Read Angami Naga Jeremia 31 Bible Online

Jeremia 31 - Angami Naga bible

Jeremia 31

¹Sükisü, Jihova puya, ae Israel kikru peteko Kepenuopfü chütatuo, mu ukoe a themia chütuo.

²Jihova hakemhie puya: Zhiecha nunu lhiekelie themiakoe nhatsa nu ngukemezhie ngulie; Israel kerülei pfhükesie ki,

³Jihova kepetse[49] phi nu puo pengushü. Ae kechachie bayakezha kekhrie pie n khrie vor zo; süla a kemiatho-u n gei ba seiya zo.

⁴A n chüpie sie lashütuo, mu chü la sielietuo, He-i Israel phousepfü! Noe n übouko pie lalietuo,[50] sidi u neikebako ze u dowhuotuo.

⁵Noe Samaria kijüthouko gei khube pelhoutuo, mha pelhouyakezhamiae pelhoutuo, sidi puo si cü ketheguotuo.

⁶Efraim kijükhru rüna kepfheko melieshüketuo teisozha puo batuo: “Vorlie, úko Zion gei, Jihova, Ukepenuopfü ki vo khe” si.

⁷Kekreilamonyü Jihova hai di puya: Jakob la nie nei di keliliecie, tsiu seyie kemeyieko la shieshü; pu pesishülie, ketshe khashülie, di sie, “He-i Jihova, n themia, Israel lhiepiekebako kelashücie.”

⁸Harie, ae pesotsa kijü nunu uko ze tsurshütuo, tsiu petse phikecü kijü valatsa nu uko kengulietuo, mhiciemia rei phiyhomia rei uko donu tuotuo, u nuonuo seketuomia tsiu nuonuovachü ketuomia rei sa tuotuo, krodi kezha puo, ukoe hanu la vortatuo.

⁹Ukoe kra zo di vortuo, tsiu thukepeluo se di a uko chathatuo, a uko bu kerü dzü khie tuo votuo, uko phi mesüwalie kelho cha kemezhü nu, kekreilamonyü Israel puou mu Efraim-e a nuo nuorieu zo.

¹⁰Jihova die rünyüliecie, he-i seyieko, sidi süu pie dzükhie kijü kepetseko nu pesishülie, sidi sie, “Israel biepie cürekewau, puoe tekuo kepfheu tuoi puo khapie balietuo” sicie.

¹¹Kekreilamonyü Jihovae Jakob rhaliete, sidi puo ki kuokuokecüu dzie nunu puo rhaliete.

¹²Ukoe vorlie di Zion thou geinu kelituo, tsiu keze Jihova ketseikeviu la thoulha, khubedzü, mu tier gei, mu tekuonuo mu kicükiri kemedzüko la uko u neituo; uko kelhoue dzü pie vakeshü tezie puo kemhie, sidi uko mhakipuorei thenousuo salie lho.

¹³Sitse phousepfüe puo nei di puo do whuotuo, mu khriesamia mu phichümia rei u neituo. Ae uko thekrü pie kenei chüwatatuo, sidi uko nou thupeluo, tsiu nousuo sounu kenei khashütuo.

¹⁴Ae mhapie zievoko ketshukelhuo chüshütuo, tsiu a tseiüvi geinu a themiako u kelhuo chülietuo, Jihova sidi puya.

¹⁵Jihova hai di puya: Rama nunu mhapfhe puo si, kra mu thekrü chü, Rachel-e puo nuonuoko krü kra; sidi puo nuonuoko la puo nouluo mvüta, kekreilamonyü uko tuo sa mote.

¹⁶Jihova hai di puya: Kra motuoü n ketheliecie, mhidzü bu n mhi nu kru sa hie; kekreilamonyü n mhatho zhakhra chüshü tsütuo, Jihova sidi puya: ukoe ngumvümia kijü nunu la vortuo;

¹⁷N siedze kemerü ba zo, Jihova siya; n nuonuoko u thuo u rüna nu la vorlietuo.

¹⁸Efraim hai di meheimelo keba a si tou zo: “No a pethashüte, mu a a pethakeshü pfüliete; ae pethapfükemo thudoyo tuoi di. A ze la vorshücie, a bu la vorliecie, noe Jihova a Kepenuopfü zocü la.

¹⁹A rürei tuoketa sie a thenou kediliete; mu a a pfhülieketa sie, a a do kepfü; ae mengalie, mu a ziekejü chü bata, kekreilamonyü a a khriesa ki ngau toupfüliete” si.

