Read Angami Naga Jeremia 3 Bible Online

Jeremia 3 - Angami Naga bible

Jeremia 3

¹Mhanuü mia puoe puo kimia khawa, sidi süpfüe puo kinu tuota, sidi mia kekreimia puo kimia chüta, siliro puoe süpfü ki la votuo me? Kijü süu perhu sewata motuo me? Noe n neimia kekra ze di thethelie; sidi rürei a ki la vortuo me? Jihova siya.

²Tosie di thechü kerükrieko[4] mehoshücie! No zhükemo thechü kirapuo ba ga? Arabmia nhatsa nu lhou ketuo tuoi, no cha khieki ba di n neimia pfhe. Sidi noe thethelie tsiu n rügerüzhü se kijüu perhuwa.

³Süla tei-e rüshü mote, tsiu bayie teirüu rei rüshü mote; sishierei n teikhie-e thethenumia teikhie tuoi, noe mengalie mo.

⁴No tsie kinu a ki, “A puo, noe a khriesa khrietho-u chü vor zo,

⁵puoe kechachie puo nei mo ba tuo me, sidi süu bu vo puo thela tsotuo me?” isi. Hauha noe pushüe, derei no chülie kevi de mha kesuo chü.

⁶Kediu Josia teiki Jihovae a ki pukeshü: Puo kedipuo chüshü, no ngu mo? Kepele kejü, Israel. Puoe kijüthou kerükrieko gei, tsiu seibo kepejo kheko khro nu thethelie.

⁷Siro a lecü, “Hako pete chükewa sie puoe rürei a ki vortuo” isiba; derei puo rürei vor mo, mu puo sieze kemedapfü Judae süu ngu.

⁸Siro kepele kejü Israel thetheliekecü hako pete la a puo khawa, sidi puo khakewa leshü pie puo tsüwakecü puoe ngu. Sirei puo sieze kemedapfü Judae michielie mo, derei puo rei vo thethelieta.

⁹Kekreilamonyü puoe thethekelie pie mhaü mo, sidi puo kijüu perhuwa, mu ketsie tsiu seiko ze pieü chü di.

¹⁰Mha hako pete nu rei puo sieze kemedapfü Judae puo nou puo thochü di rürei a kitsa vorlie mo, derei puo mevivakecü nunu zo, Jihova sikecü puya.

¹¹Süsie Jihovae a ki: Kepele kejü Israel-e kemeda Juda ki rei mezhü kuokecü thashüte.

¹²Vo di die hakoha pie pesotsa shieshülie, di sie: Kepele kejü Israel, rürei la vorliecie, Jihova sidi puya. A nei kemo nunu n meho lho, ae mia ngumezhieyacü la, Jihovae sidi puya; A kechachie a nei mo ba lho.

¹³Noe Jihova n Kepenuopfü petsou, di n kenei kezapie sikemomia ze seibo kepejo kheko khro zhü, tsiu a die ze mo, di jowaketa puu pushülie, Jihova sidi puya.

¹⁴Rürei la vorliecie, he-i, kepele kejü nuonuoko, Jihova sidi puya, ae n niepuu zocü la; a nadi puo nu mia puo mu kikru puo nu mia kenie, idi a n ze Zion nu vortuo.

¹⁵Siro ae a nou keliemia pie nieko kepfhemia chüshü, ukoe kesikele mu puocapuola kesi se nieko vachütuo.

¹⁶Sidi nieko kijüu nu kralie tsiu kruolie tse, sünhie ukoe “Jihova dietseidiekho bouu” ikecü pu salie lho. Süu uko nou vorlie lho, morei rükralie lho, morei mengu salie lho, Jihova sikecü puya.

¹⁷Süteiki ukoe Jerusalem üse Jihova kediba üdi kietuo, mu seyie pete sünu vo kengutuo, Jihova za se Jerusalem nu votuo, mu ukoe u nou re di u kelekemedo kesuo nu tuo salie lho.

¹⁸Sükisü Juda kinumia Israel kinumia ze tuotuo, sidi ukoe kijü pesotsa nu a khapie nieko puonuoko bu welietuoü di khashü tsükecü kijü nu keze vortuo.

¹⁹Kedipuo mhie di a n khapie a nuonuoko donu shü, sidi kijü kevi puo, seyieko donu kayie kevi puo pie n tsüshütuoüliete shi idi ae le. Siro a lecü, no üse, A Puo, idi a siemedzikecü nunu rürei lata lho nhie iba.

²⁰Mianupfünuo puo dietho mo di puo nupfu khakewa tuoi, sütuoi nieko a gei dietho mote, he-i Israel kinumiako, Jihova siya.

²¹Mhapfhe puo thechü kerükrieko[5] gei si vota, Israel nuonuoko la thekrü chükecü, kekreilamonyü ukoe uko cha bie kerülhiwate, ukoe uko Kepenuopfü Jihova rükra mote;

²²Rürei la vortacie, nie kepele kejü nuonuoko, sitse a nie kepele kejüu chü kemeneshütuo. “Hie n ki vorzhie; noe hie Kepenuopfü Jihova zokecü la.

²³Kijütseiko mu kijüthou gei kerüyoko, u seketuo zo. Jihova úko Kepenuopfü gei Israel kelakelie ba tou zo.

²⁴“Derei u khriesarüü tei ki thengau thuo u puonuoko mhatho, uko kuoko, mu uko kicükiriko, uko nuonuo thenu mu thepfu mezuliete.

²⁵Uko menga di tetsuzhüta khe, tsiu u therhu jüketau bu u yalie khe, kekreilamonyü we Kepenuopfü Jihova gei phoumawate, u puonuoko, u khriesarüü nunu vor thie ha ketso, sidi úko Kepenuopfü Jihova die zelie mote.”