Read Angami Naga Jeremia 30 Bible Online

Jeremia 30 - Angami Naga bible

Jeremia 30

¹Jihova die Jeremia ki vor:

²Jihova, Israel Kepenuopfü hai di puya: A n ki pukeshü pete pie leshüda puo nu thuliecie.

³Jihova sikecü puya, sükisü a themia Israel mu Juda mia die chü tuoketako ae ze la vorshütuo, Jihova sikecü puya, sidi ae khapie uko puonuoko ketsü kijü nu uko bu la vorketuo, mu uko süu welietuo.

⁴Jihovae Israel mu Juda dze kepu die hako:

⁵Jihova hai di puya: Hiekoe kehoukeruo chü, michie, kemeriekecü, mu noune kejü pfhe sishüte.

⁶Tsie ketsocie, sidi mehoshücie, thepfumia nuonipfülieya me? Siro kiüdi themia pete rei u dzie pie u va nepfü di thenumia nuonuovachü ki mhieta ga? Kiüdi mia pete zie teimekie haita ga?

⁷He-i! Teisozha süusü kemerie zo, süu kemhiekecü jü; Jakob kemezhiekecü teiu, sirei süu nunu puo kelalietuo.

⁸Sünhie, krodiko Jihova puya, ae puo[48] vo nunu puo vocieu bietshawa, siro puo phako phreiwa, tsiu sikemo themia bu puo pie kituo chü salie lho.

⁹Derei ukoe uko Kepenuopfü Jihova, mu a pie uko tsüketuo u kediu David lie chütatuo.

¹⁰Derei n la zo we michieta hie, a kituo Jakob, Jihova siya, tsiu nie nousuota hie, he-i Israel; kekreilamonyü a kepetsera nu, mu n seyieko mia die chü ketuo kijü nunu kelashütuo. Jakob-e la vorlietuo, sidi kerülei ngulie di kemekrie batatuo, siro miapuorei puo chüpie puo bu michietalie lho.

¹¹Kekreilamonyü a n kelashü moü di n ze tuo zo, Jihova siya; ae n bu cüretuoketa seyieko pete peka lotsowatuo, derei n bu puo thela chütalie lho. Sirei a n petha tuo zotuo, tsiu n bu siazha ngu mota zo di tuolie lho.

¹²Jihova hakemhie puya: N noukechüu chü kemenelie kenjüte, tsiu n rüzau re sete.

¹³N nyieu nu n yapie shüketuo miapuorei tuo mo, n rüzau la daru jü, n chü kemenelie kenjüte.

¹⁴N kekhriemia pete rei n rükra mote; uko n la nounyü puorei jü; kekreilamonyü ae ngumvümia tuoi n bieshü, mia kepetsoumia u zhosuo di chüyakezha tuoi, süusü n kejokemou zha phiketa la, mu n kephouma kra phiketa lanu zo.

¹⁵Kiüdi kemezhiekecü la kraya ga? N kechüu chü kemenelie kenjü, n kejokemou zhathorte, mu n kephouma kra phiketa la, a mha hako chüpie n gei shüwate.

¹⁶Süla n pekakecümia pete pekawatuo, tsiu n ngukemvümia pete, uko kehoupuorei mia die chü votatuo; siro n bie pesuokecümia pete bie pesuowatuo, mu n rükeba pete ae pie mia chüte chüwate.

¹⁷Ae n bu shürholietuo, tsiu a n rüza pfüko chü kemeneshütuo, Jihova sidi puya, kekreilamonyü ukoe no üse thikewau üdi sie; “Hauha Zion; miapuorei puo sanyüya kemo-u” isite.

¹⁸Jihova hakemhie puya: Ae Jakob pfhekiko theruo keviu se la vorshütuo; sidi puo kebachüko ngumezhieshütuo, razhüketa nadiu chü lashü tuo, sidi kedikiu bu sünu puotoukecü chü nu balietuo.

¹⁹Süko geinu kethezie pfhe, mu kenei pfhe si partuo. Ae uko chü pekrashütuo, mu uko tsatalie lho; a uko chü ketherhushütuo mu mia uko pese salie lho.

²⁰Uko nuonuoko rei keriekimia tuoi, uko a mhodzünu uko kehouu chülietuo; mu ae uko pesekecüko siazha pie tsütuo.

²¹Siro uko mia puo thuo uko kediu chülietuo, uko donunu uko kekha kezhau siertuo, ae puo ze penuo vortuo, mu puoe a ki vortuo, kekreilamonyü puo thuo a ki vor nyükelie hau supuo ga? Jihovae sidi puya.

²²Siro nieko pie a themia chütuo mu a nieko Kepenuopfü chütuo.

²³Mehoshücie, Jihova teikhrieu! Noupfhünouyieu prate, teikhrie khriewhi puo; süue kerüzhümia tsü gei tsurtuo.

²⁴Jihova nouyie kemeriekecüu, puo mhatho-u chüwa kemochie, mu puo keleu chü tseiwa kemochie se lalie lho. Teisozha thelatsa nieko hau ca silietuo.