²⁰Efraim-e a nuo a khrieu me? Puoe nuo a keneiu me? A tsiekenuo die pu puo petsouya, siürei a tsie ketso puo rükra ba zo. Süla ae puo la a nou meyhumezhieta; a puo ngumezhie lashü tou zotuo, Jihova sidi puya.

²¹Chapfüko nu zasi khashüliecie, n thuo n tsiepfhe pfhelie; n nou pie chapfüu, no kevo chau nu shülie. Rürei vorlie, he-i Israel phousepfü, rürei la n nadi hako nu vorlie.

²²He-i dietho kemo nuopfü, no kichiepuo rühou tuotieya ga? Kekreilamonyü kijüu gei mha kesa puo chüshüte: themia puoe thepfumia puo yalietuo.

²³Krodiko Jihova, Israel Kepenuopfü hai di puya: Ukoe Juda kijü nu mu puo nadoko nu, a uko mia die chüketuo nunu ze la vorkelie ki die hako se latuo: “Jihova bu japie n tsücie, he-i, kemezhümia lhoukeba thechü nu, He-i kemesa kijükhruko!”

²⁴Sidi Juda mu puo rüna pete, lieciemia, tsiu tekuo ze rühou tuoyakezhamia[51] keze lhoutuo.

²⁵Ae u nyie ketuomia bu u kelhou ngulietuo, tsiu mezietuoketamia pete chü perhei lashütuo.

²⁶Haki ae cosierlie di mehoshü, siru a ze ketheguo selieta zo.

²⁷Teisozha puo vorzhie, Jihova siya, süki ae themia tsia, mu khunuo tsia pie Israel kinuko mu Juda kinuko donu prushütuo.

²⁸Ae uko phewa, biethewa, kelhouwa mu pekawa tsiu mha kesuo se uko gei kevor tuoi, ae uko chüse sieshütuoü mu pelhoushütuoü di pfhe batuo, Jihova siya.

²⁹Süki ukoe sie: “U krünuokoe khubesi kekhro cüwate, sidi u nuonuo bu u hu mekre bate,” isikecü pu salie lho.

³⁰Derei mia puo puokecü puo thuo puo kesuo la siatuo; themia khubesi kekhro kecü kheko, u hu mekretuo.

³¹Teisozhako vorzhie, Jihova hai di puya, süki ae Israel kinuko mu Juda kinuko ze dietseidiekho kesalietuo.

³²Süue ae Ijipt kijü nunu uko dzie teshü kepar nhie uko puonuoko ze dietseidiekho kechüu kemhielie lho; ae uko nupfu[52] kemhie zorei ukoe a ze dietseidiekho kelieu varhuowa, Jihova sikecü puya.

³³Derei ae Israel kinuko ze dietsiediekhokelieu haituo, teisozha sükosü Jihova sikecü puya, a zho-u pie uko noutsa shütuo, tsiu süko pie uko melou gei thushütuo; sidi uko Kepenuopfü chütuo, mu ukoe a themia chütuo.

³⁴Siro uko huoniehuo petha morei mia puo mia puo ki, “Jihova silie” isilie lho, kekreilamonyü uko pete-e a sitatuo, kecütho-u nunu vo kezhatho-u ketso, Jihova siya; kekreilamonyü ae uko kesuo kechü kejo vashütuo, tsiu uko kephouma rükra salie lho.

³⁵Jihova hai di puya, Teisogei kezie khashüketuo la niaki khashü tsiu teizei gei kezie khashüketuo la khrü mu themvü zhoko khashü, Puoe dzükezha kenieshü di dzü rüpfhü sie di ruotayacüu, puo zae krodiko Jihova we.

³⁶Puo zho hako a kinu jüta liro, Jihova sidi puya. Siliro Israel rei kechachie a mhodzünu seyie chüketuo jütatuo.

³⁷Jihova hai di puya: Mhanuü tei pesogeiko mejülie vi üliro, tsiu puo khro kijü mvüdzeu pfhü se parlie üliro, ae Israel nuosenuoyie, ukoe chükewa pete khakegewatuo, Jihova sikecü puya.

³⁸Teisozhako vor touzhie, Jihova sidi puya, süki Hananel tsiepfhe nunu vo puo ke kharuu ketso nadiu chütuo.

³⁹Siro puo kemejü ro-u Gareb kijüthou geinu sede ro Goa ketso houtuo.

⁴⁰Tsiu kijü razha pete nu kesiamoko, tsiu migeko mu lieko pete vo Kidron rü ketso, sünu nu vo niathutsa Gura Kharu ketso Jihova la mesatatuo. Süue kechachie biemhewalie lho morei kelhouwalie lho.