu Ahab, Babilon kediue miü nunu riekewa mhiewaliecie.”

²³Kekreilamonyü unie-e Israel nu kenya mhatho chü, sidi u zanuomia kimia ze pieü chü, siro a za nu kemeda die pu, a süsü unie bu punu shü mo; a a thuo si ba mu zhapu chükeshüu zo, Jihova sikecü puya.

²⁴Noe Shemaia Nehelam-u ki hakemhie pushülie:

²⁵Krodiko Jihova Israel Kepenuopfü hai di puya: Noe n za nunu leshü pie Jerusalem nu keba khe, mu Maseia zievo nuou Zefania, mu zievo peteko ki shü di hakemhie pushülie,

²⁶Jihova n chü pie Jehoiada sou nu zievo chüshü, sidi Jihova kinu mhakemeho bu balieketuo la, themia kehoupuorei kenyamia kemhie di puo thuo puo chüpie siedzekesimia üta ro, no puo pie kedieki nu shüwalie, tsiu seiphikha mu vokha nu shüwalie.

²⁷Siro kiüdi no tsie Anathoth-u Jeremia nie la siedzekesi chükevor-u kerhie mo ga?

²⁸Kekreilamonyü puo ketsepie Babilon nu keba hie ki pukeshü, “Süu ba chatatuo; kiko chülie di sünu lhou batalie, tsiu tezie chülie sidi sünu lhou parkelieko cülie” sita.

²⁹Sitse Zefania zievo-u leshü hau Jeremia siedzekesiu nyie kinu phrüshü.

³⁰Süsie Jihova die Jeremia ki vor di sie;

³¹Dielie ketsepie mia die chü tuoketa kheko ki pushülie, Jihovae Nehelam-u Shemaia dze hai di puya; Shemaia-e nie ki siedzedie pu, sirei a puo ketseshü mo, sidi puoe nieko chüpie nie bu ketijü peletakecü la.

³²Süla Jihova hai di puya. Ae siazha pie Nehelam-u Shemaia tsütuo mu puose puoyie mia puo bu rei themia hako donu lhoulie lho; a themia la mha kevi chüshütuoü ketuoko ngulie lho,[47] Jihova sikecü puya; kekreilamonyü puoe Jihova petsoukecü pukeshü la.